મારૂતિ સુઝુકીએ મંગળવારે તેની નવી Ignisનું ફેસલિફ્ટ વર્ઝન લોન્ચ કરી દીધું છે. તેની કિંમત 4.89 લાખ રૂપિયાથી 7.319 રૂપિયા છે. Maruti Suzuki Ignis Faceliftને હાલમાં જ ઓટો એક્સપોમાં રજૂ કરવામા આવી હતી. નવી મારૂતિ ઈગ્નિસ પેટ્રોલ એન્જિનમાં લોન્ચ કરવામાં આવી છે. આમાં બીએસ6 કમ્પ્લાયન્ટ પેટ્રોલ એન્જિન આપવામાં આવ્યું છે. સાથે જ નવી ઈગ્નિસના લુકમાં પણ કેટલાક ફેરફાર કરવામાં આવ્યા છે. જે કારને એકદમ ફ્રેશ લુક આપે છે.
મારૂતિ સુઝુકીએ નવી Ignisનું ફેસલિફ્ટ વર્ઝન લોન્ચ કર્યું
આ કાર ઓટો એક્સપોમાં રજૂ કરવામા આવી હતી
કારને એકદમ ફ્રેશ લુક આપવામાં આવ્યો છે
આ કારની ડિઝાઈનની વાત કરીએ તો ઓવરઓલ પ્રોફાઈલ જૂના મોડલ જેવી છે, પણ ફ્રેશ લૂક આપવા માટે કારના ફ્રન્ટમાં નવી ક્રોમ ગ્રિલ અને નવું ફ્રંટ અને રિયર બંપર આપવામાં આવ્યું છે. ઈગ્નિસના જૂના મોડલની સરખામણીમાં નવી ઈગ્નિસમાં અલગ ફૉગ લેમ્પ કેસિંગ અને વર્ટિકલ રિફ્લેક્ટર સામેલ કરવામાં આવ્યા છે. આ સિવાય મારૂતિ સુઝુકીના ગ્રાઉન્ડ ક્લિયરન્સ વધારવાની સાથે કારમાં રિયર સ્પોઈલર અને રૂફ રેલ્સ પણ આપવામાં આવ્યું છે.
નવા કલર ઓપ્શન
નવી મારૂતિ ઇગ્નિસ બે નવા કલર ઓપ્શનમાં આવી છે, જેમાં લ્યુસેન્ટ ઓરેંજ અને ફિરોઝા બ્લુનો સમાવેશ થાય છે. આ સિવાય કંપનીએ આ કારને ત્રણ નવા ડ્યુલ-ટોન કલર ઓપ્શનમાં પણ રજૂ કરી છે. આમાં નેક્સા બ્લુ વિથ બ્લેક, લ્યુસેન્ટ ઓરેંજ વિથ બ્લેક અને નેક્સા બ્લુ વિથ સિલ્વર સામેલ છે. ડ્યુઅલ-ટોન કલર વિકલ્પ ફક્ત ઝેટા અને આલ્ફા વેરિઅન્ટમાં ઉપલબ્ધ હશે. ડ્યુલ ટોન ઇગ્નિસની કિંમત સ્ટાન્ડર્ડ કલર મોડલ કરતા 13 હજાર રૂપિયા વધારે છે. બે નવા રંગો અને ત્રણ ડ્યુલ ટોન કલર ઓપ્શન સાથે, મારૂતિ ઇગ્નિસ હવે કુલ 9 કલર ઓપ્શનમાં ઉપલબ્ધ છે.
ઈન્ટિરિયર
નવી ઇગ્નિસના ઈન્ટિરિયરનું લેઆઉટ અને તેની ડિઝાઇન જૂના મોડેલ જેવી જ છે. જોકે, તેમાં મારૂતિની નવી સ્માર્ટપ્લે સ્ટુડિયો ઇન્ફોટેનમેન્ટ સિસ્ટમ છે જેમાં 7 ઇંચની ટચસ્ક્રીન છે. આ ઇન્ફોટેનમેન્ટ સિસ્ટમ વોઇસ કમાન્ડ રિકગ્નિશન અને ઓન-બોર્ડ નેવિગેશન સાથે આવે છે. આ સિવાય નવી ઇગ્નિસમાં સુઝુકીનો એસ-કનેક્ટ કનેક્ટિવિટી સ્યુટ પણ આપવામાં આવ્યો છે, જે વૈકલ્પિક છે.
પાવર અને સેફ્ટી
મારુતિ ઈગ્નિસ ફેસલિફ્ટમાં સ્વિફ્ટ અને બલેનોમાં મળનારું બીએસ6 કમ્પ્લાયન્ટ 1.2-લીટર, 4 સિલિન્ડર પેટ્રોલ એન્જિન છે. આ એન્જિન 82 બીએચપી પાવર અને 113 એનએમ પીક ટોર્ક જનરેટ કરે છે. તેમાં 5 સ્પીડ મેન્યુઅલ અને એએમટી ગિયરબોક્સ વિકલ્પ છે. સેફ્ટી માટે મારૂતિ ઇગ્નિસમાં ડ્યુલ-એરબેગ્સ, ISOFIX ચાઇલ્ડ સીટ માઉન્ટ, સીટબેલ્ટ પ્રી-ટેન્શનર્સ અને ઇબીડી સાથે એબીએસ જેવા ફીચર્સ આપવામાં આવ્યા છે.