અતિ ભારે..! / બોડેલીમાં 17 ઈંચ: તરૂણને ગળાડૂબ પાણીમાંથી ખભે બેસાડી બહાર કાઢ્યો, NDRF ટીમ અને બોડેલી પોલીસે 500 લોકોનું કર્યું રેસ્ક્યૂ

• ગુજરાતમાં અનેક જિલ્લામાં ભારે વરસાદથી તારાજી
• 13 જુલાઈ સુધી વરસાદની હવામાન ખાતાની આગાહી

છોટા ઉદેપુરના બોડેલીમાં વરસાદ આફત બની વરસ્યો છે. બોડેલીમાં 17 ઈંચ વરસાદ પડતાં નગર આખુંય પાણીમાં ગરકાવ થઈ ગયું છે. શહેર તરફ જતા હાઈવે પર પણ અનેક જગ્યાએ ગાબડાં પડતાં બંધ કરી દેવામાં આવ્યા છે. બોડેલી તાલુકાના ગામડાઓ  પણ બેટમાં ફેરવાઇ ગયા છે. ઘરોમાં પાણી ઘૂસી જતા અનેક લોકોને સલામત સ્થળે ખસેડવામાં આવ્યા છે.નગરજનો મુક્તિધામના ઊચાઇવાળા ભાગમાં ચડી ગયા છે. NDRF ટીમ અને બોડેલી પોલીસનું સંયુક્ત રેસ્ક્યુ ઓપરેશન ચાલી રહ્યું છે જેમાં અત્યાર સુધી 500 જેટલા લોકોના રેસ્ક્યુ કરવામાં આવ્યા. ભારે વરસાદને લીધે તરુણ પણ પાણી વચ્ચે ફસાઈ ગયો હતો. રેસ્ક્યૂ ટીમે ગળાડૂબ પાણીમાં ઉતરી તરુણને બચાવી લીધો હતો. આ રેસ્ક્યૂ ઓપરેશનમાં 5-6 લોકો સામેલ હતા જેમણે દોરડાનો સહારો લઈ તરુણને ખભા બેસાડી બહાર કાઢ્યો હતો. જુઓ વીડિયો

વૃદ્ધાને ઊંચકીને રેસ્ક્યુ કર્યું
નવસારીના ગણદેવીમાં પુરની સ્થિતિમાં પોલીસકર્મીઓની પ્રસંશનિય કામગીરી સામે આવી છે. અંબિકા નદીમાં ઘોડાપૂરની સ્થિતિમાં પોલીસે માનવતા મહેકાવી, બીલીમોરા શહેરના પુરગ્રસ્ત વિસ્તારમાં પોલીસ જવાનો રાહત બચાવના કામમાં જોડાયા. બંદર વિસ્તારમાં PSI ડી.આર પઢેરીયાની ટીમ મદદ માટે પહોંચી હતી. વૃદ્ધાને ઊંચકીને રેસ્ક્યુ કરતા પોલીસ જવાનોના ફોટો સોશિયલ મીડિયા વાયરલ થતાં ભરપેટ લોકો ખાખીની સેવાને સલામ કરી રહ્યા છે.

રેસ્ક્યૂની કામગીરી પુરજોશમાં
દક્ષિણ ગુજરાતમાં મેઘાએ ધમાકેદાર ‌બેટિંગ કરી છે. છેલ્લા 36 કલાકમાં 18 ઈંચથી વધુ વરસાદ વરસતા નદીઓ ગાડીતુર બની છે. જ્યાં જુઓ ત્યાં પાણીનું સામ્રાજ્ય જોવા મળી રહ્યું છે. ખાસ કરીને ધરમપુરના જંગલ વિસ્તારમાં સૌથી વધુ વરસાદ ખાબકયો હોવાથી  ઔરંગા નદી બેકાંઠે વહી રહી છે. કાશ્મીરાનગર,લીલાપોર,હનુમાન ભાગડા ગામ,બંદરો રોડ પાણીમાં ગરકાવ થયા છે. દરિયામાં ભરતીને કારણે ઔરંગા નદીના પાણી શહેરમાં પ્રવેશ્યા છે પુરજોશમાં રેસ્ક્યૂની કામગીરી થઈ રહી છે.

