રાજ્યમાં સરકારો દ્વારા કાયદાઓ બનાવી દે છે પરંતુ દીવા તળે અંધારૂ હોય તેમ કાયદાના લીરે લીરા ઉડી રહ્યા છે. રાજ્યમાં છેલ્લા બે વર્ષમાં અમદાવાદમાંથી 21 કરોડનો દારૂ ઝડપાયો હોવાનું સામે આવી રહ્યું છે. જ્યારે છેલ્લા 5 વર્ષમાં રૂપિયા 403 કરોડનો દારૂ ઝડપાયો હતો.
વિધાનસભામાં દારૂ ઝડપાવા મુદ્દે ધારાસભ્ય ગ્યાસુદ્દીન શેખે સવાલ પુછ્યા હતા. ગ્યાસુદ્દીન શેખના સવાલના જવાબમાં મુખ્યમંત્રીએ લેખિતમાં આંકડા રજૂ કર્યા હતા. અમદાવાદ જિલ્લામાંથી છેલ્લા 2 વર્ષમાં કરોડોનો દારૂ ઝડપાયો છે. છેલ્લા 2 વર્ષમાં અમદાવાદમાંથી રૂપિયા 21.06 કરોડનો દારૂ પકડાયો હતો. છેલ્લા 2 વર્ષમાં અમદાવાદમાંથી રૂપિયા 85.95 લાખનું બિયર ઝડપાયું હતું. બે વર્ષમાં રૂપિયા 44.95 લાખનો દેશી દારૂ ઝડપાયો. અમદાવાદમાંથી રૂપિયા 4.56 કરોડનો નશીલા પદાર્થનો જથ્થો પણ પકડાયો હતો.
ગ્યાસુદ્દીને કહ્યું- હું દારૂની બદી સામે લડું છું એટલે...
વિધાનસભામાં ગૃહવિભાગની ચર્ચા દરમિયાન કોંગ્રેસના ધારાસભ્ય ગ્યાસુદ્દીન શેખે પોલીસ પર આક્ષેપ લગાવ્યા હતા કે, સરકારની કડક દારૂબંધી કેટલાક પોલીસ અધિકારીઓને ગમી નથી. દારૂબંધીથી અધિકારીઓની આવક બંધ થઈ ગઈ. પોલીસ અધિકારીઓ વેપારીઓને દબડાવીને પડાવે છે. બાંધકામની સાઇટ અને અન્ય વેપારીઓ પાસેથી પૈસા પડાવે છે.
શાહપુરના PIની ઓફીસ બુટલેગરના પૈસે રીનોવેટ કરાઈ. શાહપુરના PI સ્થાનિક વેપારીઓ પાસે બાંધકામના રૂપિયા ઉઘરાવે છે. હું દારૂની બદી સામે લડુ છું માટે પોલીસ મને હેરાન કરે છે.
ગૃહ વિભાગની અંદાજપત્રીય માગણીઓ ઉપર ચર્ચા જાગી હતી. વિપક્ષના ઉપનેતા શૈલેષ પરમારે સરકાર પર આક્ષેપ કર્યા હતા. તેમણે કહ્યું હતું કે, બૂટલેગરોને સરકારનો ડર નથી રહ્યો. રાજ્યમા દારૂ ઝડપાવાના કેસમા વધી રહ્યા છે. દારૂ બંધીના કડક અમલની વાતો ખોટી સાબિત થઇ છે. છેલ્લા 5 વર્ષમા રૂપિયા 403 કરોડનો દારૂ ઝડપાયો હતો. રૂપિયા 66 કરોડ બિયરની બોટલ ઝડપાઈ છે. રૂપિયા 11.41 કરોડની કિંમતના નશીલા પદાર્થો પકડાયા છે. આટલા મોટા પ્રમાણમાં આખરે દારૂ આવે છે કેમ ?