ગાંધી જયંતી / યુવકે ગાંધીનગરથી અમદાવાદ સુધી એવી રીતે સાયકલ ચલાવી કે રચ્યો વર્લ્ડ રેકોર્ડ

• ગાંધીજીની 150 મી જન્મજયંતીએ યોજાઇ અનોખી યાત્રા
• મહાત્મા મંદિરથી અમદાવાદ સુધી કરાયું આયોજન

પ્રધાનમંત્રી નરેન્દ્રભાઇ મોદી દ્વારા શરૂ કરાયેલા `ફિટ ઈન્ડીયા કેમ્પેઈન' ` સ્વચ્છ ભારત અભિયાન' તેમજ મહાત્મા ગાંધીજીની 150 મી જન્મજયંતીની ઉજવણીની પૂર્વ સંધ્યાએ એક અનોખી યાત્રાનું સાક્ષી સમગ્ર રાજ્ય બની ગયું. 

26 કિલોમીટર લાંબી યાત્રા

કેન્દ્રીય મંત્રી પરસોત્તમભાઇ રૂપાલાની આગેવાનીમાં મહાત્મા મંદિર, ગાંધીનગરથી અમદાવાદમાં આવેલા ગાંધીઆશ્રમ સુધીની 26 કિલોમીટર લાંબી સાયકલ યાત્રા યોજાઈ ગઈ.  સ્વચ્છતા અભિયાન તથા સિંગલ યુઝ પ્લાસ્ટિક મુક્ત ભારત સંદેશ સાથે  સાઇકલ યાત્રામાં  મોટી સંખ્યામાં યુવાનોએ ભાગ લીધો હતો. પ્રદેશ ભાજપ પ્રવક્તા ભરત પંડ્યા પણ યુવાનો સાથે સાયકલ યાત્રામાં જોડાયા હતા.  

આંખે પાટા બાંધી સાયકલ ચલાવતો યુવાન બન્યો આકર્ષણનું કેન્દ્ર

આ સાયકલ યાત્રામાં એક બીજી રીતે લોકો માટે આકર્ષણનું કેદ્ર બની હતી. કેમકે, સાયકલયાત્રામાં આંખે પાટા બાંધીને જીત ત્રિવેદી નામનો યુવક પણ જોડાયો હતો. `ઇન્ડિયાઝ બ્લાઇન્ડ ફોલ્ડેડ વન્ડર બોય' તરીકે ઓળખાતા જીત ત્રિવેદી આ 26 કિલોમીટર સુધીની સમગ્ર સાયકલ યાત્રા દરમ્યાન આંખે પાટા બાંધીને-બંધ આંખે સાયકલ ચલાવી એક નવો વિશ્વ વિક્રમ સ્થાપિત કર્યો હતો. 

જીત ત્રિવેદીને નામે  આંખે પાટા બાંધીને વિવિધ રંગો ઓળખી બતાવવાનો  આંખે પાટા બાંધીને  સ્કૂટર ચલાવવાનો, આંખે પાટા  બાંધીને બુક વાંચવાનો અને  આંખે પાટા બાંધીને સાયકલ ચલાવવાના  6 વર્લ્ડ રેકોર્ડ અગાઉ પણ નોંધાયેલા છે. જીત ત્રિવેદીએ આ રેલી દરમિયાન નવો વિશ્વ વિક્રમ સર્જતા તેને પુરસ્કાર પણ એનાયત કરાયો હતો.  

મહાત્મા ગાંધીના સપનાનું ભારત સર્જવાનું હોય અને તેના પ્રયાસોની વિગતો વિશ્વ સુધી ન પહોંચે તેવું બને ખરું. આ માત્ર આંખે પાટા બાંધીને સર્જેલો વિક્રમ નથી. આ  સ્વચ્છ ભારતની સમગ્ર પહેલ ખુલ્લી આંખે અને દીર્ધ દ્રષ્ટી પૂર્વક સદીઓ પછીના ભારતને  નજર સામે રાખીને કરાયેલી પહેલ છે. વિક્રમ તો સર્જાશે જ.