કાર્યવાહી / તંત્રની લાલ આંખ: માત્ર મે મહિનામાં સૌરાષ્ટ્રમાં ઝડપાઇ 26 કરોડની વીજચોરી, આ શહેર સૌથી મોખરે

• PGVCLના MDએ વીજચોરી મામલે બોલાવ્યો સપાટો
• રાજકોટ સહિત સૌરાષ્ટ્રમાં 26 કરોડની વીજ ચોરી પકડાઈ
• માત્ર મે મહિનામાં 11 હજારથી વધુ ચોરી કરતા કનેક્શન સામે કાર્યવાહી

રાજકોટ PGVCLના MDએ વીજચોરી મામલે સપાટો બોલાવ્યો છે. વીજચોરી કરનાર સામે PGVCLની ટીમ દ્વારા કડક કાર્યવાહી કરવામાં આવી રહી છે. મે મહિનામાં રાજકોટ સહિત સૌરાષ્ટ્રમાં 26 કરોડની વીજચોરી ઝડપાઇ છે. સૌરાષ્ટ્રમાં 11 હજાર વીજ કનેક્શનમાં થતી વીજચોરી ઝડપાઈ છે. માત્ર મે મહિનામાં જ 11 હજારથી વધુ ચોરી કરતા કનેક્શન સામે કાર્યવાહી કરાઇ. જણાવી દઇએ કે, સૌરાષ્ટ્રમાં સૌથી વધુ 4 કરોડની વીજચોરી રાજકોટમાં ઝડપાઈ છે.

મે મહિના દરમિયાન સૌરાષ્ટ્ર-કચ્છમાં વીજચેકિંગ હાથ ધરાયું

પશ્ચિમ ગુજરાત વીજ કંપનીના સૂત્રોએ જણાવ્યું હતું કે, સમગ્ર મે મહિના દરમિયાન સૌરાષ્ટ્ર-કચ્છમાં વીજચેકિંગ હાથ ધરવામાં આવ્યું હતું અને 85,265 વીજ કનેક્શનનોની ચકાસણી કરવામાં આવી હતી. જેમાંથી 10858 કનેકશનોમાં ગેરરીતિ, વીજચોરી માલૂમ પડી હતી અને કુલ 26.08 કરોડના બીલ આપવામાં આવ્યા હતા. એપ્રિલ મહિનામાં 27.84 કરોડની વીજચોરી પકડાઈ હતી. એપ્રિલ અને મે એમ બે મહિનામાં કુલ 53.62 કરોડની વીજચોરી પકડવામાં આવી છે.

સૌરાષ્ટ્રમાં સૌથી વધુ 4 કરોડની વીજચોરી રાજકોટમાં ઝડપાઈ

સૂત્રોના કહેવા મુજબ, સૌરાષ્ટ્ર-કચ્છમાં લગભગ તમામ જિલ્લાઓમાં મે મહિના દરમિયાન વારાફરતી સર્ચ ઓપરેશન હાથ ધરવામાં આવ્યું હતું. રાજકોટમાં ત્રણેક દિવસ ચેકિંગની કાર્યવાહી કરવામાં આવી હતી. એ સિવાય કચ્છ, સુરેન્દ્રનગર અને જામનગર જિલ્લામાં સતત ધોંસ બોલાવવામાં આવી હતી. મહત્વની બાબત એ છે કે, સૌથી વધુ વીજચોરી રાજકોટ શહેરમાં પકડાઇ હતી. જ્યારે બીજા ક્રમે ભાવનગર અને ત્રીજા ક્રમે રાજકોટ ગ્રામ્યમાંથી વીજચોરી ઝડપાઇ  હતી. રાજકોટ શહેર-ગ્રામ્ય, જામનગર, અંજાર, ભાવનગર તથા સુરેન્દ્રનગરમાંથી પકડાયેલી વીજચોરીનો આંકડો 2-2 કરોડથી વધુનો રહ્યો છે.