આવક / ટ્રાફિક જામથી ત્રસ્ત શહેરના રસ્તા પર 11 મહિનામાં 1.96 લાખ નવાં વાહન ઉમેરાયાં

• 1 એપ્રિલ 2019 થી તા. 12 ફેબ્રુ.-2020 સુધીમાં કુલ 1,96,865 વાહનનું રજિસ્ટ્રેશન
• વાહનોના રજિસ્ટ્રેશન પેટે રૂ.74.80 કરોડની આવક થઇ
• ચાલુ વર્ષના 11 મહિનામાં શહેરના રસ્તા પર 1.96 લાખથી વધુ વાહનો ઉમેરાયાં

શહેરના સત્તાધીશોનાં અણઘડ આયોજનથી ચાર રસ્તાને પાર કરાવનારા 700 થી 800 મીટરના ફલાયઓવર બ્રિજ બની રહ્યા છે. જોકે આના કારણે ફલાયઓવરબ્રિજથી એક ચાર રસ્તા ઓળંગો તો બીજા ચાર રસ્તાના છેડે ટ્રાફિકજામ થવાની નવી સમસ્યા સર્જાઇ રહી છે. એટલે ટ્રાફિકજામનો પ્રશ્ન જટીલ બનીને શહેરીજનોને તોબા પોકારાવી રહ્યો છે. દરમ્યાન ચાલુ વર્ષના 11 મહિનામાં શહેરના રસ્તા પર 1.96 લાખથી વધુ વાહનો ઉમેરાયાં હોવાની ચોંકાવનારી વિગત જાણવા મળી છે. 

1 એપ્રિલ 2019 થી તા. 12 ફેબ્રુ.-2020 સુધીમાં કુલ 1,96,865 વાહનનું રજિસ્ટ્રેશન

ખુદ મ્યુનિ. તંત્રના સત્તાવાર  આંકડા તપાસતા ગત તા.1 એપ્રિલ 2019 થી તા. 12 ફેબ્રુ.-2020 સુધીમાં કુલ 1,96,865 વાહનનું રજિસ્ટ્રેશન થયું હતું. જેમાં ટુ-વ્હીલરની સંખ્યા સૌથી વધુ 1,34,950 છે. શહેરના રસ્તા પર 2302 ટ્રક, 28 ટ્રેકટર, ૬પ બસ, 107 ક્રેન, 3716  લોડિંગ ટેમ્પો, લોડિંગ રિક્ષા, 24 મેટાડોર અને 30 મિની બસ જેવાં અન્ય વાહનનું પણ રજિસ્ટ્રેશન નોંધાયું હતું. 

વાહનોના રજિસ્ટ્રેશન પેટે રૂ.74.80 કરોડની આવક થઇ

મ્યુનિ. કોર્પો.ના વિહિકલ ટેકસ વિભાગને આ વાહનોના રજિસ્ટ્રેશન પેટે રૂ.74.80 કરોડની આવક થઇ હતી. એટલે કે મ્યુનિ. તિજોરી વિહિકલ ટેકસની આવકથી છલકાઇ હતી. તેમાં પણ મંદીનો સમય હોવા છતાં 25 લાખથી વધુની કિંમત ધરાવતી 562  લકઝ્યુરિયસ કારના રજિસ્ટ્રેશનથી રૂ.5.87 કરોડની આવક થઇ હતી. બીજા અર્થમાં શોખીન અમદાવાદીઓએ મંદીના માહોલમાં પણ મોંઘીદાટ કાર ખરીદવાનું ચાલુ રાખ્યું હતું. 
 
કેટલાં વાહનનું રજિસ્ટ્રેશન
વાહનનો પ્રકાર    સંખ્યા

• ટુ-વ્હીલર    1,34,950 
• કાર-જીપ     43,179 
• ઓટો રિક્ષા   12,429 
• અન્ય વાહન   6,307  
• કુલ        1,96,856 

(1 એપ્રિલ, 2019થી 12 ફેબ્રુઆરી, 2020 સુધી)