રાજ્યમાં ત્રણ દિવરસથી મેઘમાજા ધમાકેદાર બેટિંગ કરી રહ્યા છે. જેના કારણે લોકોનું જીવન અસ્તવ્યસ્ત થયું છે. ઘર અને માર્ગ પર પાણી ભરાતા લોકોને ભારે હાલાકીનો સામનો કરવો પડી રહ્યો છે. જ્યારે હવામાન વિભાગ દ્વારા રાજ્યમાં આગામી 24 કલાકમાં અતિ ભારે વરસાદની આગાહી કરવામાં આવી છે. આગાહીને પગલે તંત્ર એલર્ટ છે.
હવામાન વિભાગ દ્વારા પાટણ, મહેસાણા, બનાસકાંઠા, સાબરકાંઠા, ગાંધીનગર, અમદાવાદ, સુરેન્દ્રનગર,પોરબંદરમાં ભારે વરસાદની આગાહી કરાઇ છે. જ્યારે રાજકોટ, મોરબી, દેવભૂમિ દ્વારકા, ગીરસોમનાથ, બોટાદ, જામનગર, કચ્છમાં ભારેથી અતિભારે વરસાદની આગાહી કરાઇ છે. તો અરવલ્લી, ખેડા, આણંદ, વડોદરા,પંચમહાલ ઉપરાંત દાહોદ, નર્મદા, ભરૂચ, સુરતમાં ભારેથી અતિભારે વરસાદની આગાહી કરાઇ છે. જ્યારે વલસાડ અને નવસારીમાં પણ ભારે વરસાદ પડી શકે છે. ત્યારે ભારેથી અતિભારે વરસાદને લઇ માછીમારોને દરિયો ન ખેડવા સૂચન અપાયા છે.
ગુજરાતમાં સિઝનનો 71 ટકા વરસાદ પડ્યો છે. ગુજરાતમાં તમામ તાલુકામાં સારો વરસાદ પડ્યો છે. અત્યાર સુધી દક્ષિણ ગુજરાતમાં 98 ટકા વરસાદ પડ્યો છે. જ્યારે સૌરાષ્ટ્રમાં સિઝનનો 64 ટકા વરસાદ પડ્યો છે. જ્યારે મધ્ય ગુજરાતમાં 71 ટકા અને ઉત્તર ગુજરાતમાં 51 ટકા વરસાદ પડ્યો છે. તો ભરૂચ, નર્મદા, સુરત, છોટાઉદેપુરમાં સિઝનનો 100 ટકા વરસાદ પડ્યો છે. જ્યારં ડાંગ, નવસારી, વલસાડમાં સિઝનનો 90થી 95 ટકા વરસાદ છે. ગત સિઝન કરતા આ વર્ષે સારો વરસાદ રહેતા ગુજરાતમાં લોકોમાં ખુશી છે. જ્યારે હજુ પણ ગુજરાતમાં સારા વરસાદની સંભાવના છે.