દિલ્હી / ચાઈલ્ડ પોર્નોગ્રાફી અને રેપ વીડિયો ફેલાવનાર લોકોની સામે મોટી કાર્યવાહી, ટ્વિટર એકાઉન્ટ બંધ કરાયા

• ટ્વિટર પર ચાઈલ્ડ પોર્નોગ્રાફી અને રેપ વીડિયોની ભરમાર
• દિલ્હી મહિલા પંચના આદેશને પગલે ટ્વિટરની મોટી કાર્યવાહી
• 23 એકાઉન્ટ બંધ કરી દીધા
• ચાઈલ્ડ પોર્નોગ્રાફી અને રેપ વીડિયો ફેલાવવાનો આરોપ 

ચાઇલ્ડ પોર્નોગ્રાફી અને રેપના વીડિયો ટ્વિટર પર પોસ્ટ કરવા બદલ 23 એકાઉન્ટ સામે મોટી કાર્યવાહી કરવામાં આવી છે. દિલ્હી મહિલા આયોગે વાંધો ઉઠાવ્યા બાદ દિલ્હી પોલીસના સાઇબર સેલે ટ્વિટરને એક પત્ર મોકલ્યો હતો. દિલ્હી પોલીસનો પત્ર મળ્યા બાદ ટ્વિટરે 23 એકાઉન્ટ બંધ કરવાનો નિર્ણય લીધો હતો. દિલ્હી મહિલા આયોગે ટ્વિટર ઇન્ડિયા અને દિલ્હી પોલીસને નોટિસ ફટકારીને તેમના જવાબો માંગ્યા હતા.

23 ટ્વિટર એકાઉન્ટ બંધ કરાયા 
ટ્વિટર ઇન્ડિયાના અધિકારીઓ પણ દિલ્હી મહિલા આયોગની ઓફિસ પહોંચ્યા હતા. ટ્વિટર ઇન્ડિયા પોલિસીના વડા સમીરન ગુપ્તા અને ટ્વિટર ઇન્કના કમ્પ્લાયન્સ ઓફિસર વિનય પ્રકાશ 26 સપ્ટેમ્બરના રોજ કમિશન સમક્ષ હાજર થયા હતા. તેમણે કહ્યું હતું કે, દિલ્હી મહિલા આયોગ દ્વારા ઓળખાયેલા તમામ ખાતાઓને નિષ્ક્રિય કરી દેવામાં આવ્યા છે. જો કે પંચે કહ્યું હતું કે, તેમણે અર્ધ અધૂરો જવાબ આપ્યો હતો. દિલ્હી મહિલા આયોગને ટ્વિટર ઇન્ડિયા તરફથી પૂરતો પ્રતિસાદ મળ્યો નથી.

પોર્ન વીડિયો ફેલાવનાર લોકોની ઓળખ માટે ટીમો રચાઈ 
કમિશને ટ્વિટર ઇન્ડિયાને નવું સમન્સ જારી કર્યું છે અને તેને વિગતવાર જવાબ ફાઇલ કરવા માટે ૩૦ સપ્ટેમ્બર સુધીનો સમય આપ્યો છે. કમિશને ટ્વિટર પર બાળકોના અશ્લીલ વીડિયો શેર કરનારાઓ સામે પોક્સો અને આઇટી એક્ટ હેઠળ કાર્યવાહી કરવાની માંગ કરી હતી. દિલ્હી પોલીસના સાયબર સેલે ટ્વિટર ઇન્ડિયાને પત્ર લખીને વિવાદિત એકાઉન્ટને તાત્કાલિક બંધ કરવાનો નિર્દેશ આપ્યો હતો. દિલ્હી પોલીસના પત્ર પર ટ્વિટર ઈન્ડિયાએ 23 એકાઉન્ટ બંધ કરી દીધા છે. જાણકારી અનુસાર સાઇબર ક્રાઇમ યૂનિટે આરોપીઓની ઓળખ માટે ચાર અલગ અલગ ટીમો બનાવી છે. સાયબર સેલે આરોપીઓને શોધી કાઢવા અને માહિતી મેળવવા માટે ટ્વિટર ઇન્ડિયાની પણ મદદ માંગી છે.