શ્રીલંકાની ટીમ પ્રથમ વાર ફાઇનલ રમી રહી હતી. ઓસ્ટ્રેલિયાએ ૫૦ ઓવરમાં સાત વિકેટે ૨૪૧ રન નોંધાવ્યા. જવાબમાં શ્રીલંકાએ ૪૬.૨ ઓવરમાં ત્રણ વિકેટ ગુમાવીને લક્ષ્ય હાંસલ કરી લીધું. શ્રીલંકા પહેલી વાર વિશ્વ ચેમ્પિયન બન્યું. સદી (૧૦૭) ફટકારનાર ડી'સિલ્વાને મેન ઓફ ધ મેચ જાહેર કરાયો હતો.
1996: યજમાન શ્રીલંકાએ ફાઇનલમાં ઓસ્ટ્રેલિયાને હરાવી ટ્રોફી જીતી લીધી. વર્ષ ૧૯૯૬ના છઠ્ઠા વિશ્વકપની યજમાની ભારત, પાકિસ્તાન અને શ્રીલંકાએ સંયુક્તરૂપે કરી હતી. ભારત અને પાકિસ્તાન બીજી વાર વિશ્વકપની યજમાની કરી રહ્યા હતા, જ્યારે શ્રીલંકાને પહેલી વાર યજમાની કરવાની તક મળી હતી. એ દરમિયાન ભારતે ૧૭, પાકિસ્તાને ૧૬ અને શ્રીલંકાએ ચાર મેચની યજમાની કરી હતી. શ્રીલંકાએ ફાઇનલમાં અર્જુના રણતુંગાના નેતૃત્વમાં ઓસ્ટ્રેલિયાને હરાવીને પ્રથમ વાર વિશ્વકપ ટ્રોફી જીતી હતી. એવું પહેલી વાર બન્યું હતું કે જ્યારે યજમાન દેશે ટ્રોફી જીતી હોય.
ભારતનું પ્રદર્શનઃ સચીન તેંડુલકર (અણનમ ૧૨૭)ના દમ પર ભારતે પ્રથમ મેચમાં કેન્યાને સાત વિકેટ પરાજય આપ્યો હતો. બીજી મેચમાં સચીન તેંડુલકર (૭૦)ની મદદથી ભારતે વિન્ડીઝને પાંચ વિકેટે પછાડ્યું. ત્રીજી મેચમાં ઓસ્ટ્રેલિયા સામે ભારતને ૧૬ રને પરાજયનો સામનો કરવો પડ્યો હતો. એ મેચમાં પણ સચીને ૯૦ રન ફટકાર્યા હતા. ચોથી મેચમાં સચીનની ૧૩૭ રનની ઇનિંગ્સ છતાં ભારતે શ્રીલંકા સામે છ વિકેટે હારનો સામનો કરવો પડ્યો હતો. પાંચમી મેચમાં વિનોદ કાંબલીના ૧૦૬ રનના દમ પર ભારતે ૪૦ રને ઝિમ્બાબ્વેને હરાવ્યું હતું. ક્વાર્ટર ફાઇનલમાં ભારત અને પાકિસ્તાનનો સામનો થયો હતો. ભારતે નવજોતસિંહ સિદ્ધુના ૯૩ રનની મદદથી ૫૦ ઓવરમાં આઠ વિકેટે ૨૮૭ રન બનાવ્યા હતા. જવાબમાં પાકિસ્તાનની ટીમ નવ વિકેટે ૨૪૮ રન બનાવીને મેચ હારી ગઈ હતી.
