ગોઝારી ઘટના / મોરબીથી માટેલ પૂનમ ભરવા જતા 2 મિત્રોને અજાણ્યા વાહને ફંગોળ્યા, બન્નેના મોત, રાજસ્થાનમાં ધાનેરાનો પરિવાર બન્યો અકસ્માતનો ભોગ

• મોરબીના ટીંબડી ગામના પાટીયા પાસે અકસ્માત
• અકસ્માતમાં બે મિત્રોના નિપજ્યા મોત
• રાજસ્થાનમાં ટ્રક અને કાર વચ્ચે અકસ્માતમાં 4 લોકોએ જીવ ગુમાવ્યો

ઔદ્યોગિક નગરી મોરબી જાણે અકસ્માત ઝૉન બન્યું હોય તેમ અવારનવાર અકસ્માતની ગોઝારી ઘટના સામે આવી રહી છે. તેવામાં આજે સર્જાયેલા અકસ્માતમાં મોરબીથી માટેલ પૂનમ ભરવા જતા 2 મિત્રોના કમકમાટીભર્યા મોત નિપજ્યાં હતા. જેને લઇને સમગ્ર પંથકમાં અરેરાટી મચી જવા પામી છે. કાળ બનીને આવેલા અજાણ્યા વાહને ફંગોળ્યા બાદ બન્ને મિત્રોના મોત નિપજ્યાં હતા.

બાઈક લઈ જઇ રહેલ મિત્રોને અજાણ્યા વાહને મારી ટક્કર 
રિપોર્ટ અનુસાર પૂર્વ કચ્છના સામખીયાળી ખાતે રહેતા ઈશ્વરભાઇ કરશનભાઇ રાવલ અને પોતાના મિત્ર અમરશી રણછોડભાઇ કોળી સામખીયાળીથી માટેલ ખોડીયાર માતાજીના દર્શન અર્થે જઇ રહ્યા હતા. આ વેળાએ જી.જે.12એજે.6080 નંબરની પોતાની બાઇકને મોરબી નજીકના ટીંબડી ગામના પાટીયા પાસે અજાણ્યા વાહનના ચાલકે અડફેટે લીધું હતું. જેંને લઈને ગંભીર અકસ્માત સર્જાયો હતો. જેમાં ઈશ્વરભાઇ રાવલ અને અમરશી કોળી ફુટબોલની ફંગોળાતા ઇજા પહોંચી હતી.જેથી બનેના સ્થળ પર જ કમકમાટીભર્યા મોત નિપજ્યાં હતા. ત્યારબાદ મૃતદેહને પીએમ માટે મોરબી સિવિલ હોસ્પિટલે ખસેડી પોલીસે કાર્યવાહી આગળ ધપાવી છે.

ધાનેરાના મહેશ્વરી પરિવારને નડ્યો રાજસ્થાનમાં અકસ્માત, 4 ના મોત
વધુમાં અકસ્માતની વધુ એક કરુણ ઘટના  રાજસ્થાનના ગુડા મલાણી પાસે સામે આવી છે. જેમાં ટ્રક અને કાર વચ્ચે ગમખ્વાર અકસ્માત સર્જાયો હતો. જેસોરથી દર્શન કરી પરત ફરતી વેળાએ પરીવારને અકસ્માત નડ્યો હતો. આ દુર્ઘટનામાં ધાનેરાના મહેશ્વરી પરીવારના 3 મહિલા સહિત 4 લોકોને સારવાર મળે તે પહેલા કાળ આંબી ગયો હતો.  આ ઘટનાને લઇને  પરિવારજનોમાં કાળો કલ્પાંત ફેલાયો છે. બીજી બાજુ ઘટનાની જાણ થતાં સ્થાનિક પોલીસ તાત્કાલિક ઘટના સ્થળે દોડી ગઇ હતી અને ઈજાગ્રસ્ત એકને સારવાર અર્થે ખસેડી કાર્યવાહી હાથ ધરી હતી.