છેતરપિંડી / "હું CBIનો ડિરેક્ટર છું" ; ટેક્સ અધિકારીઓને આ ધમકી આપનાર બે દિલ્હીમાં દબોચી લેવાયા

• ત્રણ કંપની સામે તપાસ ચાલી રહી છે
• GST સુપ્રિન્ટેન્ડેન્ટ પાસે ચાલુ તપાસના ડોક્યુમેન્ટ માંગ્યા 

આરોપીઓના નામ દક્ષ અગ્રવાલ અને પુનિત પરિક એમ સામે આવ્યા છે. મળતી જાણકારી પ્રમાણે બંનેએ R K શુક્લાનો નંબર પોતાના ફોનમાં સેવ કરી રાખ્યો હતો અને સોફ્ટવેરની મદદથી તેમણે CBIનો લેન્ડલાઈન નંબર પણ બનાવટી રીતે મેળવી લીધો હતો. આ બંનેને 4 સ્ટાર હોટલમાં જ્યાં તેઓ રહેતા હતા ત્યાંથી ઝડપી લેવાયા હતા.

3 કંપનીઓ સામે ટેક્સ વિભાગમાં ઈન્કવાયરી ચાલે છે

FIRમાં જણાવ્યા મુજબ સેન્ટ્રલ બોર્ડ ફોર ઈનડાયરેક્ટ ટેક્સીસ એન્ડ કસ્ટમ્સ મુંબઈ એ નેમાની સ્ટીલ પ્રાઇવેટ લિમિટેડ, સુનિતા ડેવલપર્સ પ્રાઇવેટ લિમિટેડ અને ગ્રેટ ટાઉન ટ્રેડિંગ પ્રાઇવેટ લિમિટેડ એમ 3 કંપનીઓ સામે ઈન્કવાયરી ચલાવી રહી છે.

18 ડિસેમ્બરે આ કેસના તપાસ અધિકારી GST સુપ્રિન્ટેન્ડેન્ટ હરેશ પરેચાને શુકલાના નામથી સ્પામ ફિલ્ટરમાં આવેલો એક કોલ આવ્યો. આ કોલરે પરેચાને ધમકી આપતા જણાવ્યું હતું કે CBIએ પરેચા સામે આ કંપનીઓને બ્લેકમેલ કરવાની ફરિયાદ નોંધી છે અને કેસના ડોક્યુમેન્ટની માંગણી કરી હતી. 

પરીકે અગ્રવાલને ચૂકવ્યા છે નાણા 

CBIએ નોંધ્યું હતું કે પુનિત પરિકે આ ત્રણ કંપનીઓ વતી પરેચાને ધમકાવવા માટે દક્ષ અગ્રવાલને પણ કામે રાખ્યો હતો. વિગત મુજબ તેણે આ કામ બદલ દક્ષ અગ્રવાલને 30 લાખ રૂપિયા આપવાનું વચન આપ્યું હતું જે પૈકી 2 લાખ તો તેણે આપી પણ દીધા હતા.