અમરેલી જિલ્લામાં કોંગ્રેસની માઠી બેઠી છે. વિપક્ષ નેતા પરેશ ધાનાણીની કામગીરીને લઈને ક્યાંકને ક્યાંક વિરોધનાં વંટોળ ઉભા થઈ રહ્યાં છે ત્યારે આજે સાવરકુંડલાનાં જુના કોંગી નેતા દિપક માલાણીને સસ્પેંડ કરાયાં બાદ કોંગી કાર્યકરોએ એકઠાં થઈને પક્ષ અને હોદ્દા ઉપરથી સામુહિક રાજીનામાં ધરી દેતાં જિલ્લાનું રાજકારણ ગરમાયું છે.
સાવરકુંડલા તાલુકા પૂર્વ કોંગ્રેસ પ્રમુખ અને APMCનાં ચેરમેન દિપક માલાણીને સસ્પેંડ કરાતાં સમગ્ર પંથકમા ધેરા પડઘા પડ્યાં છે ત્યારે આજે સાવરકુંડલાનાં અમ્રુતવેલ માતાજીનાં મન્દિરે થાળ કરી 200 જેટલાં કોંગી કાર્યકરો જિલ્લા પંચાયત તાલુકા પંચાયત અને સહકારી સંસ્થાઓનાં આગેવાનોએ એકઠા થઈ દિપક માલાણીને સમર્થન આપ્યું હતું અને 150 જેટલાં સામુહિક રાજીનામા ધરી દેવામાં આવ્યાં હતાં. અમરેલીનાં ધારાસભ્ય અને વિપક્ષ નેતા પરેશ ધાનાણીની આપખુદશાહીવાળી કામગીરીથી નારાજ થઈને આ પગલું ભરવામાં આવ્યું હતું.
અમરેલી જિલ્લો એટલે તે કોંગ્રેસનો ગઢ મનાય છે ત્યારે અમરેલીનાં ધારાસભ્ય અને વિપક્ષ નેતા પરેશ ધાનાણીની કામગીરીથી છેલ્લાં ચાલીસ વર્ષથી કોંગ્રેસમાં કામ કરી રહેલાં હોદેદારો પણ નારાજ થયાં છે અને કોંગ્રેસને સમગ્ર જિલ્લામાં બેઠી કરનારને જો જાકારો આપવામાં આવે તો તે અન્યાય સામે આજે બગાવત ઉભી થવા પામી છે.
લોકસભાની ચૂંટણી ટાણે જ અમરેલીમાં પરેશ ધાનાણી સામે ઉભો થયેલો વિરોધ કોંગ્રેસને ભારે પડી શકે છે. ગઈ કાલે અમરેલી મુકામે કોંગ્રેસનાં પૂર્વ ધારાસભ્યનાં અધ્યક્ષ સ્થાને કોંગ્રેસની સામે નારાજગી વ્યક્ત કરાઈ હતી. તો આજે સાવરકુંડલા મુકામે સામુહિક રાજીનામાં પડતાં કોંગ્રેસની જિલ્લાની નેતાગીરી સામે સવાલો ઉઠી રહ્યાં છે ત્યારે આગામી લોકસભા ચૂંટણીમાં આ વિરોધનો ભાજપાને ચોક્કસ લાભ મળી શકે છે.