ઉત્તર સિરિયાના અજાજ શહેરમાં રવિવારે સાંજે વિસ્ફોટક ભરેલી એક કારમાં પ્રચંડ વિસ્ફોટ થતાં ચાર બાળકો સહિત ૧૭ લોકોનાં મોત થયાં હતાં અને ર૮ વ્યક્તિને ગંભીર ઈજાઓ થઈ હતી. પોલીસના જણાવ્યા અનુસાર મૃતકોની સંખ્યા હજુ વધે તેવી આશંકા છે. અજાજ શહેરની વચ્ચે આવેલી એક મસ્જિદ નજીક ભીડભાડવાળી બજારમાં ઈફ્તાર પાર્ટી ચાલી રહી હતી ત્યારે એક કારમાં બ્લાસ્ટ કરીને ફિદાયીન હુમલો કરવામાં આવ્યો હતો.
ઉલ્લેખનીય છે કે અજાજ શહેર તુર્ક સમર્થિત સિરિયાઈ વિદ્રોહીઓના કબજાવાળું શહેર છે. હજુ સુધી કોઈ આતંકી સંગઠને આ ફિદાયીન હુમલાની જવાબદારી લીધી નથી. તુર્કની સરહદ નજીક આવેલા અજાજ શહેરમાં થયેલો આ કાર બ્લાસ્ટ અત્યાર સુધીનો સૌથી મોટો હુમલો છે.
પોલીસે કહ્યું કે રવિવારે સાંજે શહેરની મધ્યમાં આવેલી મસ્જિદ પાસે બજારમાં ઈફ્તાર પાર્ટીનું આયોજન કરવામાં આવ્યું હતું. હુમલાખોરે વિસ્ફોટકો ભરેલી કાર બજારમાં ઘુસાડી દીધી હતી અને બ્લાસ્ટ કર્યો હતો. બ્લાસ્ટ બાદ બજારમાં અફરાતફરી મચી ગઈ હતી. પ્રાથમિક અહેવાલો અનુસાર આ હુમલામાં ૧૭ લોકોએ જીવ ગુમાવ્યો છે. ગંભીર રીતે ઘવાયેલા ર૮ લોકોને નજીકની હોસ્પિટલમાં સારવાર માટે ખસેડવામાં આવ્યા છે. આ લોકોની હાલત પણ અત્યંત ગંભીર હોવાનું જાણવા મળ્યું છે.
રવિવારે જ ઈસ્લામિક સ્ટેટ (આઈએસ)નો ગઢ ગણાતા રક્કા શહેરમાં પણ કારથી કરવામાં આવેલા ફિદાયીન વિસ્ફોટમાં ૧૦ લોકોનાં મોત થયાં છે અને ર૦ ઘવાયા છે. બ્રિટન સ્થિત સંસ્થા સિરિયન ઓબ્ઝર્વેટરી ફોર હ્યુમન રાઈટ્સ’એ જણાવ્યું કે વિસ્ફોટમાં પાંચ લોકો અને િસરિયન ડેમોક્રેટિક ફોર્સના પાંચ સૈનિકો માર્યા ગયા છે. િસરિયન ડેમોક્રેટિક ફોર્સ એ અમેરિકા સમર્થિત કુર્દિશ અરબ ગઠબંધન છે, જેણે ઓક્ટોબર-ર૦૧૭માં શહેરને ઈસ્લામિક સ્ટેટના પંજામાંથી મુક્ત કરાવ્યું હતું.
ગઈ કાલે જ ઈઝરાયલ તરફથી સિરિયા પર કરવામાં આવેલા રોકેટ હુમલામાં પણ ૧૦ લોકોનાં મોત થયાં હતાં. ઈઝરાયલ તરફથી કરવામાં આવેલો આ જવાબી હુમલો હતો. આ અગાઉ િસરિયા તરફથી ઈઝરાયલ પર બે રોકેટ છોડવામાં આવ્યાં હતાં, તેમાંથી એક ઈઝરાયલની સરહદમાં પડ્યું હતું.