અવિરત મેઘનું આગમન / વલસાડ જિલ્લામાં 2 દિવસ સતત વરસાદના કારણે રસ્તાઓ પર પાણી-પાણી, લાંબા સમય બાદ મેઘરાજાની ધમાકેદાર એન્ટ્રી

• વલસાડ જિલ્લામાં 2 દિવસથી સતત વરસાદ
• અઢી ઇંચ વરસાદમાં ધરમપુરના રસ્તાઓ પાણી પાણી
• પાણી ભરાતા રાહદારીઓ મુશ્કેલીનો સામનો કરવો પડ્યો

વલસાડ જિલ્લામાં સતત બીજા દિવસે પણ વરસાદી માહોલ છવાયો હતો. જિલ્લાના તમામ તાલુકાઓમાં છૂટોછવાયો વરસાદ પડયો હતો. જોકે સૌથી વધુ વરસાદ ધરમપુર તાલુકામાં પડ્યો હતો. ધરમપુરમાં સાંજે પડેલા અઢી ઇંચ વરસાદમાં ધરમપુરના રસ્તાઓ પાણી પાણી થઇ ગયા હતા.ધરમપુર શહેરમાં બપોર બાદ પડેલા વરસાદને પગલે અનેક વિસ્તારોમાં પાણી ભરાયા હતા. શહેરના બસ સ્ટેશનની સામેના રોડ પર દર વર્ષની જેમ આ વર્ષે પણ વરસાદ પડતાની સાથે ઢીચણ સમાં પાણી ભરાયા હતા.

પાણી ભરાતા રાહદારીઓ મુશ્કેલીનો સામનો કરવો પડ્યો હતો. જોકે થોડા સમય બાદ ધરમપુર પાલિકાના કર્મચારીઓ દ્રારા પાણીનો નિકાલ કરવામાં આવ્યો હતો. તો બીજી તરફ સ્ટેટ હોસ્પિટલની સામે ગૌરવ પથ પર દર વર્ષે પાણી ભરાતા હોય છે. લોકોને મુશ્કેલી પડતી હતો છે. પરંતુ ત્યાં પાલિકા દ્રારા કોઈ જ પ્રકારે કામગરી કરવામાં આવી નથી અને પાણીમાંથી લોકો પસાર થઈ રહ્યા છે. ત્યારે વહેલી તકે અહીં ભરાતા પાણી નો કાયમી પ્રશ્ન હલ થાય એ સમયની માગ છે.

વલસાડ જિલ્લામાં  નોંધાયેલ વરસાદના આંકડા

• ઉમરગામ તાલુકામાં 2.08 ઇંચ 
• કપરાડામાં 9 મીમી
• પાલડીમાં 9 મીમી
• વલસાડમાં 1  ઇંચ
• વાપીમાં 9 મીમી
• ધરમપુરમાં 2.4 ઇંચ વરસાદ

વરસાદની આતુરતામા આવશે અંત તેવું હવામાન વિભાગે જણાવ્યું છે. રાજ્યમાં વરસાદી વાદળો તૈયાર થઈ રહ્યા છે એટલે કે વરસાદી સિસ્ટમ સક્રિય થતા હવે વરસાદની શક્યતાઓ વર્તાઈ રહી છે.

લો પ્રેશન સક્રિય થતા પડી શકે છે વરસાદ

જૂન મહિના બાદ વરસાદ પાછો ખેંચાતા હવામાન વિભાગે વરસાદની સંભાવના નહીવત હોવાની સંભાવનાઓ વ્યક્ત કરી હતી જે બાદ ખેડૂતો ચિંતામાં મુકાઈ ગયા હતા પરતું હવે લો પ્રેશન સક્રિય થતા રાજ્યમાં વરસાદની સંભાવનાઓ સેવાઈ રહી છે. 

રવિવારથી સમગ્ર ગુજરાતમાં વરસાદ સંભાવના

રવિવારથી સમગ્ર ગુજરાતમાં વરસાદ પડવાની સંભાવના સેવાઈ રહી છે અષાઢી બીજના દિવસે પણ રાજ્યના અલગ અલગ ભાગોમાં વરસાદ પડી શકે છે. આ તરફ સૌરાષ્ટ્ર. દક્ષિણ ગુજરાત, મધ્યગુજરાતમાં હળવાથી ભારે વરસાદ પડી શકે છે જ્યારે કચ્છ સહિત ઉત્તર ગુજરાતમાં ભારે થી સામાન્ય વરસાદ ખાબકી શકે છે.