ચીનના શંઘાઈ શહેરમાં કોરોનાની ચોથી લહેર શરુ થતા દુનિયામાં ટેન્શનમાં આવી છે.
ચીનમાં શરુ થઈ કોરોનાની ચોથી લહેર
શંઘાઈમાં લાગ્યું 2 વર્ષનું સૌથી મોટું કોરોના લોકડાઉન
2 કરોડ લોકો ઘરોમાં કેદ, ફક્ત કોરોના ટેસ્ટ માટે બહાર જવાની છૂટ
શંઘાઈમાં કોરોનાના કેસ વધી રહ્યાં છે
કોરોના શરુ કરવાનો જે દેશ પર આરોપ લાગ્યો છે તેવા ચીનમાં કોરોનાની નવી લહેર શરુ થતા જ દુનિયામાં ફફડાટ વ્યાપ્યો છે.ચીનના બીજા મોટા શહેર શંઘાઈમાં ઓમિક્રોનના કેસ વધતા તાબડતોબ સૌથી મોટું લોકડાઉન જાહેર કરી દેવાયું છે તેને કારણે 2 કરોડ લોકો ઘરોમાં કેદ થયા છે. ત્યાં સુધી કે તંત્ર દ્વારા લોકોને મોર્નિંગ વોકની પણ મંજૂરી આપવામાં નથી આવી. લોકોને ફરજિયાતપણે ઘરોમાં રહેવાનું કહેવામાં આવ્યું છે.
કડક લોકડાઉનમાં લોકોને ફક્ત એક કામ માટે બહાર જવાની પરમિશન
શંઘાઈ શહેરના લોકોને ફક્ત કોવિડ ટેસ્ટ માટે બહાર જવાની પરમિશન છે. આ સિવાયના બીજા કોઈ પણ કામ માટે તેમને બહાર જવાની મંજૂરી અપાઈ નથી. તંત્ર દ્વારા જારી નિયમો અનુસાર લોકોને તેમના એપાર્ટમેન્ટ કે ફ્લેટની ખુલ્લી જગ્યાએ જવાની પણ પરમિશન નથી, તેમને ઘરોમાં જ રહેવાનો સ્પસ્ટ આદેશ છે. ઝીરો કોવિડ પોલિસી હેઠળ ચીન સરકાર દ્વારા આવો નિર્ણય લેવાયો છે.
ચીનમાં શરુ થઈ ચોથી લહેર
ચીનમાં હાલમાં કોરોનાની ચોથી લહેર ચાલી રહી છે. એક કેસની સ્થિતિમાં પણ કડક લોકડાઉન સહિતના પ્રતિબંધો લાગુ પાડી દેવાય છે. શંઘાઈમાં દિનપ્રતિદિન કોરોના કેસમાં ઉછાળો આવી રહ્યો છે.
આ કારણસર દુનિયા માટે વધી ચિંતા
ચીનની કડક લોકડાઉન નીતિને કારણે વિશ્વની અર્થવ્યવસ્થા અને નાણાકીય બજારો મુશ્કેલીમાં જઈ રહ્યા છે. ત્યારે પણ રશિયા અને યુક્રેન વચ્ચે યુદ્ધ ચાલી રહ્યું છે અને વિશ્વમાં મોંઘવારી આસમાને છે. ચીને શાંઘાઈમાં વ્યાપક પરીક્ષણ શરૂ કર્યું છે. ચીનની આ જાહેરાતથી સમગ્ર વિશ્વમાં ખળભળાટ મચી ગયો છે. તેલના ભાવમાં ધરખમ ઘટાડો થયો છે. વેપારીઓને ડર છે કે લોકડાઉનથી માંગ ઘટી શકે છે. ચીન એક મુખ્ય તેલ આયાતકાર છે અને દરરોજ 11 મિલિયન બેરલ તેલ ખરીદે છે.