ભૂજ NDPS વિશેષ કોર્ટે આરોપીઓના 12 દિવસના રિમાન્ડ કર્યા મંજૂર
ગઈકાલે એક પાકિસ્તાની બોટને 200 કરોડની કિંમતના 40 કિલો ડ્રગ્સ સાથે ભારતીય જળસીમામાંથી ઝડપી લેવામાં આવી હતી. ત્યારે આ પ્રકરણમાં સંડવાયેલા 6 પાકિસ્તાની શખ્સોને આજે કોર્ટમાં રજૂ કરવામાં આવ્યા હતા. ATS દ્વારા ડ્રગ્સ માફિયાઓના રિમાન્ડની માંગ સાથે ભૂજની NDPS કોર્ટમાં રજૂ કરાયા હતા. જેમાં NDPS વિશેષ કોર્ટ દ્વારા કેસની ગંભીરતાને ધ્યાને લઇને આરોપીઓના 12 દિવસના રિમાન્ડ મંજૂર કરાયા છે. જેને લઇને રિમાન્ડ દરમિયાન આ મામલે નવા ખુલાશા થાય તો નવાઈ નહીં !
શું હતું સમગ્ર પ્રકરણ ?
ગુજરાત ATSએ ગઇકાલે કોસ્ટગાર્ડ સાથે મળીને કરોડોનું ડ્રગ્સ ઝડપી પાડ્યું હતું. ભારતીય કોસ્ટ ગાર્ડ અને ગુજરાત એટીએસએ સંયુક્ત ઓપરેશન પાર પાડી ભારતીય જળસીમાની અંદર 6 માઈલ અંદર એક પાકિસ્તાની બોટને 200 કરોડની કિંમતના 40 કિલો ડ્રગ્સ પકડી પાડ્યું હતું. ICGની બે ફાસ્ટ એટેક બોટોએ ગુજરાતના જખૌ કિનારે 33 નોટિકલ માઈલ દૂર પાકિસ્તાની બોટ ઝડપી પાડી હતી. જેમાં તપાસ દરમિયાન પંજાબની જેલમાં બંધ નાઈઝિરિયને આ ડ્રગ્સનો જથ્થો મંગાવ્યો હોવાનું જાણવા મળી રહ્યું છે. આ સંપૂર્ણ નેટવર્ક જેલમાંથી ચાલી રહ્યું હોવાનું પણ ખૂલ્યું હતું.
ગુજરાત પોલીસે એક વર્ષમાં 6500 કરોડનું ડ્રગ્સ ઝડપ્યું છે: હર્ષ સંઘવી
અગાઉ એક નિવેદનમાં હર્ષ સંઘવીએ જણાવ્યું હતું કે 'ગુજરાત પોલીસે એક વર્ષમાં 6500 કરોડનું ડ્રગ્સ પકડ્યું છે. જેનાથી પાકિસ્તાન-અફઘાનિસ્તાન જેવા દેશોને પણ ઝટકો લાગ્યો છે. કલકતામાં DRI સાથે મળીને 39 કિલો 280 કરોડનું ડ્રગ્સ ઝડપાયું છે. આ ડ્રગ્સ કોઈ સામેથી નથી મૂકી જતું, ગુજરાત પોલીસ સાહસ સાથે ડ્રગ્સ પકડે છે એટલે પકડાય છે, ગુજરાત જ નહીં અનેક રાજ્યોનું ડ્રગ્સ નેટવર્ક પોલીસે તોડ્યું છે. ગુજરાત પોલીસ કેન્દ્રની એજન્સી સાથે મળીને કામગીરી કરી રહી છે. ગુજરાત ATS એજન્સીઓ સાથે મળી પાકિસ્તાન બોર્ડર ઉપર કામગીરી કરી રહી છે.'