વર્ષ 2019 પૂરું થયું, આજથી 2020ના આગમન સાથે જ નવી આશાઓ પલ્લવિત થવા લાગી છે. નવા વર્ષમાં નવા પડકારો રાહ જોઈ રહ્યા છે. આજથી શરૂ થયેલા નવા વર્ષમાં રમતોની દુનિયામાં પણ ઘણું બધું બનશે. તમામ રમતોના ખેલાડી આ વર્ષમાં જોશ અને ઝનૂનથી નવો મુકામ સ્થાપિત કરશે. ક્રિકેટથી લઈને ફૂટબોલ સુધી, ઘણી રમતોનાં મોટાં આયોજનો સાથે રમત જગતનો સૌથી મોટો મેળાવડો ઓલિમ્પિક રમતોત્સવ જાપાનમાં પણ યોજાશે. આ સ્થિતિમાં ભારતીય ખેલાડીઓ માટે 2020નું વર્ષ આશાઓનું વર્ષ છે.
ટી-20 વિશ્વકપઃ આ વર્ષે ટી-20 વર્લ્ડકપનું આયોજન થવા જઈ રહ્યું છે, જે વર્ષ 2020નું સૌથી મોટું ક્રિકેટ આયોજન હશે. આ વર્લ્ડકપ ઓસ્ટ્રેલિયામાં રમાશે. ભારતીય ટીમ 2016માં આ કપ જીતવાથી ચૂકી ગઈ હતી અને સેમિફાઇનલમાંથી બહાર ફેંકાઈ ગઈ હતી. આ સ્થિતિમાં કેપ્ટન વિરાટ કોહલી પાસે પહેલી વાર આઇસીસી ટ્રોફી જીતવાની તક છે. આ વિશ્વકપ 18 ઓક્ટોબરથી 15 નવેમ્બર દરમિયાન રમાશે. 16 ટીમ આ વર્લ્ડકપમાં ભાગ લઈ રહી છે. કુલ 45 ટી-20 મેચ રમાશે. મહિલા ટી-20 વિશ્વકપનું આયોજન પણ 21 ફેબ્રુઆરીથી 8 માર્ચ દરમિયાન ઓસ્ટ્રેલિયામાં જ કરાયું છે.
ATP કપ : વર્ષની શરૂઆત ટેનિસ પ્રેમીઓ માટે શાનદાર બની રહેશે. 202ની શરૂઆતમાં વર્ષનું પ્રથમ ગ્રાન્ડ સ્લેમ ઓસ્ટ્રેલિયન ઓપન રમાશે. એ ઉપરાંત ATP કપનું પણ આયોજન થશે. 2020માં નિવૃત્તિ લેવાની જાહેરાત કરનારા ભારતીય દિગ્ગજ ટેનિસ ખેલાડી લિએન્ડર પેસ ATP કપમાં રમશે કે નહીં એ હજુ નક્કી નથી. ઓસ્ટ્રેલિયાનાં ત્રણ શહેરમાં આયોજિત થનાર ATP કપનો શુભારંભ તા. 3 જાન્યુઆરીથી થશે. આ કપમાં 24 ટીમ અને દુનિયાના ટોચના ખેલાડીઓ ભાગ લેશે.
ટોકિયો ઓલિમ્પિક : જાપાનની રાજધાની ટોકિયોમાં આ વર્ષે ઓલિમ્પિકનું આયોજન થશે. ગત ઓલિમ્પિકમાં ભારતીય ખેલાડીઓનું પ્રદર્શન નિરાશાજનક રહ્યું હતું અને ફક્ત બે જ મેડલ ભારતીય ઝોળીમાં આવ્યા હતા, પરંતુ હવે ભારતીય ખેલાડીઓ પાસે પાછલી ભૂલોમાંથી શીખવાની તક છે. દિગ્ગજ ખેલાડીઓ પોતાનો અનુભવ અજમાવશે, જ્યારે યુવા ખેલાડીઓ પાસેથી ઓલિમ્પિકમાં મેડલ જીતવાની મોટી આશાઓ છે. કુલ 33 રમતોની 339 સ્પર્ધાઓમાં બધા દેશના એથલીટ પોતાનો જલવો વિખેરશે. ઓલિમ્પિકની શરૂઆત તા. 24 જુલાઈથી થશે અને તા. 9 ઓગસ્ટે પૂર્ણાહુતિ થશે.
યુરો-2020 : ફૂટબોલ પ્રેમીઓ માટે પણ 2020નું વર્ષ મહત્ત્વપૂર્ણ બની રહેશે. ચેમ્પિયન્સ લીગ સહિત તમામ અન્ય ફૂટબોલ લીગો વચ્ચે યુરોપિયન ફૂટબોલની સૌથી મોટી ટૂર્નામેન્ટ યુરો કપ પણ રમાશે. યુએફા દ્વારા આયોજિત થઈ રહેલી આ ટૂર્નામેન્ટની યજમાની 12 દેશ કરી રહ્યા છે અને કુલ 24 યુરોપિયન ટીમ ભાગ લેશે. ટૂર્નામેન્ટની શરૂઆત 12 જૂનથી થશે અને 12 જુલાઈએ પૂર્ણાહુતિ થશે.