ગુજરાતમાં ક્યાંક મેઘરાજા રિસાયા છે તો ક્યાંક મનમૂકીને વરસી રહ્યા છે. ત્યારે આજે વહેલી સવારથી જ મેઘરાજા અમરેલી પર થયા મહેરબાન, આણંદમાં પણ ધમાકેદાર એન્ટ્રી
અમરેલીમાં મેઘરાજા મહેરબાન
રાજુલા-વાંશિયાળીમાં 2થી2.5 ઇંચ વરસાદ
આણંદમાં મોડી રાત્રે 3 ઇંચ વરસાદ
રાજ્યમાં વરસાદી માહોલ જામ્યો છે. તેમાં પણ ખાસ કરીને સૌરષ્ટ્રના અમરેલીમાં મેઘો મહેરબાન થયો છે. અમરેલીમાં વહેલી સવારથીજ મેઘરાજા મન મૂકીને વરસી રહ્યા છે. પરિણામે ખેડૂતોમાં ઉમંગની લાગણી જોવા મળી રહી છે. ખેડૂતોએ વાવણીની શરૂઆત કરી દીધી છે.
રાજુલામાં 2 ઇંચ વરસાદ
અમરેલી રાજુલાના કોસ્ટલ બેલ્ટમાં ધોધમાર વરસાદ વરસ્યો. રાજુલાના વાવેરા,વણોટ અને દાધીયામાં આશરે 2 ઈંચ જેટલો વરસાદ વરસ્યો. પરિણામે ગ્રામ્ય વિસ્તારોમાં ચેકડેમ ઓવરફ્લો થયા અને રાજુલાની ઘાણો નદી બે કાંઠે વહેવા લાગી.
વંડા ગામની નદી બે કાંઠે
અમરેલીના વંડા ગામે મૂશળધાર વરસાદ વરસ્યો. ધોધમાર વરસાદથી નીચાણવાળા વિસ્તારોમાં પાણી ભરાયા. વરસાદથી ગામનો ચેકડેમ ઓવરફ્લો થયો જ્યારે વંડા ગામની નદી બે કાંઠે વહી.
વાંશિયાળીમાં 2.5 ઈંચ ખાબક્યો વરસાદ
અમરેલીના વાંશિયાળી ગામમાં 2.5 ઈંચ વરસાદ ખાબક્યો. સ્થાનિક નદી બે કાંઠે વહી તેમજ ગામનો ચેકડેમ પણ ઓવરફ્લો થયો. વાંશિયાળી સહિત ઠવી,વીરડી ગામમાં મેઘ મહેર થતા ખેડૂતોમાં ખુશીની લાગણી જોવા મળી.
સાવરકુંડલાના ગ્રામ્ય વિસ્તારોમાં વરસાદ
અમરેલીના સાવરકુંડલામાં પણ મેઘરાજાની પધરામણી થઇ. સાવરકુંડલાના ભમ્મર,ખડસલી,લીખાળામાં વરસાદ પડ્યો જ્યારે છાપરી,વિજપડી,મેરીયાણા સહિતના ગામડામાં ધોધમાર વરસાદ થતા નીચાણવાળા ગામો પાણી પાણી થયા હતા. ધોધમાર વરસાદને પગલે સ્થાનિક નદી નાળામાં નવા નીર વહેતા થયા.
ખાંભાની ધાતરવાડી નદીમાં પૂર
અમરેલીના ખાંભા, ગીરમાં ધોધમાર વરસાદ થયો છે. ખાંભા ગીરના ભાડ, વાંકીયા ઈંગોરાળા, નાનુંડીમાં વરસાદ થયો છે. સાથે સાવરકુંડલા, પીપળવા, ચકરાવા અને ઉમેરીયામાં ધોધમાર વરસાદ થયો છે. વરસાદને કારણે ખાંભાની ધાતરવડી નદીમાં પૂર આવ્યું . આ તરફ સારા વરસાદને પગલે ખેડૂતોએ વાવણીની તૈયારીઓ શરૂ કરી છે.