ક્રિકેટની રમતમાં વિક્રમો સતત બનતા અને તૂટતા રહે છે પરંતુ હાલમાં ૧૬ વર્ષીય સ્વાસ્તીકે તો કમાલ કરી દીધી. તેણે 55 ચોગ્ગા, 52 છગ્ગા સાથે 167 બોલમાં 585 રન ઝૂડીને નવો ઇતિહાસ રચી દીધો.
દીવાન ક્રિકેટ ગ્રાઉન્ડમાં તાજેતરમાં ૧૯મી શહીદ રામપ્રસાદ બિસ્મિત સ્મૃતિ ઓપન ક્રિકેટ ટૂર્નામેન્ટમાં બે વિશ્વ રેકોર્ડ બન્યા. અહીં માહી ક્રિકેટ ક્લબ તરફથી રમતા ગાઝિયાબાદના સ્વાસ્તિક ચિકારાએ ક્લબ ક્રિકેટમાં નિર્ધારિત ઓવરની મેચમાં ૫૮૫ રન બનાવીને વિશ્વ રેકોર્ડ પોતાના નામે કરી લીધો. અગાઉ દક્ષિણ આફ્રિકાના શેન ડેડ્સવેલે ૨૦૧૭માં ૪૯૦ રન બનાવીને આ રેકોર્ડ નોંધાવ્યો હતો. જ્યારે નિર્ધારિત ઓવરની મેચમાં ૭૦૪ રન બનાવીને સૌથી વધુ ટીમ સ્કોરનો ક્લબ ક્રિકેટનો વિશ્વ રેકોર્ડ માહી ક્રિકેટ ક્લબે પોતાનું નામ નોંધાવી દીધું. અગાઉ અમેરિકાના રિચમન્ડ કેલિફોર્નિયામાં વર્ષ ૨૦૦૬માં યુનાઇટેડ ક્લબે એરિયા વિરુદ્ધ ૪૫ ઓવરની મેચમાં ૬૩૦ રન બનાવ્યા હતા.
આ સ્કોર કોઈ ટીમનો નથી, બલકે માહી ક્લબના ૧૬ વર્ષીય ઓપનિંગ બેટ્સમેન સ્વાસ્તિક ચિકારાનો છે. તેણે આ ઇનિંગ્સ માહી ક્રિકેટ ક્લબ તરફથી ગોરખપુરની એસીઈ ક્રિકેટ એકેડેમી સામે રમી. તેની વિસ્ફોટક બેટિંગની મદદથી માહી ક્રિકેટ ક્લબે માત્ર ૩૮.૨ ઓવરમાં જ રેકોર્ડ બ્રેક ૭૦૪ રનનો સ્કોર નોંધાવીને હરીફ ટીમને ૩૫૫ રનથી હરાવી દીધી.
એસીઈ ક્રિકેટ એકેડેમીએ ટોસ જીતીને માહી ક્રિકેટ ક્લબને બેટિંગ કરવા આમંત્રણ આપ્યું હતું. ત્યાર બાદ મેદાનમાં સ્વાસ્તિક છવાઈ ગયો. તેણે પ્રીત સાથે પ્રથમ વિકેટ માટે ૫૨૭ રનની મસમોટી ભાગીદારી નોંધાવી, જેમાં પ્રીતના માત્ર ૪૮ રન હતા.
ભારતમાં સૌથી વધુ રન બનાવવાનો રેકોર્ડ પણ આ પહેલાં સ્વાસ્તિકના નામે જ નોંધાયેલો હતો. તેણે ૪૦ ઓવરની મેચમાં ૧૪૮ બોલમાં ૩૫૬ રન બનાવ્યા હતા. તે ૨૨ બેવડી, સાત ત્રેવડી સદી પણ ફટકારી ચૂક્યો છે. સૌથી વધુ રનનો નવો વિશ્વ રેકોર્ડ નોંધાવવાની સાથે સાથે તે દુનિયાનો સૌથી નાની ઉંમરમાં આ રેકોર્ડ સર્જનારો બેટ્સમેન પણ બની ગયો. આ પહેલાં આ રેકોર્ડ દક્ષિણ આફ્રિકા શેન ડેડ્સવેલના નામે હતો, જેણે ૨૦ વર્ષની ઉંમરે આ રેકોર્ડ નોંધાવ્યો હતો.
૧૦ વિઘા જમીન પર ઘર અને મેદાનમાં છે ૧૨ પીચ
સ્વાસ્તિકના પિતા સુરેન્દ્રસિંહ ભારતીય એથલીટ રહી ચૂક્યા છે. તેઓ સર્વિસીસ ઉપરાંત દેશ માટે પાંચ અને દસ હજાર મીટરની દોડમાં ભાગ લઈ ચૂક્યા છે. અટૌર નંગલામાં લગભગ ૧૦ વિઘા જમીનમાં તેમના ઘર ઉપરાંત સ્વાસ્તિક માટે જિમ, ફ્લડ લાઇટ સાથેના ગ્રાઉન્ડ પર સ્વિંગ, આઉટ સ્વિંગ, ફાસ્ટ અને સ્પિન માટે અલગ અલગ ૧૨ પીચ બનાવી છે.