fraud / ‘અધિકારી દાગીના જોશે તો પેન્શન મંજૂર નહીં કરે’ કહી વૃદ્ધા સાથે 1.52 લાખની ઠગાઈ કરી

• ઉષાબહેન ક‌િડયાએ સાયદાબીબી પઠાણ વિરુદ્ધ બાપુનગર પોલીસ સ્ટેશનમાં ફરિયાદ કરી
• પર્સમાં રહેલા ૧.પ૧ લાખના દાગીના અને રોકડા રકમ લઈને છૂમંતર
• હું તમને મહિને ૧૦ હજાર પેન્શન અપાવીશ 

બાપુનગરમાં આવેલ જાનકી રે‌િસડેન્સીમાં  રહેતાં ૭૦ વર્ષીય ઉષાબહેન ક‌િડયાએ સાયદાબીબી પઠાણ વિરુદ્ધ બાપુનગર પોલીસ સ્ટેશનમાં ફરિયાદ કરી છે. ગત ઓક્ટોબર મહિનામાં ઉષાબહેન તેમની પુત્રવધૂ સાથે શાકમાર્કેટ ગયાં હતાં ત્યારે એક મહિલા ઉષાબહેન પાસે આવી હતી અને તેણે પોતાનું આધારકાર્ડ ઉષાબહેનને બતાવ્યું હતું, જેમાં સાયદાબીબી પઠાણ નામ લખ્યું હતું. 

હું તમને મહિને ૧૦ હજાર પેન્શન અપાવીશ 

મહિલાએ ઉષાબહેનને કહ્યું હતું કે હું વિધવા બહેનોને પેન્શન અપાવવાનું કામકાજ કરું છું અને તમને સરકારી પેન્શન મળે છે? તેણે આમ કહેતાં ઉષાબહેને કહ્યું હતું કે મને કોઈ પેન્શન મળતું નથી, જેથી મહિલાએ ઉષાબહેનને વાત કરી કે હું તમને મહિને ૧૦ હજાર પેન્શન અપાવીશ. તમે તમારું આધારકાર્ડ લઇ લો અને મારી સાથે રિક્ષામાં બેસી જાઓ. મહિલાએ આમ કહેતાં તે વિશ્વાસમાં આવી ગયાં હતાં. ત્યારબાદ મહિલા ઉષાબહેનને રિક્ષામાં બેસાડી રામેશ્વર મેન્ટલ બારી પાસે લઈ ગઈ હતી.

ઉષાબહેનને તમારું પર્સ સાચવું છું

જ્યાં ઉષાબહેનને ત્યાં ઊભાં રાખી આ મહિલા થોડી વાર બાદ પરત આવી અને કહ્યું કે તમારુ પેન્શન પાસ થઈ ગયું છે. ત્યારબાદ ઉષાબહેનને બીજી રિક્ષામાં બેસાડી દીધાં હતાં. તેઓ દિલ્હી દરવાજા તરફ જઈ રહ્યાં હતાં તે દરમિયાન રસ્તામાં મહિલાએ કહ્યું કે તમે પહેરેલ સોનાની વસ્તુઓ કાઢી પર્સમાં મૂકી દો, નહિતર પેન્શન અધિકારી તમારું પેન્શન મંજૂર નહીં કરે,  જેથી ઉષાબહેને તેમના તમામ દાગીના પર્સમાં મૂકી દીધા. ત્યારબાદ મહિલાએ ઉષાબહેનને તમારું પર્સ સાચવું છું એમ કહી પર્સ લઈ લીધું હતું.

હું અંદર પેન્શન અધિકારીને મળીને આવું છું

ત્યારબાદ વીએસ હોસ્પિટલ પાસે આવેલ એસટી સ્ટેન્ડ પાસે બપોરના એક વાગ્યાની આસપાસ મહિલાએ ઉષાબહેનને કહ્યું કે તમે અહીંયાં બેસો, હું અંદર પેન્શન અધિકારીને મળીને આવું છું. તે આમ કહીને પર્સ લઈને જતી રહી હતી. ઘણો સમય થવા આવ્યો હોવા છતાં મહિલા પરત ન આવતાં ઉષાબહેન અને પુત્રવધૂએ તેની શોધખોળ કરી, પરંતુ તે મહિલા મળી આવી ન હતી.

પર્સમાં રહેલા ૧.પ૧ લાખના દાગીના અને રોકડા રકમ લઈને છૂમંતર

મહિલાએ ઉષાબહેનને વિશ્વાસમાં લઈ તેમના પર્સમાં રહેલા ૧.પ૧ લાખના દાગીના અને રોકડા રકમ લઈને છૂમંતર થઇ ગઈ હતી. ત્યારબાદ ઉષાબહેન તાત્કાલિક ઘરે જઈ તેમની સાથે થયેલ ઠગાઈની પરિવારને જાણ કરી હતી. ઉષાબહેનને તેમની સાથે થયેલી ઠગાઈથી આઘાત લાગતાં સારવાર અર્થે હોસ્પિટલ ખસેડવા પડ્યાં હતાં. સારવાર દરમિયાન સમગ્ર ઘટનાની જાણ પોલીસને કર્યા બાદ ઉષાબહેને મહિલા વિરુદ્ધ ફરિયાદ નોંધાવતાં પોલીસે ગુનો નોંધી વધુ તપાસ શરૂ કરી છે.