USAના નેવાડા રાજ્યમાં એરિયા ૫૧ નામના એક વિવાદાસ્પદ પ્રતિબંધિત વિસ્તારમાં તારીખ ૨૦ સપ્ટેમ્બરના રોજ એક સાથે ૨૧ લાખ લોકો ઘુસણખોરી કરવાની યોજના બનાવી રહ્યા છે. આ લોકોનો આક્ષેપ છે કે અમેરિકી સરકારે વર્ષોથી આ વિસ્તારમાં પરગ્રહવાસીઓ એટલે કે એલીયન્સને છુપાવી રાખ્યા છે. જાણો સંપૂર્ણ માહિતી સરળ ભાષામાં.
એક ફેસબુક ઈવેન્ટથી મોટી સંખ્યામાં લોકો આ યોજનામાં જોડાયા
પ્રતિબંધિત વિસ્તારમાં ઘુસશો તો પરિણામો ભોગવવા તૈયાર રહેજો. અમેરિકી સેનાની ચેતવણી
હોટલો અને ખાણીપીણીના કેન્દ્રો સહેલાણીઓ વધતા રોકડી કરી રહ્યા છે
શું છે એરિયા ૫૧?
એરિયા ૫૧એ USAના નેવાડા રાજ્યમાં લાસવેગાસ શહેરથી ૧૩૪ કિમી દુર લિંકન કાઉન્ટીમાં આવેલો એક ગુપ્ત એરપોર્ટ વિસ્તાર છે. ૧૯૫૫થી આ વિસ્તારમાં ચાલતી પ્રવૃતિઓ વિષે કોઈ પણ પ્રકારની માહિતી આપવાનું અમેરિકી સરકારે ટાળ્યું છે. ૨૦૧૩માં કોર્ટમાં એક કેસ થયા બાદ અમેરિકી સરકારે સ્વીકાયું હતું કે આ વિસ્તારમાં અમેરિકી વાયુસેનાના જવાનોને ટ્રેઈનીંગ અને નવી ટેકનોલોજીનાં હથિયારોનું પરીક્ષણ કરવામાં આવે છે. આ વિસ્તારને હાઈલી કલાસિફાઈડ ગણીને અહી ઘુસણખોરી કરતા કોઈ પણ વ્યક્તિની ધરપકડ કરવાનો આદેશ અપાયેલો છે.
શું છે અફવાઓ?
અમેરિકી નાગરિકોનો માનવું છે કે આ વિસ્તારમાં સરકારે વર્ષોથી પરગ્રહવાસીઓ એટલે કે એલીયન્સને છુપાવી રાખ્યા છે અને સરકાર આ વાત લોકો સુધી બહાર પાડવા માંગતી નથી. રહસ્યમયી રીતે આ વિસ્તારની આસપાસ UFO એટલે કે ઉડતી રકાબી દેખાવાના ઘણા કિસ્સાઓ સામે આવ્યા છે. કેટલાક લોકોનો આક્ષેપ છે કે અહી ટાઈમ ટ્રાવેલ કરવાના યંત્રો વિષે શોધખોળ ચાલી રહી છે તો કેટલાકના મતે અહી વાતાવરણણે કંટ્રોલ કરવાની ટેકનોલોજી વિષે સંશોધન ચાલે છે. આશ્ચર્યજનક રીતે અમેરિકી સરકારે ક્યારેય આ વાતોનું ખંડન કર્યું નથી.
