સુરતમાં બોગસ ડોક્યુમેન્ટ બનાવી NRIના પ્લોટ વેચનારા 3 લોકો ઝડપાયા
સચીનના પાલી ગામે આવેલા તમામ પ્લોટ વેચ્યા
ઝડપાયેલા 3 આરોપીમાંથી બે વકીલ
તમારા ડોક્યુમેન્ટ તમે કોને આપી રહ્યા છે તે ખાસ ધ્યાનમાં રાખજો. કારણ કે તમારી જાણ બહાર તમારા મહત્વના દસ્તાવેજોની નકલી નકલ ફરતી થઇ જતા વાર નહી લાગે. જી, હા આવો જ એક બનાવ સામે આવ્યો છે સુરતમાં. સુરતમાં ઓરિજિનલ દસ્તાવેજ પરથી ફેક દસ્તાવેજ બનાવીને બિલ્ડરને રાતોરાત જમીન વેચી દેવાનું કૌભાંડ ઝડપાયું છે.
NRIના 8 પ્લોટ વેચી નાંખ્યા, વકીલ નીકળ્યા આરોપી
સચિનના પાલી ગામે ઇંગ્લેન્ડમાં રહેતા જગદીશભાઇના આઠ પ્લોટ બિલ્ડરને વેચી કાઢનારા 3 શખ્સોને પોલીસે ઝડપી લીધા. NRI જગદીશભાઇએ સિવિલકોર્ટમાં દાવો કર્યો ત્યારે બિલ્ડરને આ વાતની જાણ થઇ. જે બાદ બિલ્ડર ઘનશ્યામ સોનાણીએ ક્રાઇમબ્રાંચમાં ફરિયાદ આપી હતી. જેના આધારે પોલીસે એડવોકેટ મુકેશ રતિલાલ રામગોંન્ડે, એડવોકેટ ચેતન ધીરૂ ધીમ્મર અને સ્ટેમ્પ વેન્ડર અશોક કનૈયાલાલ ભાટીયા સામે છેતરપિંડીનો ગુનો નોંધીને ધરપકડ કરી.
કેવી રીતે વેચ્યા NRIના પ્લોટ ?
વાત જાણે એમ હતી કે NRI જગદીશભાઇ 1989થી ઇંગ્લેન્ડમાં રહે છે. તેઓની માલિકીના 8 પ્લોટની સ્ટેમ્પ ડ્યૂટી ભરવાની બાકી હોવાથી રિયલ દસ્તાવેજો બહુમાળી સબ રજિસ્ટ્રાર કચેરીમાં જમા હતા. આ અસલી દસ્તાવેજોનો ફાયદો ઉઠાવીને એડવોકેટ મુકેશ અરજી કરી ખુટતી સ્ટેમ્પ ડ્યુટી ભરી અસલ દસ્તાવેજ છોડાવી ગયો હતો. ત્યાર પછી સ્ટેમ્પ વેન્ડર અશોક ભાટીયાએ વર્ષ 2015-16ના સ્ટેમ્પ પેપર હોવાનું જાણવા છતાં તે સ્ટેમ્પ પેપર પર વર્ષ 2006નું ખોટુ બનાવી દીધું હતું.