ચોમાસું પ્રબળ બનતાં છેલ્લાં 24 કલાકમાં ગુજરાતના 58 તાલુકામાં વરસાદ નોંધાયો. જેમાં સૌથી વધુ સુરતના કામરેજમાં 2.5 ઇંચ વરસાદ ખાબક્યો.
ગુજરાતમાં એક જ દિવસમાં 58 તાલુકામાં વરસાદ
સૌથી વધુ સુરતના કામરેજમાં 2.5 ઇંચ વરસાદ ખાબક્યો
કામરેજમાં ગોઠણસમા પાણી ભરાઇ જતા વાહન ચાલકો પરેશાન
ગુજરાતમાં ધીમે-ધીમે હવે ચોમાસું પ્રબળ બની રહ્યું છે. ત્યારે છેલ્લાં 24 કલાકમાં ચોમાસું પ્રબળ બનતાં ગુજરાતના 58 તાલુકામાં વરસાદ નોંધાયો છે. રાજ્યમાં સૌથી વધુ વરસાદ સુરતના કામરેજમાં 2.5 ઇંચ નોંધાયો છે. રાજ્યના વિવિધ વિસ્તારો જેવા કે કપરાડામાં 1.75 ઇંચ, કરજણમાં 1.5 ઇંચ, પલસાણામાં 1.5 ઇંચ, તારાપુરમાં 1 ઇંચ વડિયામાં પોણો ઇંચ, લીંબડીમાં પોણો ઇંચ, લિલિયામાં અડધો ઇંચ, હાંસોટમાં અડધો ઇંચ, બોટાદમાં અડધો ઇંચ અને વઢવાણમાં અડધો ઇંચ વરસાદ વરસ્યો છે. જો કે, હવે વરસાદના કારણે ખેડૂતોમાં ખુશીનો માહોલ જોવા મળી રહ્યો છે.
રાજ્યમાં વરસાદે સુરત જિલ્લામાં તોફાની બેટિંગ કરી છે. સુરત જિલ્લાના કામરેજમાં સવારથી લઇને અત્યાર સુધીમાં 2.5 ઈંચથી વધુ વરસાદ ખાબકી ચૂક્યો છે. જેના કારણે કામરેજની અનેક સોસાયટીઓમાં પાણી ભરાઈ ગયા છે. જ્યારે કામરેજ ગામમાંથી પસાર થતા સર્વિસ રોડ પર ગોઠણસમા પાણી ભરાઇ જતા વાહન ચાલકોએ ભારે મુશ્કેલીનો સામનો કરવાનો વારો આવ્યો હતો. જ્યારે કેટલાંક વાહનો પણ બંધ પડી ગયા હતા.
સુરત જિલ્લાનો તાલુકા પ્રમાણે જુઓ ક્યાં કેટલો વરસાદ?
તાલુકો
વરસાદ (મિમિ)
બારડોલી
11
કામરેજ
65
મહુવા
10
ઓલપાડ
04
પલસાણા
32
સુરત
03
વાલોડ
09
સુરત જિલ્લામાં 3 મિમિથી લઈને 65 મિમિ સુધીનો વરસાદ નોંધાયો
ઉલ્લેખનીય છે કે, હવામાન વિભાગ દ્વારા પાંચ દિવસ સમાન્ય વરસાદની આગાહી કરવામાં આવી છે. ત્યારે આજે સવારથી જ સુરત જિલ્લામાં વરસાદ વરસી રહ્યો છે. જેમાં 3 મિમિથી લઈને 65 મિમિ સુધી વરસાદ નોંધાયો છે. સુરત જિલ્લામાં સૌથી વધુ કામરેજમાં 2.5 ઈંચથી વધુ વરસાદ ખાબક્યો છે.