સારાં સમાચાર / મોદી સરકારના એક નિર્ણયથી આ 7 રાજ્યોના 17000 ખેડૂતોના ઉઘડી ગયા નસીબ, 3100 યુવાનોને મળશે નોકરી

• ખેડૂતો માટે સારાં સમાચાર
• ફૂડ પ્રોસેસિંગ ઈન્ડસ્ટ્રીઝ મંત્રાલયે 7 ફૂડ પ્રોસેસિંગ પ્રોજેક્ટ શરૂ કર્યા છે
• હવે યુવાનો માટે રોજગારની નવી તકો પણ ઊભી થશે

મંત્રાલય અનુસાર લગભગ 17000 ખેડૂતોને આ પ્રોજેક્ટ્સનો લાભ મળશે અને 3100 લોકોને રોજગાર મળશે. હકીકતમાં ભારત સરકાર દ્વારા દેશની આઝાદીના 75 વર્ષ નિમિત્તે ઉજવવામાં આવતા 'આઝાદી કા અમૃત મહોત્સવ'ના ભાગરૂપે ફૂડ પ્રોસેસિંગ ઉદ્યોગ મંત્રાલય 6 સપ્ટેમ્બર 2021થી 12 સપ્ટેમ્બર 2021 સુધી ફૂડ પ્રોસેસિંગ સપ્તાહની ઉજવણી કરી રહ્યું છે. જે અંતર્ગત મંત્રાલય દ્વારા ઘણાં કાર્યક્રમોનું આયોજન કરવામાં આવી રહ્યું છે. જેમાં ફૂડ પ્રોસેસિંગ ઉદ્યોગ મંત્રી પશુપતિ કુમાર પારસ અને રાજ્યમંત્રી પ્રહલાદ સિંહ પટેલ દ્વારા વીડિયો કોન્ફરન્સિંગ દ્વારા ઉત્તર પ્રદેશ, આંધ્ર પ્રદેશ અને તામિલનાડુ રાજ્યોમાં 7 ફૂડ પ્રોસેસિંગ પ્રોજેક્ટ્સ લોન્ચ કરવામાં આવ્યા છે.

કુલ 165 કરોડના ખર્ચે પ્રોજેક્ટેસ શરૂ થયા

આ 7 પ્રોજેક્ટ્સની કુલ કિંમત લગભગ 164.46 કરોડ રૂપિયા છે. મંત્રાલય દ્વારા આ પ્રોજેક્ટ્સને 27.99 કરોડ આપવામાં આવ્યા છે. આ સાથે જ આ તમામ પ્રોજેક્ટ્સ દ્વારા 3100 લોકોને પ્રત્યક્ષ અને પરોક્ષ રીતે રોજગાર મળશે અને 16,500 ખેડૂતોને તેનો લાભ મળશે.

આ અવસર પર ફૂડ પ્રોસેસિંગ ઇન્ડસ્ટ્રીઝ મંત્રી પશુપતિ કુમાર પારસે કહ્યું કે હું આ પ્રોજેક્ટ્સના પ્રમોટરોને અદ્યતન પ્રોસેસિંગ સુવિધાઓ વિકસાવવા માટે પ્રશંસા કરવા માંગુ છું જે ફૂડ પ્રોસેસિંગ ક્ષેત્રના વિકાસમાં એક સીમાચિહ્ન સાબિત થશે અને સંબંધિત વિસ્તારો, નજીકના વિસ્તારોના ખેડૂતો, ઉત્પાદકો, પ્રોસેસરો અને ગ્રાહકોને ફાયદો થશે.

સમારોહને સંબોધિત કરતા રાજ્ય મંત્રીએ કહ્યું કે સ્થાનિક સ્તરે જો વધારાના પાક/ઉત્પાદનોની પ્રક્રિયા કરવામાં આવે તો તે એક આદર્શ સ્થિતિ હશે અને દરેકને તેનો લાભ મળશે. આ સાથે પ્રમોટરો સાથે વાત કરતી વખતે તેમણે કહ્યું કે અમારા ઉત્પાદનને આંતરરાષ્ટ્રીય ઓળખ બનાવવા માટે અમારી બ્રાન્ડની હાજરી જરૂરી છે, આ માટે આપણે બધાંએ સાથે મળીને કામ કરવું પડશે.

પંજાબના ભટિંડા જિલ્લામાં 'વન ડિસ્ટ્રિક્ટ વન પ્રોડક્ટ' હેઠળ મંત્રાલય દ્વારા 'હની પ્રોસેસિંગ' પર એક વર્કશોપનું પણ આયોજન કરવામાં આવ્યું. આ શ્રેણીમાં મેઘાલય રાજ્યમાં 74 SHG સભ્યો માટે SRLMના ડિસ્ટ્રિક્ટ પ્રોજેક્ટ મેનેજમેન્ટ યુનિટ (DPMU)માં 22.02 લાખની સીડ કેપિટલ રકમ તબદીલ કરવામાં આવી હતી અને આસામમાં 1250 SHG સભ્યો માટે 213 સમુદાય આધારિત સંસ્થાઓને 2.01 કરોડની સીડ કેપિટલ સહાય આપવામાં આવી હતી.