તૈયારી / 21 જૂને વિશ્વ યોગ દિવસઃ ગુજરાતના 75 સ્થળો પર બનાવાઈ ડોક્યુમેન્ટ્રી, જાણો શું છે ખાસ

• બે વર્ષ બાદ પ્રથમ વખત ઓફ લાઈન યોગ દિવસની ઉજવણી
• ગુજરાતના 75 સ્થળો પર બનાવાઇ ડોક્યુમેન્ટ્રી 
• યોગ ડોક્યુમેન્ટ્રી વિશ્વની 75 ભાષામાં લોન્ચ થશે

સમગ્ર વિશ્વમાં આગામી 21મી જૂનના રોજ યોગ દિવસ ઉજવાશે. આ દિવસની ઉજવણી અંગે ગુજરાતમાં પણ જોરશોરથી તૈયારીઓ ચાલી રહી છે. વિશ્વની માફક રાજ્યમાં પણ 21 જૂને વિશ્વ યોગ દિવસની ઉજવણી કરવામાં આવશે. મહત્વનું છે કે, કોરોનાના બે વર્ષ બાદ પ્રથમ વખત ઓફ લાઈન યોગ દિવસની ઉજવણી કરવામાં આવશે. ત્યારે ગુજરાતના 75 સ્થળો પર ડોક્યુમેન્ટ્રી બનાવાઇ છે. જેને વિશ્વની 75 ભાષામાં લોન્ચ કરવામાં આવશે.

રાજ્યમાં 21 જૂને વિશ્વ યોગ દિવસની ઉજવણી થશે
વિશ્વ યોગ દિવસના અગામને હવે ગણતરીના દિવસો બાકી રહ્યા છે. જેના આયોજન અંગે તડામાર તૈયારીઓ ચાલી રહી છે. આગામી યોગ દિવસની થીમ‘યોગ ફોર હ્યુમેનિટી’એટલે કે, માનવતા માટે યોગ એવી રખાઇ છે. આ વર્ષે યોજાનાર યોગ દિવસના રાજ્યકક્ષાનો કાર્યક્રમ અમદાવાદમાં આવેલ રિવરફ્રન્ટ ખાતે યોજાશે. જેમાં મખ્યમંત્રી ભૂપેન્દ્ર પટેલ સહિતના હાજર રહશે. આ ઉપરાંત ભાવનગરના જવાહર ગ્રાઉન્ડ, જામનગરના રણમલ તળાવ, રાજકોટના રેસકોર્સ ગ્રાઉન્ડ, વડોદરામાં લક્ષ્મીવિલાસ પેલેસ અને સુરતના વનીતા આશ્રમ ખાતે ઉજવણી કરવામાં આવશે. તે જ રીતે રાજ્યના તમામ શહેર અને તાલુકા કક્ષાએ તથા ગામડાઓમાં પણ કાર્યક્રમોનું આયોજન કરવામાં આવનાર છે.

આઈકોનિક 75 સ્થળો પર બનાવાઇ ડોક્યુમેન્ટ્રી 
વધુમાં દેવભૂમિ દ્વારકાના શિવરાજપુર બીચ અને કચ્છનું નાનું રણ આ બે આઈકોનિક સ્થળોએ તાલુકા કક્ષાની ઉજવણી થશે. યોગ દિવસની ઉજવણી સંદર્ભે 1.25 કરોડ લોકો જોડાય તેવો લક્ષ્યાંક રખાયો છે. આ તકે વડાપ્રધાન નરેન્દ્ર મોદી વિશ્વ યોગ દિવસની ઉજવણી નિમિત્તે વર્ચુઅલ માધ્યમ થકી જોડાઇ સંબોધન કરશે. ભારત સરકારની સુચનાથી ગુજરાતના 75 આઇકોનીક સ્થળોએ પર ડોક્યુમેન્ટ્રી બનાવાઇ છે. જેમાં ગુજરાતના 75 સ્થળો પરથી વિવિધ યોગમુદ્રાનું શુટિંગ કરવામાં આવ્યું છે. મહત્વનું છે કે, ગુજરાત યોગ બોર્ડ દ્વારા તૈયાર કરવામાં આવેલી ડોક્યુમેન્ટ્રી સરકારના આયુષ મંત્રાલય દ્વારા 21 જૂને લોન્ચ કરવામાં આવશે. યોગ ડોક્યુમેન્ટ્રી વિશ્વની 75 ભાષામાં લોન્ચ કરાશે.