અકસ્માત / અરવલ્લીના ફરેડી નજીક પૂરઝડપે આવતી કારે બાઇકને ટક્કર મારતા 3ના મોત, દંપતી કાર છોડીને રફુચક્કર

• અરવલ્લીના ફરેડી પાસે અકસ્માતમાં 3 યુવકના મૃત્યુ 
• પૂરઝડપે આવતી કારે બાઇકને ટક્કર મારતા દુર્ઘટના ઘટી
• અકસ્માત બાદ કારમાં સવાર દંપતી કાર છોડીને ફરાર

ગુજરાતમાં અકસ્માતની ઘટનાઓ છાશવારે સામે આવતી રહે છે. ત્યારે રાજ્યમાં આજે વધુ એક અકસ્માતની ઘટના સામે આવી છે. જેમાં અરવલ્લીના ફરેડી નજીક પૂરઝડપે આવતી એક કારે બાઇકને અડફેટમાં લેતા બાઇક પર સવાર 3 યુવકના મોત નિપજ્યાં છે. જો કે, કારમાં સવાર દંપતી કાર છોડીને ફરાર થઇ ગયા છે.

ગાંધીનગરના ચ-6 સર્કલ પાસે બાઈક અને સ્કૂલ વાન વચ્ચે અકસ્માતમાં એકનું મોત

બીજી બાજુ આજ રોજ ગાંધીનગરમાં પણ અકસ્માતની ઘટના સામે આવી છે. જેમાં ગાંધીનગરના ચ-6 સર્કલ પાસે બાઈક અને સ્કૂલ વાન વચ્ચે અકસ્માત સર્જાતા એકનું મોત નિપજ્યું છે. જો કે આ અકસ્માત બાદ સ્કૂલવાન ચાલક બાળકો સાથે વાન મૂકીને ફરાર થઇ ગયો હતો. હાલમાં પોલીસે આ સમગ્ર મામલની વધુ તપાસ હાથ ધરી છે.

વસ્ત્રાલમાં ગઇકાલે ઘટેલી હિટ એન્ડ રનની ઘટનામાં એકનું મોત

એ સિવાય અમદાવાદના વસ્ત્રાલમાં ગઇકાલે શુક્રવારના રોજ પણ એક હિટ એન્ડ રનની ઘટના ઘટી હતી. વસ્ત્રાલમાં બનેલી હિટ એન્ડ રનની ઘટનાના CCTV ફૂટેજ પણ આજે સામે આવ્યા છે. જેમાં વસ્ત્રાલમાં એક પીકઅપ વાનચાલક રાહદારીને અડફેટમાં લઈને ફરાર થઇ ગયો હતો. જે ઘટનામાં શૈલેષ પ્રજાપતિ નામના યુવકનું મોત નિપજ્યું છે. જો કે, આ ઘટનાને લઈને પરિવાર તેમજ સ્થાનિક લોકોમાં ભારે રોષ જોવા મળી રહ્યો છે. હાલમાં સ્થાનિક લોકો તેમજ તે યુવકના પરિવારજનો તાત્કાલિક ધોરણે વાહનચાલકને પકડવાની માંગ કરી રહ્યાં છે.

એક-બે દિવસ અગાઉ કલોલ ખાતે સર્જાયો હતો અકસ્માત

આ સાથે એક-બે દિવસ પહેલાં ગાંધીનગરના કલોલમાં પણ બોરિસ ખાતે આવેલા બ્રિજ પર હીટ એન્ડ રનની ઘટના સામે આવી હતી. જેમાં એક વાહનચાલકે બાઇક સવાર યુવકને અડફેટે લેતા અકસ્માત સર્જાયો હતો. જેમાં યુવાન કાળનો કોળીયો બની જતા ગાંધીનગર પંથકમાં હાહાકાર મચી ગયો હતો.