દુર્ઘટના / બનાસ નદીમાં તરવા પડતાં પહેલા સાચવજો! વધુ બે યુવકો ડૂબ્યાં, છેલ્લા બે દિવસમાં 6 લોકોને તાણી ગઇ

• બનાસકાંઠાની બનાસ નદીમાં વધુ બે યુવકો ડૂબ્યા 
• કાંકરેજના ઉંબરી ગામ પાસે બે યુવકો ડૂબ્યા 
• નદીમાં ન્હાવા પડેલા યુવકો સાથે બની દુર્ઘટના 

રાજ્યમાં મેઘો ધોધમાર વરસ્યો. નદીઓ અને ડેમોમાં નવા નીરની આવક થવા પામી છે. વળી આ વખતે તો ઉત્તર ગુજરાતમાં બરાબરનો વરસાદી માહોલ જામ્યો. ખાસ કરીને બનાસકાંઠામાં તો મેઘો ધોધમાર વરસ્યો. તેવામાં બનાસ નદી અને દાંતીવાડા ડેમમાં પાણીની આવક થવા પામી છે. ત્યારે ફરી એકવાર યુવકો ડૂબ્યા હોવાની વાત સામે આવી છે. 

બનાસ નદીમાં બે યુવકો ડૂબ્યા

બનાસકાંઠાની બનાસ નદીમાં વધુ બે યુવકો ડૂબ્યા હોવાનું સામે આવ્યું છે. કાંકરેજના ઉંબરી ગામ પાસે બે યુવકો ડૂબી ગયા. નદીમાં ન્હાવા પડેલા બે યુવાનોના મોત થતા પરિવારમાં શોકની લાગણી ફરી વળી છે. મહત્વનું છે કે વરસાદી માહોલ હોવાને કારણે નદીઓમાં જળસ્તર વધારે જ હોવાનું. ત્યારે આવા સમયે નદીમાં ન્હાવા પડવુ એ જોખમથી ભરેલુ છે.. છેલ્લા બે દિવસમાં બનાસ નદીમાં કુલ 6 વ્યક્તિઓના ડૂબવાથી મોત નીપજ્યા. 

ડીસાના જુનાડીસા વિસ્તારમાં નદીમાં ડૂબ્યા 3 યુવકો 

આ અંગે જાણવા મળતી વિગત અનુસાર બનાસકાંઠા જિલ્લાના ડીસાના જુનાડીસા વિસ્તારમાં નદીમાં 3 યુવકો ડૂબ્યાં હોવાનું સામે આવ્યું હતું. ભારે વરસાદને લઇને નદીમાં  પુર આવતા યુવાનો નદી જોવા ગયા હતા આ દરમિયાન નદીમાં ન્હાવા ગયેલા 3 યુવકો ડૂબ્યા હોવાની આશંકા વ્યક્ત કરાઇ રહી છે. જે ઘટનાની જાણ થતાં સ્થાનિક મામલતદાર અને TDO સહિતની ટિમના આગેવાનો દોડી આવ્યા હતા  અને સ્થાનિક તરવૈયાઓની મદદથી યુવકોને શોધવા પ્રયાસ હાથ ધરવામાં આવ્યા હતા.