કોલ્ડવેવ / ગુજરાતમાં વર્ષના છેલ્લા દિવસે સૌથી વધુ ઠંડી પડશે, શહેરોનું તાપમાન 10 ડિગ્રીથી નીચે પહોંચ્યુ

• ઉત્તરભારતમાં હિમવર્ષાના કારણે ગુજરાતમાં કોલ્ડ અટેક
• રાજ્યના 6 શહેરમાં તાપમાન 10 ડિગ્રીથી નીચે ગગડ્યું
• નલિયા 6 ડિગ્રી તાપમાન સાથે સૌથી ઠંડુ શહેર રહ્યું

નલિયામાં તાપમાનનો પારો 6 ડિગ્રી સુધી ગગડી ગયો છે. જેના કારણે અહીં લોકોને ઘરની બહાર નીકળવું મુશ્કેલ થઈ ગયું છે. તો બીજી તરફ ભુજમાં સિઝનમાં પ્રથમવાર તાપમાનનો પારો 7.2 ડિગ્રીએ પહોંચી ગયો છે. તો બીજી તરફ રંગીલું રાજકોટ પણ ઠંડુગાર થઈ ગયું છે. 

રાજકોટમાં કડકડતી ટાઢ

રાજકોટમાં 8.3 ડિગ્રી સુધી તાપમાન ગગડતાં લોકો વહેલી સવારે ઠંડી ઉડાડવા માટે ગરમ પીણા અને જોગિંગનો સહારો લઈ રહ્યા છે. 

ડિસા 8.7 ડિગ્રીએ ઠંડુગાર

જ્યારે રાજસ્થાન બોર્ડર પાસે આવેલા ડીસામાં પણ તાપમાનનો પારો 8.7 ડિગ્રીએ પહોંચી ગયો છે. બીજી તરફ દરિયા કિનારાના શહેરોમાં પણ પારો ગગડ્યો છે. કંડલા અને પોરબંદરમાં પારો 9 ડિગ્રી સુધી ગગડી ગયો છે.

ગાંધીનગરનું તાપમાન 10 ડિગ્રી

આ તરફ પાટનગર ગાંધીનગરમાં પણ પારો 10.8 ડિગ્રી સુધી ગગડ્યો છે. તો અમદાવાદ અને ભાવનગરમાં 12 ડિગ્રી સુધી તાપમાન ગગડ્યો છે. જેના કારણે લોકોને ઘરમાંથી બહાર નીકળવું મુશ્કેલ થઈ ગયું છે. બીજી તરફ વહેલી સવારે ધુમ્મસભર્યું વાતાવરણ છવાઈ જાય છે. તો લોકો ઠંડી ઉડાડવા માટે તાપણાનો સહારો લઈ રહ્યા છે.