મેઘ મલ્હાર / અમદાવાદમાં આજથી 3 દિવસ સારા વરસાદની આગાહી, દક્ષિણ ગુજરાત અને સૌરાષ્ટ્રમાં થશે મેઘમહેર

• અમદાવાદમાં પણ આજથી 3 દિવસ સુધી વરસાદ વરસી શકે છે
• ઉત્તર ગુજરાતમાં સામાન્ય વરસાદ વરસવાની શકયતા રહેલી છે
• દક્ષિણ ગુજરાત-સૌરાષ્ટ્રના કેટલાંક વિસ્તારમાં પણ વરસાદ વરસી શકે

રાજ્ય (ગુજરાત) માં વરસાદને લઈને હવામાન વિભાગે વધુ એક આગાહી કરતા જણાવ્યું કે, 'મધ્ય અરબી સમુદ્રમાં સાયક્લોનિક સર્કયુલેશન સિસ્ટમ સક્રિય થઇ છે. ત્યારે રાજ્યમાં દક્ષિણ ગુજરાત અને સૌરાષ્ટ્રના કેટલાંક વિસ્તારમાં આજે વરસાદ પડી શકે છે. અમદાવાદમાં પણ આજથી 3 દિવસ સુધી વરસાદ વરસી શકે છે. જ્યારે ઉત્તર ગુજરાતમાં સામાન્ય વરસાદ વરસવાની શકયતા રહેલી છે.'

હવામાન નિષ્ણાંત અંબાલાલ પટેલે શું કરી છે આગાહી?

રાજ્ય (ગુજરાત) માં જ્યારે ખરેખર ચોમાસાએ એન્ટ્રી મારી દીધી છે. એવામાં હવામાન નિષ્ણાંત અંબાલાલ પટેલની આગાહી વધારે મહત્વ ધરાવતી હોય છે. ત્યારે અંબાલાલની આગાહી અનુસાર, રાજ્યમાં 25 જૂનથી 3 જુલાઇ સુધી વાવણીલાયક વરસાદ વરસશે. ગુજરાતમાં અનેક જગ્યાએ હળવાથી ભારે વરસાદ વરસશે. સૌરાષ્ટ્ર-કચ્છ અને દક્ષિણ ગુજરાતમાં હળવાથી ભારે વરસાદ પડશે.

જૂન મહિનાના અંતમાં ગુજરાત પાણીની તરબોળ થઇ થશે

બીજી બાજુ દક્ષિણ ગુજરાતના જિલ્લામાં પણ હળવો વરસાદ પડશે. ઉત્તર ગુજરાતમાં અનેક જગ્યાએ હળવાથી ભારે વરસાદ થશે. ગીર સોમનાથ, અમરેલી અને પોરબંદરમાં હળવાથી ભારે વરસાદ થશે. તો અમદાવાદ, વડોદરા, આણંદ અને પંચમહાલમાં પણ વરસાદની આગાહી કરાઇ છે. અરવલ્લી, ડાંગ અને વલસાડમાં ભારે વરસાદની સંભાવના રહેલી છે. પાટણ, મહેસાણા અને સાબરકાંઠામાં પણ હળવાથી ભારે વરસાદની આગાહી કરાઇ છે. આ સાથે જૂન મહિનાના અંતમાં ગુજરાત પાણીની તરબોળ થઇ થશે.

જુઓ ગઇકાલે રાજ્યના કયા-કયા વિસ્તારોમાં વરસાદ વરસ્યો હતો?

ઉલ્લેખનીય છે કે, ગઇકાલે રાજ્યના કેટલાંક વિસ્તારોમાં વરસાદે રમઝટ બોલાવી હતી. જેમાં વિસ્તારની જો વાત કરીએ તો ગઇકાલે સુરત સહિત સમગ્ર દક્ષિણ ગુજરાતમાં વરસાદી માહોલ જામ્યો હતો. સુરતમાં વરસાદી ઝાપટું પડતા વરસાદી માહોલથી લોકોને ગરમીથી રાહત મળી હતી. તો બીજી બાજુ અમરેલીના જાફરાબાદ કોસ્ટલ બેલ્ટમાં ધીમીધારે વરસાદ વરસ્યો હતો.

આ સિવાય અમરેલીના વિવિધ વિસ્તારોમાં પણ ગઇકાલે વરસાદ વરસ્યો હતો. જેમાં સાવરકુંડલા શહેર અને ગ્રામ્ય વિસ્તારમાં વરસાદ વરસ્યો હતો. ધારી-ગીર પંથકમાં પણ ગઇકાલે ધોધમાર વરસાદ વરસ્યો હતો. ધારીના વીરપુર, જીરા, મુંજાણીયા અને ઈંગોરાળામાં વરસાદ ખાબક્યો હતો.

વલસાડ જિલ્લામાં પણ વરસાદી માહોલ જોવા મળ્યો હતો. વાપી અને તેની આસપાસના વિસ્તારમાં પણ ગઇકાલે વરસાદ ખાબક્યો હતો. વરસાદના પગલે ખેડૂતોમાં ખુશીનો માહોલ જોવા મળ્યો. વહેલી સવારથી વાદળછાયા વાતાવરણ વચ્ચે વરસાદ વરસ્યો હતો. તો જૂનાગઢ જિલ્લામાં પણ ગઇકાલે વરસાદી માહોલ જોવા મળ્યો હતો. જેમાં વિસાવદરમાં ધોધમાર વરસાદ વરસ્યો હતો. ખેડૂતોએ પણ વાવણી કરી હોવાથી વરસાદના કારણે હાશકારો અનુભવ્યો હતો. વિસાવદરમાં ગઇકાલે 1 ઇંચ જેટલો વરસાદ વરસ્યો હતો.