ટક્કર / બનાસકાંઠા: કાર શટલ રિક્ષા સાથે ધડાકાભેર અથડાઇ, ભયાવહ અકસ્માતમાં 2 લોકોના કમકમાટી ભર્યા મોત, 13ને ઈજા

• બનાસકાંઠા જિલ્લાના ભીલડી રોડ પર અકસ્માત
• કાર સાથે ત્રણ પૈડાં વાલી શટલ રિક્ષા સવાર 2ના મોત, 13ને ઈજા
• ખેટવા નજીક કાર અને છકડા વચ્ચે થઈ હતી ટક્કર

ગુજરાતમાં હાઈવે પર અકસ્માતના બનાવો દિવસેને દિવસે વધી રહ્યા છે. ત્યારે બનાસકાંઠામાં વધુ એક અકસ્માતની ઘટના સામે આવી છે. ભીલડી રોડ પર કાર સાથે ત્રણ પૈડાં વાળી રિક્ષાનો ભયંકર અકસ્માત થયો હતો. જેમાં 2 લોકોના ઘટનાસ્થળે જ અકાળે અવસાન થયા છે. 

બનાસકાંઠા જિલ્લાના ભીલડી રોડ પર ખેટવા નજીક આ  દુર્ઘટના સર્જાઇ છે. કાર નંબર GJ 12 DG 8906ની મારુતિ કાર હાઈવે પર પુરપાટ ઝડપે આવી રહી તે દરમિયાન ત્રણ પૈડાં વાળી શટલ રિક્ષા સાથે અગમ્ય કારણોસર જોરદાર ટક્કર થઈ હતી. જેમાં રિક્ષામાં હાઇવે પર ફંગોળાઈ ઢસડાઈ ગઈ હતી. અકસ્માત વખતે રિક્ષામાં ડ્રાઈવર સાથે કુલ 15 લોકો સવાર હતા. જેમાંથી 2 લોકોના ઘટનાસ્થળે જ મોત નીપજયાં હતા જ્યારે 13 લોકોમાંથી મોટાભાગનાને નાની મોટી ઈજાઓ થઈ હતી

ઘટનની જાણ થતા સ્થાનિકોના ટોળેટોળા વળ્યા હતા. જે બાદ ઈજાગ્રસ્તોને સારવાર માટે હોસ્પિટલ ખસેડવામાં આવ્યા હતા. અકસ્માત કઈ રીતે સર્જાયો તેનું કોઈ ચોક્કસ કારણ જાણી શકાયું નથી. મૃતક બંનેને પીએમ અર્થે ખસેડવામાં આવ્યા હતા. પોલીસને અસ્કમાતના બનાવની જાણ કરવામાં આવી હતી. ઘટનાની તપાસ આરંભી દેવાઈ છે. હાલ તો મૃતકના પરિવારજનોમાં શોકની લાગણી છવાઈ ગઈ છે.