દુઃખદ / ગુજરાતમાં બે વર્ષમાં એક DySP, બે PSI સહિત ૨૦ પોલીસ કર્મચારીનો આપઘાત

• બે વર્ષમાં એક DySP, બે PSI સહિત ૨૦ પોલીસ કર્મચારીનો આપઘાત
• આપઘાત કરવા પાછળ કામનું ભારણ જવાબદાર હોવાનું પણ જાણવા મળ્યુ 
• ઘરેલુ ઝઘડાને કારણે પણ આત્મહત્યા કરે છે જવાન

પોલીસ ખાતામાં ઉપરી અધિકારીઓ નાના કર્મચારી તેમજ અધિકારીઓ ઉપર શિસ્તના નામે ત્રાસ ગુજારતા હોવાના અનેક કિસ્સાઓ સામે આવ્યા છે. જેના કારણે કોન્સ્ટેબલ, હેડ કોન્સ્ટેબલ, પીએસઆઇ સહિતના પોલીસ કર્મચારીઓ આત્મહત્યા કરી લેતા હોય છે. પોલીસની નોકરી એટલે સતત ૨૪ કલાકની નોકરી અને તેની સાથે ભરપુર શારીરિક અને માનસિક દબાણ રહેલું હોય છે. પોલીસ કર્મચારી અને અધિકારીઓએ સતત એક પ્રકારના માનસિક તણાવમાં રહીને પોતાની કારકિર્દીને આગળ ધપાવવાની હોય છે. જો કે આ નોકરીમાં કેટલાક લોકો પોતે નિષ્ફળ રહેશે તેવા ડરથી પોતાના જીવનને ટૂંકાવી નાખતાં હોવાના અનેક બનાવો બને છે. 

આત્મહત્યા કરી જીવન ટૂંકાવનાર પોલીસ કર્મચારીઓ
•    જાન્યુઆરી ૨૦૨૦માં ઉકાઇ પોલીસ સ્ટેશનના કોન્સ્ટેબલ અવિનાશ ગામિતની આત્મહત્યા 
•    ફેબ્રુઆરી ૨૦૨૦માં ખાડિયા પોલીસ સ્ટેશનના કોન્સ્ટેબલ ભૂરાભાઇ પગીએ ગળે ફાંસો ખાધો
•    મે ૨૦૨૦માં ડાકોર પોલીસ સ્ટેશનના કોન્સ્ટેબલે ગળે ફાંસો ખાધો
•    મે ૨૦૨૦માં અમદાવાદના જે ડિવિઝનના કોન્સ્ટેબલ રવિ કાળોતરાએ ગળે ફાંસો ખાઇને આત્મહત્યા કરી 
•    ઓગસ્ટ ૨૦૨૦માં જામનગરના બી ડિવિઝનના કોન્સ્ટેબલે ભરત જાદવે પત્ની સાથે ગળે ફાંસો ખાધો
•    ડિસેમ્બર ૨૦૨૦માં સુરતનાં મહિલા પીએસઆઈએ ગોળી મારી જીવન ટૂંકાવ્યું.
•    ઓક્ટોબર ૨૦૨૦માં ભરૂચના વાલિયા પોલીસ સ્ટેશનમાં કોન્સ્ટેબલ પ્રવીણ પાડવીએ ગળે ફાંસો ખાધો
•    જાન્યુઆરી ૨૦૧૯માં ગાંધીનગરમાં પોલીસ કોન્સ્બેટલે સર્વિસ રિવોલ્વરથી ગોળી મારી આત્મહત્યા કરી 
•    માર્ચ ૨૦૧૯  છોટા ઉદેપુર જિલ્લામાં ડીવાયએસપી મૂળરાજસિંહ વાળાએ આપઘાત કર્યો.
•    એપ્રિલ ૨૦૧૯માં વટવા પોલીસ સ્ટેશનના કોન્સ્ટેબલ લખધીરસિંગે બ્રિજ પરથી પડતું મૂકીને આપઘાત કર્યો 
•    જૂન ૨૦૧૯માં કાલુપુર પોલીસ સ્ટેશનની કોન્સ્ટેબલ ફાલ્ગુની શ્રીમાળીએ આપઘાત કર્યો 
•    જુલાઇ ૨૦૧૯માં ચાંદખેડામાં પોલીસ કોન્સ્બેટલ જગદીશ પરમારે ગળે ફાંસો ખાધો 
•    જુલાઇ ૨૦૧૯માં રાજકોટ યુનિવર્સિટી પોલીસ સ્ટેશનના ફરજ બજાવતા કોન્સ્ટેબલ ખુશબૂ અને રવિરાજે આપઘાત કર્યો 
•    સપ્ટેમ્બર ૨૦૧૯માં નવસારીના પીએસઆઈ એન.સી. ફિનાવિયાએ ગોળી મારી આપઘાત કર્યો
•    ડિસેમ્બર ૨૦૧૯માં જૂનાગઢના મરિન પોલીસ સ્ટેશનના બે પોલીસ કોન્સ્ટેબલ સાજિદ નાગોરી, અને જયદીપ પરમારે આત્મહત્યા કરી 
•    ડિસેમ્બર ૨૦૧૯માં રાજકોટ પોલીસ હેડક્વાર્ટરમાં આશિષ દવેએ ગળે ફાંસો ખાધો