દસમી જૂનથી નવા શૈક્ષણિક સત્રનો પ્રારંભ થવા જઇ રહ્યો છે. ત્યારે વિદ્યાર્થીઓ અને વાલીઓ ઉપર સ્ટેશનરીના ખર્ચનો બોજો આવી પડ્યો છે. ધો-૧૦ અને ૧૨નાં ગણિત વિજ્ઞાનનાં પુસ્તકોના ભાવ લગભગ બમણા થઇ ગયા છે. ગણિતના પાઠ્યપુસ્તકના ભાવ રૂા.૧૦૪ થી ૧૧૭ થઇ ગયો છે. જ્યારે નોટબુકોમાં પણ ૨૫ ટકા જેટલો વધારો ઝીંકાયો છે.
ધો.૪, ધો.૬ અને ધો.૧૧, ધો.૧૨ અભ્યાસક્રમ લાગુ થતાં નવાં પાઠયપુસ્તકોના ભાવોમાં વધારો નોંધાયો છે. નવા સત્ર સાથે વિદ્યાર્થીઓની નોટબુક, ફૂલસ્કેપ ચોપડા, સ્કૂલબેગ, લંચબોક્સ, પાણીની બોટલ, સહિતની ચીજોની માગ વધી છે. મોટાભાગના વાલીઓ દર વર્ષની જેમ એક જ દુકાનેથી તમામ શૈક્ષણિક ખરીદીના બદલે જુદી જુદી દુકાનોએ ફરીને ભાવતાલ કરી રહ્યાનું પણ જોવા મળે છે. વિદ્યાર્થી દીઠ સરેરાશ રૂા.૮૦૦થી ૧૦૦૦નો ખર્ચ વધી ગયો છે.
હોલસેલ બુક સેલર નલિનભાઇ કોટડિયાએ જણાવ્યું હતું કે દર દસ વર્ષે ભાવ રિવાઇઝ થાય છે. આ વખતે એન.સી.ઈ.આર. ટીના અભ્યાસક્રમ મુજબ પાઠ્યપુસ્તકો તૈયાર કરાયાં છે. અગાઉ બ્લેક એન્ડ વ્હાઇટ પુસ્તકો આવતાં હતાં અત્યારે મલ્ટિકલર બુક આવી છે. પણ કાગળના ભાવ વધતાં નોટબુકમાં ૨૫ ટકા જેટલો ભાવ વધારો થયો છે. બાળક સ્કૂલમાં પ્રવેશ લે ત્યારથી વાલીઓ પર આર્થિક બોજ શરૂ થઇ જાય છે. જેમાં સ્કૂલ ફી, રિક્ષા ભાડું, ટયૂશન, સ્ટેશનરી, સ્કૂલ બેગ સહિતના વિવિધ ખર્ચાઓ દર વર્ષે બજેટમાં વધારો કરે છે.
સ્ટેશનરીની દુકાનના વેપારી અમિત શાહે જણાવ્યું હતું કે આ વર્ષે ધો.૪, ધો.૬ અને ધો.૧૧ અને ધો.૧૨માં એન.સી.ઈ.આર.ટી.નો અભ્યાસક્રમ લાગુ થતાં પ્રાથમિક ધોરણમાં ગણિત અને વિજ્ઞાનનાં પુસ્તકો બદલાયાં છે. તે પુસ્તકો ગત વર્ષની સરખામણીએ થોડા મોંઘાં થયાં છે. આ સાથે કાગળ ઉપર જીએસટી લાગુ થતાં નોટબુક અને ચોપડામાં રૂા. ૫ થી ૧૦નો વધારો થયો છે. એ જ રીતે સ્કૂલબેગમાં બાળકોને મનગમતાં કાર્ટૂન પાત્રો છોટાભીમ,સ્પાઈડરમેન,મોટુ પતલુ, બાહુબલિ, ડાઈનોસોર જેવી છાપવાળી કલરફૂલ બેગના રૂ. ૧૫૦થી ૨૫૦ અગાઉના ભાવમાં વધારો થઇને હાલ રૂા.૨૫૦થી ૪૫૦ના ભાવે વેચાણમાં છે. ઉપરાંત લંચબોકસ અને કંપાસના ભાવોમાં પણ વધારો થયો છે.