રાજકારણ / રાષ્ટ્રપતિની ચૂંટણી માટે 5 રાજ્યોના પરિણામો ભજવશે નિર્ણાયક ભૂમિકા, જાણો કોનું પલડું ભારે

• 5 રાજ્યો પૈકી 4 રાજ્યોમાં લહેરાયો ભગવો
• રાષ્ટ્રપતિની ચૂંટણી પર પણ રહેશે અસર 
• ઉત્તર પ્રદેશનું વધ્યું વર્ચસ્વ

આજે પાંચ રાજ્યમાં વિધાનસભાની ચૂંટણીનાં પરિણામ જાહેર થઇ રહ્યાં છે. પ્રચાર અને મતદાનના લાંબા રાઉન્ડ પછી આજે નક્કી થઇ જશે કે આ પાંચ રાજ્યના મતદાર   પંજાબ, ઉત્તર પ્રદેશ, ગોવા, મણિપુર અને ઉત્તરાખંડમાં કોની સરકાર બનાવશે.

રાષ્ટ્રપતિની ચૂંટણી માટે પણ 5 રાજ્યોની ચૂંટણી મહત્વની 

 જો કે આ ચૂંટણી માત્ર પાંચ રાજ્ય માટે જ નહીં, પરંતુ રાષ્ટ્રપતિની ચૂંટણી માટે પણ ઘણી મહત્વની છે. રાષ્ટ્રપતિ રામનાથ કોવિંદનો કાર્યકાળ ૨૪ જુલાઈના રોજ સમાપ્ત થઈ રહ્યો છે અને આગામી ચૂંટણીમાં આ પાંચ રાજ્યનાં પરિણામ નક્કી કરશે કે રાષ્ટ્રપતિની ચૂંટણીમાં કયો પક્ષ અથવા ગઠબંધન નિર્ણાયક ભૂમિકા ભજવશે.

યુપી વિધાનસભાનું પલડું ભારે 

રાષ્ટ્રપતિની ચૂંટણી માટે યુપી વિધાનસભાની ચૂંટણી મહત્વની છે. કારણ કે સૌથી વધુ વસ્તીને જોતાં ધારાસભ્યના વોટનું મૂલ્ય સૌથી વધુ (૨૦૮) છે. રાજ્યમાં કુલ ૪૦૩ ધારાસભ્ય છે. યુપી વિધાનસભાના મતનું કુલ મૂલ્ય ૮૩,૯૨૪ છે. આ સંખ્યા દેશમાં સૌથી વધુ છે. જ્યારે સિક્કિમમાં એક વોટની કિંમત સૌથી ઓછી (૭) છે. પંજાબમાં ધારાસભ્યોના વોટની કિંમત ૧૧૬, ઉત્તરાખંડમાં ૬૪, ગોવામાં ૨૦ અને મણિપુરમાં ૧૮ છે. અનેક ગણતરી પ્રમાણે નેશનલ ડેમોક્રેટિક એલાયન્સની તાકાત ૫૦ ટકાના આંકડાથી ઓછી છે. આથી રાષ્ટ્રપતિ ઉમેદવારની મજબૂત દાવેદારી માટે સાથી પક્ષોનાં સમર્થન પર નિર્ભર રહેવું પડશે.

ઈલેક્ટોરલ કોલેજમાં રાષ્ટ્રપતિની ચૂંટણી માટે લોકસભા, રાજ્યસભા અને વિધાનસભાના સભ્યોનો સમાવેશ થાય છે. વિધાન પરિષદ-નામાંકિત સભ્યો ઈલેક્ટોરલ કોલેજનો ભાગ નથી. ઈલેક્ટોરલ કોલેજ રાજ્યસભાના ૨૩૩ સભ્ય, લોકસભાના ૫૪૩ અને વિધાનસભાના ૪,૧૨૦ સભ્યની બનેલી છે. તેથી     મતદારની કુલ સંખ્યા ૪,૮૯૬ છે. ભાજપના ૧,૪૩૧ ધારાસભ્ય છે. ૪,૮૯૬ મતદાર ધરાવતી ઈલેક્ટોરલ કોલેજની કિંમત ૧૦,૯૮,૯૦૩ છે. અને વિજેતા ઉમેદવારને ઓછામાં ઓછા ૫૦ ટકા અને એક મત મળવો જરૂરી     છે. દેશની વિધાનસભામાં ભાજપ પાસે ૧,૪૩૧ ધારાસભ્ય છે. જ્યારે કોંગ્રેસના ધારાસભ્યની સંખ્યા ૭૬૬ છે. લોકસભામાં એનડીએના સભ્યોની સંખ્યા ૩૩૪ અને રાજ્યસભામાં ૧૧૫ છે. રાજ્યસભાના ૧૧૫ સભ્યમાંથી ભાજપના નવ સભ્ય નામાંકિત શ્રેણીમાં છે. જે મતદાન કરી શકતા નથી. આવી સ્થિતિમાં એનડીએનો આંકડો ઘટીને ૧૦૬ થયો છે. દરેક સાંસદના વોટની કિંમત ૭૦૮ છે.