પ્રેરણા / જ્યારે ત્રણ ટાબરિયાઓ અમદાવાદના પોલીસ સ્ટેશનમાં મદદ માટે પૈસા આપવા પહોંચ્યા

• અમદાવાદના 3 ભૂલકાઓએ પીગી બૅંકના પૈસા દાનમાં આપ્યા
• જે પોલીસનો વીડિયો જોયો એ જ પોલીસ સબ ઈન્સપેક્ટરને દાન આપ્યુ
• પોલીસ કર્મીઓ ભૂલકાઓની દાનત જોઈ હરખાયા

આજે દેશ કોરોના વાયરસની મહામારીનો સામનો કરી રહ્યો છે. ત્યારે  ઘણા બધા દેશવાસીઓ પોતાનાથી બનતી તમામ મદદ જરૂરીયાત મંદોને કરી રહ્યા છે . ત્યારે અમદાવાદના રિલીફ રોડ પર આવેલા દલાલવાળામાં રહેતા 3 ભૂલકાઓએ પણ દેશને આ કટોકટીના સમયે લડવા માટે પોતાનું યોગદાન આપ્યું છે. તેમણે ફૂલ નહી તો ફુલની પાંખડી જેટલું દાન આપ્યું છે. આ બાળકોએ તેમની પીગી બેંક દાન કરી દીધી જેમાં 5500 રુપિયા હતા.

દલાલવાળામાં રહેતો 8 વર્ષનો દિકરો ઝેદ મેમણ, તેમના 4 વર્ષના પિતરાઈ ભાઈ મોઈન મેમણ અને 4 વર્ષ પિતરાઈ બહેન આમીના મેમણને લઈ અમદાવાદના કાગડાપીઠ પોલીસ સ્ટેશને પહોંચે છે. બાળકો નાના અને પોલીસ સ્ટેશને જવાની જીદ પર ઝેદના મમ્મી મુસ્કાન તેમની સાથે આવ્યા છે. આ ચારેય પીઆઈની કેબિનમાં સીધા પ્રવેશી જતા ત્યાં હાજર પીએસઆઈ પી કે ગોહિલે કહ્યું અરે આ હાથમાં ડબ્બા લઈને આ તરફ કેમ આવી રહ્યા છો. ત્યાં ઝેદે કહ્યું અંકલ આતો તમને આપવા આવ્યા છીએ. પીઆઈ કંઈ સમજે તે પહેલા આમીના કહે છે ગરીબોને આપવાના છે તમે આપી દેજો. ત્યાં 4 વર્ષનો મોઈન કહે છે તમે પોલીસ છોને એટલે તમને બહાર જવા મળે અમને ના મળે તમે  જ આપી દેજો ગરીબોને. 

થોડીક વાર માટે ત્યા હાજર તમામ પોલીસ કર્મી બાળકોના તુટેલી લાઈનો સમજ્યા કે નહી પણ ભાવનાને સમજી ગયા હતા. એ બાદ મુસ્કાન ગોહિલને જણાવ્યું હતુ કે આ બાળકો જરુરીયાદ મંદોને મદદ કરવા માંગતા હતા. એટેલ તેઓ તેમની પીગી બેંકના પૈસા તમને આપવા આવ્યા છે.  હાજર પોલીસ કર્મીઓના આંખમાં હરખના ઝરઝરીયા આવી ગયા હતા.

આ અંગે VTVGujarati.com સાથે વાત કરતા મુસ્કાન મેમણે જણાવ્યું હતું કે, અમારુ જોઈન્ટ ફેમિલી છે. મારા પતિ ગુલામ મયુદ્દીન અબ્દુલ કાદર મેમણ અને હું આ પી કે ગોહિલે બનાવેલા 2 વીડિયો ફેસબુક પર જોઈ રહ્યા હતા. જે આ બાળકોએ પણ જોયા હતા. એટલે તેમણે કહ્યું અમારે પણ દાન કરવું છે. તો મે એમને કહ્યું તમે ક્યાં કમાવા જાવ છો કે તમારી પાસે પૈસા હોય. તમે ક્યાંથી દાન કરીશું. ત્યારે મારો દિકરો ઝેદ અને મારા દિયરના બાળકો આમીના અને મોઈને કહ્યું તમે અમને વાપરવા પૈસા આપો છો એ અમે પીગી બેગમાં ભેગા કર્યા છે અમે એ આપીશું.  મે એમને કહ્યું તમે મને પૈસા આપો આપડે કોઈ વસ્તુ લાવીને ગરીબોને આપી દઈશું, પણ બાળકોએ આ પી કે ગોહિલનો વીડિયો જોયો હતો એટલે તેમણે આજ પોલીસ અંકલને આપવાની જીદ કરી. બસ એટલે એમને પોલીસ સ્ટેશન લઈ આવી હતી.

ઉલ્લેખનીય છે કે બાળકોને આ સંસ્કાર તેમના ઘરમાં વડીલો પાસેથી મળ્યા છે. મા ગ્રુપ ચલાવનારા ગુલામ મયુદ્દીન અબ્દુલ કાદર મેમણ લોકડાઉનના પહેલા દિવસથી અહીં ફસાયેલા મજૂરો અને જરુરીયાત મંદો માટે રોજ લંગર ચલાવી જમાડે છે. તેમણે બાળકોને શીખવ્યું છે કે પહેલા બીજાની મદદ કરો.  પીએસઆઈ પી. કે ગોહિલે પણ આ બાળકોના ઉત્સાહને વધાવી કહ્યું હતું કે બાળકોને આવા સંસ્કાર આપવા જોઈએ.