છત્તીસગઢના કાંકેર જિલ્લામાં ગઇ કાલે રાત્રે નક્સલીઓ અને પોલીસની વચ્ચે અથડામણ થઇ, જેમાં બંને તરફથી સેંકડો રાઉન્ડ ફાયરિંગ કરાયું. પોલીસ અને નક્સલીઓ વચ્ચે ચાલેલી આ અથડામણમાં પોલીસે બે યુનિફોર્મધારી નક્સલીઓને ઠાર માર્યા છે. ઘટનાસ્થળેથી પોલીસને કેટલાંક હથિયાર પણ મળ્યાં છે.
આજે વહેલી સવારે રાજ્ય પોલીસની સ્પેશિયલ ટીમ ડીઆરજીના કાંકેરના ટાડોકી વિસ્તારમાં સર્ચ ઓપરેશન ચલાવી રહી હતી. આ દરમિયાન નક્સલીઓએ ટીમ પર ફાયરિંગ કરવાનું શરૂ કર્યું. જવાબી કાર્યવાહીમાં સુરક્ષાદળોએ બે નક્સલીઓને ઠાર માર્યા છે. પોલીસને શંકા છે કે તે વિસ્તારમાં વધુ નક્સલી છુપાયા હોઇ શકે છે. આ કારણે સર્ચ ઓપરેશન ચલાવાઇ રહ્યું છે.
નક્સલ વિરોધી અભિયાનના ડીઆઇજીપી પી. સુંદરરાજે જણાવ્યું કે પોલીસને કાંકેરના ટાડોકી ક્ષેત્રના મુરનાર ગામની આસપાસ નક્સલી હલચલની જાણકારી મળી હતી. ત્યારબાદ સર્ચ ઓપરેશન ચલાવવામાં આવ્યું હતું. બંને તરફથી ફાયરિંગ શરૂ થયું.
સુરક્ષાદળોએ બે નક્સલીઓને મોતને ઘાટ ઉતાર્યા. કેટલાક નક્સલી ઘટનાસ્થળેથી ભાગવામાં સફળ રહ્યા. પોલીસે ચાર હથિયાર જપ્ત કર્યાં છે. આ પહેલાં છત્તીસગઢના બસ્તર જિલ્લામાં નક્સલીઓએ પોલીસના એક બાતમીદારની હત્યા કરી હતી.