તહેવારોની સીઝનમાં દેશભરમાં જીવન જરૂરીયાતની ચીજવસ્તુઓના ભાવ આસમાને પહોંચ્યા છે. કમરતોડ મોંઘવારીથી જનતા ત્રાહિમામ પોકારી ગઇ છે. ત્યારે કેન્દ્ર સરકારે પ્લેટફોર્મ ટિકિટના ભાવમાં 200%નો વધારો ઝીંક્યો છે.
અમદાવાદ પ્લેટફોર્મ ટિકિટના ભાવમાં 200%નો વધારો
આજથી અમદાવાદ પ્લેટફોર્મ ટિકિટના નવા દર 30 રૂપિયા
દિવાળીની સિઝનમાં ટ્રાફિક વધુ રહેતા ટ્રાફિક ઘટાડવા નિર્ણય
એક તરફ તહેવારોની સીઝન આવી રહી છે અને એમાંય બીજી બાજુ ચોતરફ મોંઘવારી સતત વધી રહી છે. એવામાં રેલવે સ્ટેશનની પ્લેટફોર્મ ટિકિટના ભાવમાં પણ વધારો કરવામાં આવ્યો છે. મહત્વનું છે કે, સીઝન પ્રમાણે તેમજ માંગને જોતા પ્લેટફોર્મ ટિકિટના ભાવમાં વધારો કરવામાં આવતો હોય છે.
પ્લેટફોર્મ ટિકિટના ભાવમાં આજથી 20 રૂપિયાનો વધારો
વેસ્ટર્ન રેલવે દ્વારા અમદાવાદના રેલવે સ્ટેશન માટે પ્લેટફોર્મ ટિકિટના ભાવમાં તોતિંગ 200%નો વધારો ઝીંકવામાં આવ્યો છે. તમને જણાવી દઇએ કે, અત્યાર સુધી તમે કોઈ સગા-સબંધી કે મિત્ર વર્તુળને રેલવે સ્ટેશને લેવા-મૂકવા જતા લોકોએ પ્લેટફોર્મ ટિકિટ માટે 10 રૂપિયા ચૂકવવા પડતા હતા. જ્યારે હવે તેમાં 20 રૂપિયાનો વધારો કરાયો છે. એટલે કે હવેથી અમદાવાદ રેલવે સ્ટેશન માટે પ્લેટફોર્મ ટિકિટના નવા દર 30 રૂપિયા કરી દેવાયા છે.
દિવાળીની સીઝન માટે 30 રૂપિયા પ્લેટફોર્મ ટિકિટ કરી દેવાઇ
દિવાળીની સીઝનમાં ટ્રાફિક વધુ રહેતો હોવાથી ટ્રાફિક ઘટાડવા માટે આ પ્રકારનો નિર્ણય લેવામાં આવ્યો છે. અત્રે નોંધનીય છે કે, દર વર્ષે સામાન્ય રીતે પ્લેટફોર્મ ટિકિટના ભાવમાં 100થી150%નો વધારો થતો હોય છે. પરંતુ આ વર્ષે માંગ અને બુકિંગને જોતા તંત્રએ દિવાળીની સીઝન માટે 30 રૂપિયા પ્લેટફોર્મ ટિકિટ કરી દીધી છે.
ટ્રેનોના પણ ભાડા વધ્યાં
ઉલ્લેખનીય છે કે, ગુરૂવારના વધુ એક અહેવાલ અનુસાર, ભારતીય રેલવેએ દેશની 130 મેલ-એક્સપ્રેસ ટ્રેનોને સુપરફાસ્ટનું ટેગ આપીને તમામ શ્રેણીઓના ભાડામાં જંગી વધારો કરી દેવાયો છે. ટ્રેનોના AC-1 અને એક્ઝિક્યુટીવ શ્રેણીમાં પ્રતિ મુસાફર 75 રૂપિયા, AC-2 અને 3, ચેરકારમાં 45 રૂપિયા અને સ્લીપર શ્રેણીમાં 30 રૂપિયા પ્રતિ યાત્રી ભાડું વધારી દેવાયું છે. આ પ્રકારે મુસાફરને એક પીએનઆરના બુકિંગમાં AC-1માં 450 રૂપિયા, AC-2 અને 3માં 270 અને સ્લીપરમાં 180 રૂપિયા મુસાફરે વધારાની ચૂકવણી કરવી પડશે. આ વ્યવસ્થા 1 ઓક્ટોબરથી લાગુ કરી દેવાઈ છે.