અંગ્રેજી ભાષાની લોકપ્રિયતા અને માતૃભાષા પ્રત્યેની ઉદાસીનતાના પરિણામે અમદાવાદમાં છેલ્લા એક વર્ષમાં 25 જેટલી ગુજરાતી શાળાઓ બંધ થઈ ગઈ છે. માસી માટે માને કોરાણે મૂકતા ગુજરાતી માટે આ આંકડા આત્મચિંતન માટે જરૂરી છે.
અમદાવાદ શહેરમાં એક વર્ષમાં જ 25 જેટલી સ્કૂલો વિદ્યાર્થીઓ ન મળવાના લીધે બંધ થઈ
મોટાભાગની સ્કૂલો પૂર્વ વિસ્તારમાં આવેલી સ્કુલો બંધ થઈ
ગ્રાન્ટેડ સ્કૂલોને ખાનગી સ્કૂલોના અતિક્રમણથી સૌથી વધુ અસર થઈ
માતૃભાષા દિને ગુજરાતીને યાદ કરતા ગુજરાતીઓએ ખરેખર ચેતી જવાની જરૂર છે. કેમ કે, ગુજરાતી આપણી માતૃભાષા છે અને જો આપણે તેનું જતન નહીં કરીએ તો તે નહીં જળવાય. હાલ મોટાભાગના મધ્યમવર્ગના અને ઉચ્ચ વર્ગ પોતાના બાળકોને ગુજરાતી માધ્યમમાં ભણાવવા જ તૈયાર નથી. અંગ્રેજી માધ્યમ તો જાણે જીવન જીવવા માટે કે બાળકના ભવિષ્ય માટે આગળ વધવાનો પરવાનો બની ગયો હોય તેવો ઘાટ છેલ્લા કેટલાક વર્ષોમાં ઘડાયો છે.
માતૃભાષાની જાળવણીને આપણે અનેક બુલબાંગો મારીએ પણ જો બાળક પોતાની માતૃભાષામાં પ્રાથમિક શિક્ષણ જ નહીં મેળવતું હોય તો તેને આ ભાષા તરફ ક્યારેય લગાવ નહીં રહે. એટલે આજે ગુજરાતી માધ્યમની સ્કૂલો ટપોટપ બંધ થઈ રહી છે અને જો કોઈ શરું છે તો તે બંધ થવાના વાંકે ચાલી રહી છે. આવી સ્કૂલો એવા જ વિદ્યાર્થીઓ આવી રહ્યા છે જેમના માટે અંગ્રેજી માધ્યમના શિક્ષણનો ખર્ચ પોષાય તેમ નથી આ એક વરવી અને કડવી વાસ્તવિક્તા છે.
અમદાવાદ શહેરમાં એક વર્ષમાં જ 25 જેટલી સ્કૂલો વિદ્યાર્થીઓ ન મળવાના લીધે બંધ થઈ
આંકડાની વાત કરીએ તો, અમદાવાદ શહેરમાં એક વર્ષમાં જ 25 જેટલી સ્કૂલો વિદ્યાર્થીઓ ન મળવાના લીધે બંધ થઈ હોવાનું સામે આવ્યું છે. મોટાભાગની સ્કૂલો વિદ્યાર્થીઓના અભાવે ખર્ચ ભોગવી શકે તેવી સ્થિતીમાં ન હોવાથી બોર્ડ સમક્ષ સામે ચાલીને સ્કૂલ બંધ કરવા માટે રજૂઆત કરતી હોય છે અને તેના આધારે બોર્ડ સ્કૂલો બંધ કરવાની મંજુરી આપે છે. શહેરની માધ્યમિક અને ઉચ્ચતર માધ્યમિકની મળી 25 જેટલી સ્કૂલો વિદ્યાર્થીઓ ન મળવાના લીધે બંધ થઈ છે. જેમાં મોટાભાગની ગુજરાતી માધ્યમની સ્કૂલો હોવાનું સામે આવ્યું છે.
મોટાભાગની સ્કૂલો પૂર્વ વિસ્તારમાં આવેલી સ્કુલો બંધ થઈ
અમદાવાદ શહેરમાં આવેલી સ્કૂલો પૈકી ઘણી સ્કૂલોને પુરતી સંખ્યામાં વિદ્યાર્થીઓ ન મળવાના લીધે તેમને સ્કૂલ ચલાવવી અઘરી પડે છે. શિક્ષકોના પગાર અને સ્કૂલોના ખર્ચની સામે ફીની પુરતી આવક ન થવાના લીધે આવી સ્કૂલો દ્વારા શિક્ષણ બોર્ડ સમક્ષ સામેથી અરજી કરી સ્કૂલ બંધ કરવા માટે જણાવવામાં આવે છે. અમદાવાદ શહેરમાં આવી 25 જેટલી સ્કૂલો 2019થી જૂન-2020 દરમિયાન બંધ કરી દેવામાં આવી હોવાનું જાણવા મળે છે. આ સ્કૂલો પૈકી મોટાભાગની સ્કૂલો પૂર્વ વિસ્તારમાં આવેલી હોવાનું જાણવા મળે છે.
ગ્રાન્ટેડ સ્કૂલોને ખાનગી સ્કૂલોના અતિક્રમણથી સૌથી વધુ અસર થઈ
સુત્રોના જણાવ્યા પ્રમાણે હાલમાં વાલીઓમાં અંગ્રેજી માધ્યમનો ક્રેઝ જે રીતે વધી રહ્યો છે તેને જોતા આગામી દિવસોમાં ગુજરાતી માધ્યમની સ્કૂલોની સ્થિતી વધુ કફોડી બનશે. શહેરમાં એક જ વર્ષમાં જે 25 સ્કૂલો બંધ થઈ છે તે તમામ સ્કૂલો ગુજરાતી માધ્યમની હોવાનું જાણવા મળે છે. જે સ્કૂલોને તાળા વાગ્યા છે તે પૈકી મોટાભાગની ગ્રાન્ટેડ સ્કૂલો છે અને બે જેટલી સ્કૂલો નોન ગ્રાન્ટેડ હોવાનું પણ સામે આવ્યું છે. આમ, ગ્રાન્ટેડ સ્કૂલોને ખાનગી સ્કૂલોના અતિક્રમણથી સૌથી વધુ અસર થઈ હોવાનું જાણવા મળે છે.
હાલની સ્થિતીને જોતા આગામી દિવસોમાં વધુ સ્કૂલો બંધ થાય તેમ લાગી રહ્યું છે
નોંધનીય છે કે, ઘણી સ્કૂલો એવી છે કે જેમને હાયર સેકન્ડરીમાં પુરતી સંખ્યામાં વિદ્યાર્થીઓ ન મળવાના લીધે ધોરણ-11 અને ધોરણ-12ની સ્કૂલ બંધ કરી દીધી છે. જોકે, આ સ્કૂલોએ હાલમાં સેકન્ડરી સ્કૂલો ચાલુ રાખી હોવાનું જાણવા મળે છે. જ્યારે ઘણી સ્કૂલોએ સેકન્ડરી સ્કૂલો જ બંધ કરી દીધી છે. જેથી તેઓ ચાલુ વર્ષે સ્કૂલમાં સેકન્ડરીના વિદ્યાર્થીઓને અભ્યાસ કરાવશે નહીં. હાલની સ્થિતીને જોતા આગામી દિવસોમાં વધુ સ્કૂલો બંધ થાય તેમ લાગી રહ્યું છે.