ગોરખધંધો / રાજકોટમાં ગોરખધંધાનો પર્દાફાશ, હૉંગકૉંગથી ઑનલાઈન મંગાવ્યું હતું 1 લાખનું મશીન

• રાજકોટમાં ગર્ભ પરીક્ષણ મામલે તપાસ તેજ 
• વધુ 2 આરોપીઓની ધરપકડ 
• સસ્તામાં મશીન મંગાવી મોંધામાં વેચતા

રાજકોટમાંથી ઝડપાયેલા ગર્ભ પરીક્ષણના ગોરખધંધાના કેસમાં વધુ 2 આરોપીઓની ધરપકડ થઈ છે. આ સાથે સૌથી મોટો ખુલાસો ગર્ભ પરીક્ષણ કરવાના મશિનને લઈ થયો છે. ગર્ભ પરીક્ષણના કાળાકામ માટે સ્પેશિયલ હોંગકોંગથી રૂપિયા 1 લાખમાં મશિન મગાવવામાં આવ્યું હતું. અને આ ગોરખધંધાના માધ્યમથી નાણા કમાવવાની કામગીરી ચાલી રહી હતી.

મહત્વનું છે કે, તંત્ર સામે પણ સવાલો ઉભા થઈ રહ્યા છે. રાજકોટ જેવા મેગા સિટીમાં તમામ પ્રકારના સર્વેલેન્સ હોવા છતાં આ પ્રકારે ગર્ભ પરીક્ષણનો ધંધો ચાલી રહ્યો હતો. SOGએ 2 આરોપીઓને ઝડપીને વધુ કાર્યવાહી હાથ ધરી છે. આરોપીઓમાં ભૌતિક ઘાડિયા અને અજય જાવીયાની SOGએ ધરપકડ કરી છે. ઓનલાઇન વેબસાઈટ પરથી ગર્ભપરિક્ષણનું મશીન મંગાવાયું હતું. રૂ.1 લાખનું મશીન મંગાવીને રૂ.2.25 લાખમાં નર્સને વહેચાયું હતું.

જાણો શું છે સમગ્ર મામલો

રાજકોટમાં ગર્ભ પરીક્ષણના રેકેટનો મોટા પાયે પર્દાફાશ થયો છે. શહેરના રૈયારોડ પર આવેલ શિવપરા સોસાયટીના એક મકાનમાં આ રેકેટ ચાલતું હતું. જે મામલે પોલીસને જાણ થઈ હતી. જેથી પોલીસે ત્યા એક કોન્સ્ટેબલને ડમી ગ્રાહક બનાવીને મોકલ્યો હતો. જ્યા પોલીસને બાતમી ખરી નીવડી હતી. 

સમગ્રા મામલે એક મહિલાની ધરપકડ 

SOGની ટીમને ત્યાથી ગર્ભપાતના સાધનો અને દવાનો જથ્થો પણ મળી આવ્યો હતો અને આ સમગ્ર મામલે પોલીસે એક સરોજ ડોડીયા નામની મહિલાની ધરપકડ કરી હતી. જે ગર્ભ પરીક્ષણ અને ગર્ભપાત કરવાતી હતી. જેથી મહિલાને તેની કરતૂતને કારણે આજે જેલના સળીયા ગણવાનો વારો આવ્યો છે. 

મનપા અધિકારી બન્યા ફરિયાદી 

આ સમગ્ર મામલે મનપા આરોગ્ય અધિકારી લલિત વાજા પોતે જ ફરિયાદી બન્યા હતા. પોલીસે મહિલાની ધરપકડ કરી તેની પૂછપરછ આરંભી ત્યારે સામે આવ્યું કે તે ગર્ભપરીક્ષણ માટે 18 હજાર રૂપિયા લેતી હતી. જ્યારે ગર્ભપાત કારવાના તે 20 હજાર રૂપિયા લેતી હતી. 

એક મહિલા ફરાર 

જે મહિલાની ધરપકડ કરવામાં આવી તેની સાથે બીજી પણ એક મહિલા હતી. જે મુખ્ય સૂત્રધાર છે. જોકે તેને પોલીસની જાણ થઈ જતાં ફરાર થઈ ગઈ છે. સાથે જ સોનોગ્રાફીર માટે આવેલી એક મહિલા પણ ઘટનાસ્થળેથી ફરાર થઈ ગઈ છે. જોકે આ ઘટાનાને લઈને આસપસાના વિસ્તારોમાં ચકચાર મચી જવા પામી છે.