સુરતના કાપોદ્રા વિસ્તારમાં દિકરીઓના નામે ભેજાબાજ શખ્સે મંડળ ખોલ્યુ હતુ. બાદમાં ઉત્તરાયણના દિવસે આ આરોપીએ દીકરીઓના નામે સ્ટોલ લગાવ્યા હતા અને છેતરપિંડી આચરી રૂપિયા લઈ આરોપી રફુચક્કર થઈ ગયો હતો.
કાપોદ્રા વિસ્તારમાં દિકરીઓના નામે શખ્સે ખોલ્યુ હતુ મંડળ
સુરતમાં દિકરીઓના નામે મંડળ ખોલીને શખ્સે છેતરપિંડી આચરી હોવાનો કિસ્સો સામે આવતા ખળભળાટ મચી ગયો છે. કાપોદ્રા વિસ્તારમાં દિકરીઓના નામે ભેજાબાજ શખ્સે મંડળ ખોલ્યુ હતુ. બાદમાં ઉત્તરાયણના દિવસે આ આરોપીએ દીકરીઓના નામે સ્ટોલ લગાવ્યા હતા. આ દરમિયાન લોકોને આંબા આંબલી દેખાડી દીકરીઓના નામે મોટા વળતરની લાલચ આપી હતી. જેને લઈને લોકો નાણા રોકાણ માટે આકર્ષીયા હતા.
ઉત્તરાયણના દિવસે શખ્સે દીકરીઓના નામે સ્ટોલ લગાવ્યા હતા
ઉતરાયણના દિવસે ઉભા કરેલા સ્ટોલમાં દીકરીઓને પાંચ લાખ રૂપિયા અને ઈ બાઈક આપવાની જાહેરાત કરી હતી. જેને લઈને 2,121 દીકરીઓના નામ પણ સ્ટોલ પર નોંધવામાં આવ્યા હતા. બાદમાં વળતરની માંગણી કરવાંમા આવતા આ શખ્સ તરફથી કોઈ પ્રત્યુતર આપવામાં આવ્યો ન હતો. એટલું જ નહી કોઈ સંપર્ક પણ ન થતા આરોપી મોટી રકમ ઉસેડીને રફુચક્કર થઈ ગયો હોવાનું સામે આવ્યું હતું. જેને લઈને છેતરપીંડી થઇ હોવાનું સામે આવતા વાલીઓના પગ તળેથી જમીન સરકી ગઇ હતી.
મોટી સંખ્યામાં યુવતીઓ તેમના વાલીઓ સાથે કાપોદ્રા પોલીસ મથકે પહોચી
જેને લઈને મોટી સંખ્યામાં યુવતીઓ તેમના વાલીઓ સાથે સુરતના કાપોદ્રા પોલીસ મથકે દોડી ગઈ હતી. આ દરમિયાન પોલીસ સમક્ષ સમગ્ર વિગત જાહેર કરી હતી. જેમાં નામ નોંધાવનાર યુવતીઓને શખ્સ અવારનવાર હેરાન કરતો હોવાના પણ ધગધગતા આરોપ લગાવતા ચકચાર જાગી છે. આ મામલે પોલીસે છેતરપીંડી સહિતની કલમો હેઠળ આરોપી સામે ગુન્હો નોંધી તેને ઝડપવા માટે તપાસના ચક્રો ગતિમાન કર્યા છે.