ફેસબુક પર બની ઘુસણખોરી કરવાની યોજના
ફેસબુક ઉપર જુલાઈ ૨૦૧૯માં એક યુઝરે ફક્ત મજાક ખાતર એક ઇવેન્ટ બનાવી જેમાં ૨૦ સપ્ટેમ્બરે મોટી સંખ્યામાં લોકોને એરિયા ૫૧માં ઘુસી જવાનું આહ્વાન કરવામાં આવ્યું હતું. તેમાં લખ્યું હતું કે જો મોટી સંખ્યામાં લોકો હશે તો કોઈ તેમને રોકી નહિ શકે. અંદર પહોચીને તેઓ એરિયા ૫૧ના રહસ્યો બહાર પાડી શકશે. આ ઇવેન્ટ અતિશય પોપ્યુલર બની ગઈ અને જોતજોતામાં ૨૧ લાખ લોકો આ યોજનામાં જોડાઈ ગયા. ઇવેન્ટ બનાવનાર યુઝર આ યોજનામાંથી ખસી ગયો છે અને તેણે વાતનું ખંડન કરતા જણાવ્યું છે કે આ ફક્ત એક મજાક માટે બનાવેલું પેજ હતું. એરિયા ૫૧ની આસપાસ હોટલ, મોટલ ટેક્સી સેવાઓ બુક થવા માંડી છે જે બતાવે છે કે અલગ અલગ પ્રદેશોથી લોકો આ યોજનામાં જોડાવા આવી પહોચ્યા છે.
અમેરિકી સેના અને FBIની ચેતવણી; ઘુસણખોરી કરશો તો ગંભીર પરિણામો આવશે
એરફોર્સની પ્રવક્તા લોરા મેકએન્ડ્ર્યુએ અમેરિકી મીડિયા વોશિંગટન પોસ્ટને જણાવ્યું હતું કે એરિયા 51 એ US એર ફોર્સ એક ઓપન ટ્રેઈનિંગ રેંજ છે જ્યાં અમેરિકી જવાનો તાલીમ લે છે. આ વિસ્તારની ગુપ્તતા અમેરિકી નાગરિકોની સુરક્ષા માટે રાખવામાં આવી છે. આ વિસ્તારમાં ઘુસણખોરી કરતા કોઈ પણ વ્યક્તિ સામે સખત પગલા ભરતા આ વિસ્તારના સુરક્ષા દળો અચકાશે નહિ.
બે ડચ નાગરિકો જેલભેગા થયા
એરિયા 51માં ગેરકાયદેસર ઘુસણખોરી કરી રહેલા ૨૦ અને ૨૧ વર્ષના ૨ ડચ નાગરીકોની ધરપકડ કરીને તેમને જેલમાં પુરવામાં આવ્યા હતા.
હોટલ અને ખાણીપીણીના કેન્દ્રોને ઘી કેળા
આ ઇવેન્ટ પ્રખ્યાત થઇ જતા અલગ અલગ શહેરો, રાજ્યો અને દેશોમાંથી લોકો એકઠા થવાના છે. આ વિસ્તારની આસપાસની હોટલો અને ટેક્સી સર્વિસે તેમના ભાવો વધારી દીધા છે. કેટલાક લોકો તો આ દિવસે કેટલા લોકોને જેલ થશે તે આંકડા ઉપર સટ્ટો લગાવી રહ્યા છે. અન્ય એક ઇવેન્ટ ઓર્ગેનાઈઝરે આ વિસ્તારની નજીકમાં એક એલિયન સેલિબ્રેશનનો મ્યુઝીક કોન્સર્ટ યોજી દીધો છે જેમાં દેશવિદેશના સંગીતકારો આવવાના છે.
શું ખરેખર એરિયા 51માં એલિયન્સ છે?
USA સરકાર એરિયા 51માં એલિયન્સ સંગ્રહીને બેઠી હોય તે વાત લોજીકલી હજમ થાય તેવી નથી. આ નવરા લોકોના મનની પેદાશ જેવો વિચાર વધુ લાગે છે. ભારતે પણ તેના ઘણા આર્મી બેઝની ગુપ્તતા જાળવી રાખી છે પણ ભારતીયો આવી રીતે આ બેઝમાં ઘુસી જવાની યોજના નથી બનાવતા. આર્મી બેઝને આ રીતે ઘેરી વળવો એ દુસાહસ સાબિત થઇ શકે છે. BBCના એક અહેવાલ મુજબ એક મજાકના કારણે શરુ થયેલું આ કુતૂહલ વ્યાપક પ્રમાણમાં હિંસાને નોતરી શકે છે.