રાજ્યમાં હવામાન વિભાગની આગાહીના પગલે મેઘરાજા ચારેબાજુ પોતાની કૃપા વરસાવી રહ્યા છે. દક્ષિણ ગુજરાત, ઉત્તર ગુજરાત અને અમદાવાદ સહિત અનેક વિસ્તારોમાં મેઘરાજા મન મૂકીને વરસી રહ્યા છે. જ્યારે હવામાન વિભાગે રાજ્યના અનેક જિલ્લાઓમાં અતિભારે વરસાદની આગાહી કરી છે.
હવામાન વિભાગના જણાવ્યા અનુસાર આજે વધુ એક વરસાદી સિસ્ટમ સક્રિય બનશે. લો પ્રેશર સિસ્ટમ સક્રિય થતાં આજે ઉત્તર, દક્ષિણ અને મધ્ય ગુજરાત સાથે સૌરાષ્ટ્રમાં ભારે વરસાદ વરસી શકે છે. તો આ ઓગસ્ટ મહિનામાં રાજ્યમાં સૌથી વધુ વરસાદ પડવાનો છેલ્લા 10 વર્ષનો રેકોર્ડ તૂટ્યો છે. રાજ્યમાં અત્યાર સુધીમાં સિઝનનો 94 ટકા વરસાદ નોંધાયો છે.
જ્યારે ભારે વરસાદની આગાહી વચ્ચે બનાસકાંઠામાં છેલ્લા 2 દિવસથી ધોધમાર વરસાદ વરસ્યો છે. આજે વહેલી સવારથી ડીસા અને આસપાસના વિસ્તારમાં ધોધમાર વરસાદ વરસી રહ્યો છે. તો સુઈગામમાં 3 ઈંચ, ધાનેરામાં 2 ઈંચ, કાંકરેજ, અમીરગઢ અને દાંતામાં એક-એક ઈંચ વરસાદ નોંધાયો છે. તો સાબરકાંઠાના ખેડબ્રહ્મામાં સતત વરસાદ વરસી રહ્યો છે. જેથી લુણી નદીમાં પાણીની આવક થઈ છે.
તો ગઇકાલે અમદાવાદ, મહેસાણા, બનાસકાંઠા, સાબરકાંઠા, અરવલ્લી, પાટણ, સિદ્ધપુર, ચાણસ્મા, હારીજ, સંખેશ્વર, રાધનપુર, સાંતલપુર, સુરત, મહીસાગર, વડોદરા, કચ્છ, રાજકોટ, પંચમહાલ સહિત રાજ્યના લગભગ મોટાભાગના વિસ્તારોમાં સાર્વત્રિક વરસાદ નોંધાયો છે.