કાર્યવાહી / અમદાવાદીઓ સાવધાન! આડેધડ વાહન પાર્ક ન કરતા, પૂર્વ ઝોનમાં 65 વાહનચાલકોને 20 હજારનો દંડ

• ટ્રાફિકને અવરોધરૂપ એવાં 21 વાહનોને તાળાં માર્યા
• નફિકરાં વાહનચાલકોમાં ભારે ફફડાટ
• વાહનોના ચાલકો પાસેથી રૂ. આઠ હજારનો ચાર્જ વસૂલ્યો

અમદાવાદમાં મ્યુનિસિપલ કોર્પોરેશનની એસ્ટેટ વિભાગની ટીમ દ્વારા પૂર્વ ઝોનમાં રોડ પર વાહન પાર્ક કરવાના મામલે ગઈ કાલે સપાટો બોલાવાયો હતો. આ ઝોનના વિવિધ ટીપી રોડ, ફૂટપાથ અને જંક્શન પરથી તંત્રે લારી, ટેબલ, બોર્ડ, બેનર તેમજ પરચૂરણ સામાન જપ્ત કરવાની સાથે સાથે રોડ પર ટ્રાફિકને અડચણરૂપ વાહનોને તાળાં મારી નફિકરાં વાહનચાલકોમાં ભારે ફફડાટ ફેલાવી દીધો હતો.

ચાર્જ વસૂલવામાં આવ્યો 
પૂર્વ ઝોનના નિકોલ વોર્ડમાં એસપી રિંગ રોડ પર તંત્રે દરોડા પાડીને રોડ પર ટ્રાફિકને અવરોધરૂપ એવાં 21 વાહનોને તાળાં મારી આ વાહનોના ચાલકો પાસેથી રૂ. આઠ હજારનો વહીવટી ચાર્જ વસૂલ્યો હતો. જ્યારે ઓઢવ વોર્ડમાં ચાર વાહનને લોક મારી રૂ. બે હજારનો વહીવટી ચાર્જ વસૂલ્યો હતો. રામોલ-હાથીજણ વોર્ડમાં 13 વાહનને તાળાં મારીને રૂ.2800નો વહીવટી ચાર્જ, અમરાઈવાડી વોર્ડમાં આઠ વાહનને તાળાં મારી રૂ.1600નો વહીવટી ચાર્જ વસૂલવામાં આવ્યો હતો. 

વાહનચાલકોમાં ભારે ફફડાટ
ગોમતીપુર વોર્ડમાં આઠ વાહનને તાળાં મારીને તંત્રે રૂ.1200નો વહીવટી ચાર્જ વસૂલ્યો હતો. વિરાટનગર વોર્ડમાં ત્રણ વાહનને તાળાં મારી રૂ. એક હજાર, ભાઈપુરા વોર્ડમાં પાંચ વાહનને તાળાં મારી રૂ. એક હજાર અને વસ્ત્રાલ વોર્ડમાં ત્રણ વાહનને તાળાં મારી સત્તાવાળાઓએ રૂ.800નો વહીવટી ચાર્જ વસૂલ્યો હતો. આમ એસ્ટેટ વિભાગની ટીમ દ્વારા ટ્રક સહિત કુલ 65 વાહનને રોડ પર ટ્રાફિકને અડચણરૂપ હોઈ તાળાં મારીને કુલ રૂ. 19,900નો વહીવટી ચાર્જ વસૂલતા રોડ પર પોતાના વાહન આડેધડ રીતે પાર્ક કરીને જતાં રહેનારા વાહનચાલકોમાં ભારે ફફડાટ પેસી ગયો છે.