સમગ્ર રાજ્યમાં આજથી નવા ટ્રાફિકના નિયમો લાગુ થઈ ગયા છે. ત્યારે સુરતમાં નવા ટ્રાફિક નિયમોનો કડકાઈથી અમલ કરવામાં આવ્યો હતો. પ્રથમ દિવસે જ લાખો રૂપિયાનો દંડ વસૂલવામાં આવ્યો હતો. વાહનચાલકોએ ક્યાંક ક્યાંક ટ્રાફિક પોલીસ સામે માથાકૂટ પણ કરી હતી.
કેટલા વાહનચાલકો પકડયા અને કેટલો વસૂલાયો દંડ
1608 વાહનચાલકો પાસેથી દંડ વસૂલાયો હતો. કુલ 6 લાખ 92 હજારનો દંડ વસૂલ કરાયો હતો. ટ્રાફિક પોલીસે 46 વાહનો ડિટેન કર્યા હતા. અને 6 વાહનચાલકો સામે કોર્ટમાં ફરિયાદ દાખલ કરાઈ હતી. ટ્રાફિક વિભાગ નવા કાયદાના અસરકારક પાલન માટે સતર્ક બની ગયો છે. આવતીકાલે પણ ટ્રાફિક નિયમનના અમલ માટે સ્પેશ્યલ ડ્રાઈવ યોજવામાં આવશે.
સમગ્ર રાજયમાં કાલથી થશે ટ્રાફિક ડાઈવ
નવા ટ્રાફિક નિયમોની આજથી કડક પણે અમલવારી શરૂ થઈ ગઈ છે. ત્યારે અમદાવાદ પોલીસે પણ ટ્રાફિકના નિયમોને ભંગ કરનારા લોકો પર તવાઈ બોલાવી છે. નવા નિયમ લાગુ થતા જ પોલીસે 2 દિવસની ખાસ ટ્રાફિક ડ્રાઈવ ચાલુ કરી છે.આ ડ્રાઈવમાં નિયમ તોડનાર પાસેથી 5 ગણો દંડ તો વસુલવામાં આવી જ રહ્યો છે. પરંતુ તેની સાથે-સાથે કડક કાર્યવાહી પણ કરવામાં આવી રહી છે. અમદાવાદ ટ્રાફિક ડીસીપી અજીત રાજયાણે મીડિયા સાથે વાત કરતા જણાવ્યું કે, આજથી અમે ટ્રાફિકના નિયમોની કડક પણે અમલવારી તો શરૂ કરી છે. પરંતુ મેમો રિકવર કરવાની કાર્યવાહી પણ વધારી દીધી છે.
હવે મેમોની લગભગ બમણી રિકવરી
પહેલા 1.25 લાખના ટ્રાફિક મેમોની રિકવરી થતી હતી.. પરંતુ હવે 3 લાખ જેટલી મેમોની રિકવરી થાય છે.. જોકે આ નિયમની અમલવારી દરમિયાન જો કોઈ ટ્રાફિક અધિકારી ખરાબ વર્તન કરશે તો તેની સામે પણ કાર્યવાહી કરવામાં આવશે.
તો વાહન થઈ જશે જપ્ત
જો અત્યાર સુધી તમને એમ હતું કે મેમો આવશે તો ભરીશું શાંતિથી અથવા તો નહીં ભરીએ તો ચાલશે તો હવે એવા ભ્રમમાં ન રહેતાં. પોલીસે દંડની કાર્યવાહી શરૂ કરી છે સાથે સાથે કડક રીતે મેમોની રિકવરી પણ ચાલુ કરી દીધી છે. જો મેમો નહીં ભરવામાં આવે તો અંતે વાહન જપ્ત કરવા સુધીની પણ કાર્યવાહી કરવામાં આવશે.
વડોદરામાં વાહનચાલકોમાં ફફડાટ જોવા મળ્યો
વડોદરામાં વાહનચાલકોમાં નવા નિયમોને લઈને ફફડાટ જોવા મળી રહ્યો છે.લોકો હેલ્મેટ નો ઉપયોગ કરતા થયા છે.ફોર વ્હીલ ચાલકો સીટ બેલ્ટ પહેરતા જોવા મળી રહ્યાં છે,તો વાહનચાલકોએ એચ એસ આર પી નંબર પ્લેટ પણ લગાવી દીધી છે.લોકો ઝેબ્રા ક્રોસિંગના નિયમનું પણ પાલન કરતા નજરે પડી રહ્યાં છે.
કેટલીક જગ્યાએ ઘર્ષણ પણ થયું
ટ્રાફિકના નવા નિયમો લાગૂ થવાના પહેલા જ દિવસે પોલીસ અને નાગરિક વચ્ચે ઘર્ષણ થયું છે.. અમદાવાદના કેટલાક નાગરિકોના ગુસ્સાનો ભોગ પોલીસ બની છે. કાયદાનું પાલન કરાવવા જતા પોલીસને મહિલા વાહન ચાલકે ખખડાવી હતી.. હેલ્મેટ ન પહેરવાના કારણે પોલીસે વાહન ચાલકને રોકતા મહિલા રોષે ભરાઈ હતી અને દંડ નહી ભરુ કહીને પોલીસ સાથે ઝઘડો કર્યો હતો. આવી જ વધુ એક ઘટના સુરતમાં પણ જોવા મળી હતી.