સુરતના બારડોલી નગરમાં ભૂતમામા વિસ્તારમાં જીવિત વાયર નીચે પડતા 2 મહિલાને વીજ કરંટ લાગતા મોત નિપજ્યાં છે.
Share
સુરતના બારડોલી નગરમાં વીજ કરંટથી 2 મહિલાના મોત
ભૂતમામા વિસ્તારમાં જીવિત વાયર નીચે પડતા આ દુર્ઘટના ઘટી
શું બંને મૃતક મહિલાના પરિવારજનોને કોઇ વળતર મળશે?
સુરતના બારડોલી નગરના ભૂતમામા વિસ્તારમાં બે મહિલાઓ ખેતરમાં જ્યારે મશરૂમ તોડવા ગઇ એ દરમ્યાન જીવિત વીજતાર તૂટીને નીચે પડતા તેઓને કરંટ લાગ્યો. તૂટેલા વીજતારને બંને મહિલાઓ જ્યારે હટાવવા ગઇ એ દરમ્યાન બંને મહિલાઓને વીજ કરંટ લાગતા તેઓના મૃત્યુ થયા છે. આથી, આ ઘટનાની જાણ પોલીસને કરવામાં આવતા પોલીસ તુરંત ઘટનાસ્થળે પહોંચી ગઇ અને આ મામલે પોલીસ દ્વારા આગળની કાર્યવાહી હાથ ધરાઇ.
વાયરને કવર કરીએ તો આવી ઘટનાઓ અટકાવી શકાય: એન્જિનિયર
મહત્વનું છે કે, ચોમાસામાં અનેકવાર આવી ઘટનાઓ સામે આવતી હોય છે. ત્યારે શું તંત્રની કોઇ જવાબદારી જ નથી કે આવી ઘટનાઓને બનતા કઇ રીતે અટકાવવી. ત્યારે આ અંગે ડેપ્યુટી એન્જિનિયર કેશવભાઇને પૂછવામાં આવ્યું ત્યારે તેઓએ જણાવ્યું કે, 'પવન સાથે ભારે વરસાદ આવવાથી નારિયેળીના ઝાડ પર જાળી પડતા વાયર તૂટતા વાયર નીચે પડ્યા અને બાદમાં આ અકસ્માત સર્જાયો.' તેઓએ જણાવ્યું કે, 'જો ખુલતા વાયરના બદલે એરિયલ કન્ડક્ટ વાયર રાખીએ તો આવી ઘટનાઓ અટકાવી શકાય. પણ હજુ ખેતીવાડી વિસ્તારમાં એ બાકી છે.' ત્યારે આ મામલે જ્યારે એમ કહેવામાં આવ્યું કે, શા માટે ખેતીવાડી વિસ્તારમાં આ પ્રક્રિયા હજુ બાકી છે, બે મહિલાઓ મોતને ભેટી છે. ત્યારે તેઓએ કહ્યું કે, 'ખેતરની ફરતે ફેન્સિંગ કર્યું છે છતાં આ બંને બહેનોએ ત્યાં પ્રવેશ કર્યો હતો.'
પરંતુ અહીં સૌથી મોટો પ્રશ્ન એ થાય છે કે, આ રીતે તૂટેલા વીજતારને હટાવવા જતા બે મહિલાઓના વીજકરંટથી જે મોત થયા છે તેની માટે જવાબદાર કોણ? શા માટે આ પ્રકારે વીજતારો ખુલ્લા મુકવામાં આવે છે? શા માટે આવા વાયરોને કવર નથી કરવામાં આવતા? શું આવી કોઇ ઘટના બને તેની તંત્ર રાહ જોઇને બેસે છે?'
જુઓ આ અંગે ધારાસભ્યએ શું પ્રતિક્રિયા આપી?
આ ઘટનામાં જ્યારે VTV NEWSએ ધારાસભ્ય ઇશ્વરભાઇ પરમારને ફોન કર્યો ત્યારે પહેલાં તો તેઓએ આ ઘટના અંગેનો સવાલ પૂછતાની સાથે જ ફોન કાપી નાખ્યો હતો. પરંતુ બાદમાં જ્યારે તેઓ જોડાયા ત્યારે તેઓએ નિવેદન આપતા જણાવ્યું કે, 'આ બે બહેનો સિતાડોડીના ફુલ અને મશરૂમ જેવી વસ્તુઓની શોધ માટે ખેતી વિસ્તારમાં ગયા હતા અને નારિયેળીના જે ડાળા કહેવાય તે હળવા દબાણવાળી વીજલાઇન પર પડતા વીજલાઇન તૂટી ગઇ હતી. જેના લીધે એક બહેનને કરંટ લાગતા બીજા બહેન જ્યારે તેમને બચાવવા ગયા. આથી, બીજા બહેનને પણ વીજકરંટ લાગતા આ દુ:ખદ ઘટના ગઇકાલે રાત્રે બની હતી. આ અંગે વીજતાર કેમ આટલાં બધા નબળા હતા તે અંગે અમારા બારડોલીના DGVCL ટાઉનના વસાવા જોડે પણ મારે વાત થઇ હતી. હાલમાં તેઓએ આ બાબતે યોગ્ય દિશામાં તપાસ હાથ ધરી રહ્યાં છે.'
વધુમાં તેઓએ જણાવ્યું કે, 'આ બંને મહિલાઓ ગરીબ પરિવારની હતી અને ગઇકાલે રાત્રે મને જ્યારે 10:30 વાગ્યે આ અંગેની જાણ થઇ ત્યારે DGVCL અને પોલીસને પણ આ અંગે જાણ કરી. બારડોલીથી સરદાર હોસ્પિટલે તેમના મૃતદેહને મોકલવામાં આવ્યા અને સવારે PMની કાર્યવાહી કરી.' પરંતુ ધારાસભ્યએ આ મામલે આ ગરીબ પરિવારને ક્યારે ન્યાય મળશે તે અંગે તેઓએ કોઇ પણ પ્રકારનું નિવેદન નથી આપ્યું.' ત્યારે આ મામલે અનેક સળગતા સવાલો ઉભા થઇ રહ્યાં છે. જેવાં કે....
વીજવિભાગની આવી ઘોર બેદરકારી કેમ ચલાવી લેવાય?
કોની બેદરકારીથી આ બે મહિલાનું મોત થયુ?
આ બે મહિલાના મોત માટે કોણ જવાબદાર?
આ મહિલાના મોત માટે જવાબદાર લોકો વિરુદ્ધ ક્યારે કાર્યવાહી થશે?
