ક્રિકેટ / T-20 વર્લ્ડકપ માટે 16 ટીમ નક્કીઃ ટીમ ઇન્ડિયા પહેલી મેચ સાઉથ આફ્રિકા સામે રમશે

પહેલા રાઉન્ડ માટે ગ્રૂપ-એમાં શ્રીલંકાની સાથે પાપુઆ ન્યૂ ગિની, આયર્લેન્ડ અને  ઓમાંનની ટીમ રહેશે. આ બધી મેચ 18થી 22 ઓક્ટોબર દરમિયાન જિલોન્ગ શહેરમાં રમાશે. નેધરલેન્ડ્સ, નામીબિયા અને સ્કોટલેન્ડને બાંગ્લાદેશ સાથે ગ્રૂપ-બીમાં રાખવામાં આવ્યા છે. આ બધી મેચ 19થી 23 ઓક્ટોબર, 2020 દરમિયાન હોબાર્ટમાં રમાશે. ટૂર્નામેન્ટની ઓપનિંગ મેચ શ્રીલંકા અને આયરલેન્ડ વચ્ચે કાર્દિનિયા પાર્ક સ્ટેડિયમમાં રમાશે.

ICC T-20 વર્લ્ડકપ-2020ની સ્થાનિક સમિતિના સીઈઓ નિક હોક્લેએ  કહ્યું, ''ICC પુરુષ T-20 વર્લ્ડકપ-2020 માટે અમને ઓસ્ટ્રેલિયામાં નેધરલેન્ડ્સ, ઓમાન, પાપુઆ ન્યૂ ગિની અને સ્કોટલેન્ડનું સ્વાગત કરતા બહુ જ ખુશી થઈ રહી છે. અમે જાણીએ છીએ કે બધી 16 ટીમનું સ્વાગત બહુ જ ઉષ્માસભર કરાશે અને તેમને ઓસ્ટ્રેલિયામાં રહેતા સમર્થકો અને દુનિયાભરમાંથી આવનારા લોકોનું સંપૂર્ણ સમર્થન મળશે.''

યજમાન ઓસ્ટ્રેલિયા પોતાની પ્રથમ મેચ સિડનીમાં પાકિસ્તાન સામે 24 ઓક્ટોબરે રમશે. ભારત, ઈંગ્લેન્ડ, દક્ષિણ આફ્રિકા અને અફઘાનિસ્તાનની ટીમ સુપર-12  રાઉન્ડના ગ્રૂપ-૨માં રહેશે. આ બધી ટીમ ગ્રૂપ-બીની ટોચની ટીમ અને ગ્રૂપ-એમાં બીજા સ્થાનની ટીમ સામે ટકરાશે. ભારતીય ટીમના અભિયાનની શરૂઆત પર્થ ખાતે ૨૪ ઓક્ટોબર સાઉથ આફ્રિકા સામેની મેચથી થશે.

વર્ષ 2020માં પુરુષ અને મહિલા બંને વર્લ્ડકપની યજમાની ઓસ્ટ્રેલિયા જ કરવાનું છે. ICC મહિલા T-૨૦ વર્લ્ડકપનું આયોજન પહેલાં થશે, જે  21 ફેબ્રુઆરીથી 8 માર્ચ-2020 દરમિયાન રમાશે. મહિલા T-20 વર્લ્ડકપની ફાઇનલ આંતરરાષ્ટ્રીય મહિલા દિવસ પર રમાશે.

T-20 વર્લ્ડકપની ટીમ
ગ્રૂપ-એઃ શ્રીલંકા, પીએનજી, આયર્લેન્ડ અને ઓમાન

ગ્રૂપ-બીઃ બાંગ્લાદેશ, નેધરલેન્ડ્સ, નામીબિયા અને સ્કોટલેન્ડ

સુપર-12 ગ્રૂપ-1: પાકિસ્તાન, ઓસ્ટ્રેલિયા, ન્યૂઝીલેન્ડ, વિન્ડીઝ. આ ઉપરાંત ગ્રૂપ-એની ટોચની ટીમ (એ-૧), ગ્રૂપ-બીની બીજા નંબરની ટીમ (બી-૨) સામેલ થશે.

સુપર-12  ગ્રૂપ-2:  ભારત, ઈંગ્લેન્ડ, દક્ષિણ આફ્રિકા, અફઘાનિસ્તાન. આ ઉપરાંત ગ્રૂપ-બીની ટોચની ટીમ (બી-૧), ગ્રૂપ-એની બીજા નંબરની  ટીમ (એ-૨) સામેલ થશે.