અંટાપુર ગામેથી 25 લોકોનું રેસ્ક્યુ કરાયું
બીજી તરફ તાપીના ડોલવણ તાલુકામાં આવેલી ઓલન નદીમાં ઘોડાપૂર આવતા સ્થિતિ વિકટ બની છે. અંટાપુર ગામ આખુંય બેટમાં ફેરવાઇ ગયું છે. જીવના જોખમે રેસ્ક્યૂ ટીમો લોકોને બચાવવામાં લાગી ગઈ છે. અંટાપુર ગામેથી 25 લોકોને સુરક્ષિત સ્થળે નજીકની અંટાપુર ગામની પ્રાથમિક શાળામાં ખસેડવામાં આવ્યા છે. DDO,પ્રાંત અધિકારી,મામલતદાર સહિતના લોકો અંધારવાડી, અંતાપૂર, પંચોલ, પાલસીયા ગામે રેસ્ક્યુ કામગીરી પર સતત નજર રાખી દિશા નિર્દેશ આપી રહયા છે. મહત્વનું છે કે ડોલવણ તાલુકામાં ગત રાત્રિથી અતિ ભારે વરસાદ પડી રહ્યો છે. જેના કારણે નદીઓના આસપાસના વિસ્તારમાં પૂરની સ્થિતિ સર્જાઇ છે.

મોરલી ગામે નદીમાં 7થી વધુ મહિલાઓ ફસાઈ
નવસારીમાં પણ અંબિકા,કાવેરી નદીઓ ઉફાન પર આવી ગઈ છે. ઉપરવાસમાં ભારે વરસાદને લીધે જળસ્તરમાં પણ સતત વધારો થઈ રહ્યો છે. ત્યારે મોરલી ગામે નદી કિનારે 7થી વધુ મહિલા ફસાઈ હતી. આ મહિલાઓ ઘાસ કાપવા ગઈ હતી અચાનક જ નદીમાં ઘોડાપૂર આવી જતા વચ્ચે ફસાઈ ગઈ હતી. જે બાદ સ્થાનિકોએ હોળીની મદદ લઈ 2 2 જુથ કરી મહિલાઓને સુરક્ષિત રીતે ઠામ ઠેકાણે પહોંચાડી હતી.

ઔરંગા નદી વચ્ચે એક વ્યક્તિ JCB પર ફસાયો
દક્ષિણ ગુજરાતમાં ભારે વરસાદ વરસી રહ્યો છે. જેને કારણે દક્ષિણ ભારતની એનક નદીઓ ઓવરફ્લો થયા છે, ત્યારે વલસાડની ઔરંગા નદી વચ્ચે એક વ્યક્તિ JCB સાથે ફસાયો હતો. આ વ્યક્તિ JBC દ્વારા નદીમાં રેખી ખનન કરતો હતો. આ સમયે પૂર આવતાં તે નદીમાં ફસાયો હતો. જેથી આ વ્યક્તિનું રેસ્ક્યૂ કરીને નદી બહાર કાઢવામાં આવ્યો છે.

કશ્મીરનગરમાં સ્થાનિકોનું સ્થળાંતર
વલસાડની ઔરંગા નદીમાં પૂરમાં આફતનું પૂર આવતા અસરગ્રસ્ત વિસ્તારમાં NDRFનું રેસ્ક્યુ ઓપરેશન પુરજોશથી શરૂ છે. કશ્મીરનગર, બરુડિયાબાદ વિસ્તાર પાણી પાણી થઈ ગયો છે. ઘરોમાં પાણી ઘૂસી જતા ઘરવખરી પલડી ગઈ છે. લોકો સ્થળાંતર કરી જીવ બચાવી રહ્યા છે. ઓરંગા નદીના પુલ ઉપર પાણી ફરી વળ્યા છે નદીકિનારા વિસ્તારના લોકોને પ્રશાસન દ્વારા એલર્ટ કરવામા આવ્યા છે.

કચ્છ પોલીસે નદીમાં ફસાયેલા યુવકનું કર્યું દિલધડક રેસ્ક્યૂ
તો આ તરફ કચ્છમાં પણ મેઘો મન મૂકી વરસ્યો છે. ભારે વરસાદને કારણે રૂક્માવતી નદીમાં પૂર આવ્યું છે.  અચાનક જ પાણીનો પ્રવાસ વધી જતા નદીની અંદર એક વ્યક્તિ ફસાયો હતો. જેનો જીવ બચાવવા ખાખી વહારે આવી હતી. જીવની પરવાહ કર્યા વગર બે પોલીસ જવાનો ધસમસતા પ્રવાહમાં ઉતરી ગયા હતા. અને સુરક્ષિત રીતે યુવકને બહાર કાઢ્વામાં આવ્યો હતો.