પ્રથમ સેમિફાઇનલઃ કોલકાતાના ઈડન ગાર્ડન્સમાં શ્રીલંકાએ ભારત સામે ૫૦ ઓવરમાં આઠ વિકેટે ૨૫૧ રન બનાવ્યા. જવાબમાં ભારતીય ટીમની શરૂઆત ખરાબ રહી હતી અને ભારતે ૧૨૦ રનમાં જ આઠ વિકેટ ગુમાવી દીધી. ભારતીય ટીમને હારતી જોઈને કોલકાતાના દર્શકોએ મેદાનમાં બોટલો ફેંકવાનું શરૂ કર્યું. એટલે સુધી કે એક સ્ટેન્ડમાં આગ પણ લગાવી દીધી. બાદમાં મેચ રેફરી ક્લાઇવ લોઇડે શ્રીલંકાને વિજેતા જાહેર કરી દીધું. શ્રીલંકાના અરવિંદ ડી'સિલ્વાને ૬૬ રનની ઇનિંગ્સ બદલ મેન ઓફ ધ મેચ જાહેર કરાયો હતો.
બીજી સેમિફાઇનલઃ ઓસ્ટ્રેલિયાની ટીમે વિન્ડીઝ સામે ૫૦ ઓવરમાં આઠ વિકેટે ૨૦૮ રન બનાવ્યા. જવાબમાં વિન્ડીઝની ટીમ ૪૯.૩ ઓવરમાં ૨૦૨ રન બનાવીને ઓલઆઉટ થઈને મેચ હારી ગઈ. ૩૬ રનમાં ચાર વિકેટ ઝડપવા બદલ ઓસ્ટ્રેલિયાના શેન વોર્નને મેન ઓફ ધ મેચ જાહેર કરાયો હતો.
ફાઇનલઃ શ્રીલંકાની ટીમ પ્રથમ વાર ફાઇનલ રમી રહી હતી. ઓસ્ટ્રેલિયાએ ૫૦ ઓવરમાં સાત વિકેટે ૨૪૧ રન નોંધાવ્યા. જવાબમાં શ્રીલંકાએ ૪૬.૨ ઓવરમાં ત્રણ વિકેટ ગુમાવીને લક્ષ્ય હાંસલ કરી લીધું. શ્રીલંકા પહેલી વાર વિશ્વ ચેમ્પિયન બન્યું. સદી (૧૦૭) ફટકારનાર ડી'સિલ્વાને મેન ઓફ ધ મેચ જાહેર કરાયો હતો.
ઓસ્ટ્રેલિયા- વિન્ડીઝની ટીમોમાં ડરઃ ઓસ્ટ્રેલિયા અને વિન્ડીઝે આતંકવાદી જૂથ 'લિટ્ટે' તરફથી સુરક્ષાનું કારણ આપીને પોતપોતાની ટીમોને શ્રીલંકા મોકલી નહોતી. શ્રીલંકાને બંને ટીમ સામેની મેચોમાં વોકઓવર મળ્યું હતું.
ગુસ્સે થયેલા લારાએ ઓટોગ્રાફ ના આપ્યાઃ એ વિશ્વકપની એક મેચમાં નવી ટીમ કેન્યાએ બે વાર ચેમ્પિયન બનેલી વિન્ડીઝની ટીમને હરાવીને મોટો અપસેટ સર્જ્યો હતો. વિન્ડીઝના એ પરાજયથી ક્રિકેટ જગતને આશ્ચર્યચકિત કરી દીધું હતું. કેન્યાની વિશ્વકપમાં એ પ્રથમ જીત હતી. એ મેચમાં પ્રથમ બેટિંગ કરતા કેન્યાની ટીમ ૧૬૬ રનમાં ઓલઆઉટ થઈ ગઈ હતી. જવાબમાં વિન્ડીઝની ટીમનો વાવટો માત્ર ૩૫.૨ ઓવરમાં ૯૩ રન બનાવીને સંકેલાઈ ગયો હતો. એ પરાજયથી વિન્ડીઝના ક્રિકેટરો નિરાશામાં ગરકાવ થઈ ગયા હતા. પરાજયથી ગિન્નાયેલા બ્રાયન લારાએ કેન્યાના એક ક્રિકેટરે ઓટોગ્રાફ માગ્યો ત્યારે લારાએ ઓટોગ્રાફ આપવાનો સ્પષ્ટ ઇનકાર કરી દીધો હતો.