અતિશય ચેપી એવા કોરોના વાયરસના સંક્રમણથી કેવી રીતે બચવું એ દિવસે ને દિવસે માથાનો દુખાવો બનતો જાય એવો વિષય છે. દેશની વિવિધ હોસ્પિટલમાં ડોકટરો કોરોના પોઝીટીવ આવી રહ્યા છે પરંતુ હવે બીજા રોગના દર્દીઓ પણ કોરોના પોઝીટીવ આવતા હાહાકાર મચી ગયો છે. દિલ્હીની સ્ટેટ કેન્સર ઇન્સ્ટીટયુટમાં ૩ કેન્સરના દર્દીઓ કોરોના પોઝીટીવ આવતા ચિંતાનું મોજું ફરી વળ્યું છે.
UKથી આવેલા પોતાના ભાઈને મળીને સૌપ્રથમ સંક્રમિત થયા ડોક્ટર
હોસ્પિટલનું OPD બંધ કરી દેવાયું છે
દેશ 21 દિવસના લોકડાઉનમાં જોવા છતાં કોરોનાનો આતંક દેશમાં વધતો જાય છે. રાજધાની દિલ્હીમાં દિલ્હી સ્ટેટ કેન્સર ઇન્સ્ટીટયુટ એટલે કે DSCIમાં ૩ કેન્સરના દર્દીઓ કોરોના પોઝીટીવ આવ્યા છે. આ હોસ્પિટલમાં ડોક્ટર સહિત ૨૧ મેડિકલ સ્ટાફ પહેલેથી જ કોરોના સંક્રમિત થઇ ચુક્યો છે. હોસ્પિટલમાં ૩ ડોક્ટર, ૧૭ નર્સિંગ સ્ટાફ અને એક સફાઈકર્મી સહિતના લોકો કોરોના પોઝીટીવ મળ્યા હતા અને હવે ૩ કેન્સરના દર્દીઓ કોરોના પોઝીટીવ આવ્યા છે.
૧ એપ્રિલના દિવસે આ હોસ્પિટલની મહિલા ડોક્ટર કોરોના પોઝીટીવ આવી હતી. ત્યાર બાદ હોસ્પિટલના OPDને જડબેસલાક બંધ કરી દેવામાં આવ્યું. આ ડોક્ટર UKથી આવેલા તેમના ભાઈને મળવા ગયા હતા. ત્યાર બાદ તેમના ઉપર ટેસ્ટ કરવામાં આવતા તેમને કોવિડ ૧૯ પોઝીટીવ આવ્યો હતો. ત્યાર બાદ આ ડોક્ટરના સંપર્કમાં આવેલા તમામ ૧૯ લોકોનો કોરોના ટેસ્ટ કરવામાં આવ્યો જેમાંથી ૪ લોકો પોઝીટીવ જોવા મળ્યા હતા. ત્યાર બાદ ૫૦ હેલ્થ વર્કર ઉપર ટેસ્ટ કરવામાં આવ્યા જેમાંથી ૧૧ સંક્રમિત થયેલા મળ્યા.
૬ એપ્રિલના દિવસે આવેલ રિપોર્ટમાં ૧ ડોક્ટર સહિત ૧૦ નર્સિંગ સ્ટાફને સંક્રમણ છે એવું બહાર આવ્યું. આ યાદીમાં ૮ મહિનાનો ગર્ભ ધરાવતી નર્સનો પણ સમાવેશ થાય છે.
શું કહ્યું હોસ્પિટલના વડાએ?
હોસ્પિટલના મેડિકલ સુપરીન્ટેન્ડન્ટ ડોક્ટર બી એલ શેરાવલે આ સમયે કહ્યું કે હોસ્પિટલમાં આ સાથે જ OPD બંધ કરી દેવામાં આવ્યું અને દર્દીઓને પ્રાઈવેટ હોસ્પિટલમાં શિફ્ટ કરવાના શરુ કરી દેવાયા. ચેપ લાગેલ ડોક્ટર સાથે સંપર્કમાં આવેલા ૫૦ હેલ્થ વર્કરના પણ સેમ્પલ લેવામાં આવ્યા. કેમ્પસને વ્યવસ્થિત રીતે સેનિટાઈઝ કરવામાં આવ્યું. જો કે જોતજોતામાં હોસ્પિટલમાં ૨૧ લોકો કોરોના પોઝીટીવ મળી આવ્યા.
દિલ્હીમાં કોરોના પોઝીટીવ દર્દીઓની સંખ્યા ૭૨૦ થઇ ગઈ છે જયારે કોરોનાથી મોત થનારની સંખ્યા ૧૨ જેટલી છે. નોંધનીય છે કે ૭૨૦ દર્દીઓમાંથી ૪૩૦ લોકો મરકઝ સાથે જોડાયેલા છે.