રાજકોટ / પડધરીના મેટોડાના બંધ કારખાનામાં પોલીસ રેડ, એક યુવતી સહિત 15 નબીરાઓ દારૂની મહેફિલ માણતા ઝડપાયા

• મેટોડાના બંધ કારખાનામાંથી એક યુવતી સહિત 15 નબીરાઓ ઝડપાયા
• દારૂની મહેફિલમાં પોલીસે કુલ 6 લાખથી વધુનો મુદ્દામાલ કબજે કર્યો
• અમદાવાદ ATSની ડ્રગ્સ તપાસમાં રાજકોટમાં રેવ પાર્ટીની વિગતો મળી આવી

એકતરફ ગુજરાત રાજ્ય એટલે ગાંધીનું ગુજરાત કહેવાય છે. ત્યારે ગાંધીના ગુજરાતમાં તો દારૂબંધી છે. તેમ છતાં રાજ્યમાં અનેકવાર ઝડપાતા દારૂના જથ્થા તેમજ દારૂની મહેફિલને લઇને અનેક સવાલ ઉભા થાય છે. જેમ કે, શું ખરેખર આ ગાંધીનું ગુજરાત છે? કારણ કે તાજેતરમાં જ રાજકોટના મેટોડાના બંધ કારખાનામાંથી એક યુવતી સહિત કુલ 15 નબીરાઓને દારૂની મહેફિલ માણતા પોલીસે ઝડપી પાડ્યા છે. આ મહેફિલમાં કુલ 6 લાખથી વધુનો મુદ્દામાલ કબજે કરાયો છે. અમદાવાદ ATSની ડ્રગ્સ તપાસમાં રાજકોટમાં રેવ પાર્ટીની વિગતો મળી આવી હતી. આ મહેફિલમાં રાજકોટ અને ભાવનગરના નબીરાઓ ઝડપાયા છે. પોલીસે 19 ફોન, 2 કાર સહિત 6.21 લાખનો મુદ્દામાલ કબજે કર્યો છે. ફાર્મ હાઉસોમાં રેડ પડવાના કારણે બંધ કારખાનાનો પાર્ટી માટે ઉપયોગ કરાયો.

વધુમાં જણાવી દઇએ કે, પડધરીના મેટોડામાં આવેલા પ્લાસ્ટિકના એક બંધ કારખાનામાં દારૂની મોટી મહેફિલ મંડાઇ હોવાની માહિતી મળતા રવિવારે મધરાતે પડધરીના મહિલા PSI એમ.ડી. મકવાણા સહિતની ટીમ ઘટનાસ્થળે ત્રાટકી હતી. આથી, પોલીસ જ્યારે પહોંચી ત્યારે કારખાનામાં રંગીન માહોલ ચાલતો હતો અને દારૂની છોળો ઊડી રહી હતી. પરંતુ પોલીસને જોતા જ સોંપો પડી ગયો હતો. જો કે, પોલીસ આ પાર્ટીમાં એક યુવતી મળી આવતા પોલીસ પણ ચોંકી ઉઠી હતી. 14 શખ્સોની વચ્ચે માત્ર એક યુવતી મહેફિલમાં હાજર રહેતા અનેક ચર્ચાઓ પણ શરૂ થઇ હતી.

મહત્વનું છે કે, રાજકોટની આસપાસના વિસ્તારોમાં દારૂ, જુગારની મહેફિલ માટે અત્યાર સુધીમાં ફાર્મહાઉસ અને વાડીને પસંદ કરવામાં આવતા પરંતુ હવેથી આ સ્થળો પોલીસની શંકાના દાયરામાં આવતા કારખાનાઓમાં મહેફિલનો ટ્રેન્ડ શરૂ થયાના નિર્દેશો મળ્યા હતા.

સળગતા સવાલ

ગાંધીના ગુજરાતમાં દારૂની મહેફિલો કેમ?
આખરે પાર્ટી માટે દારૂ ક્યાંથી આવે છે?
શા માટે યુવાધન નશાના રવાડે ચઢી રહ્યું છે?
ગુજરાતમાં દારૂ લાવનારા સામે કેમ નથી કડક કાર્યવાહી?
દારૂ લાવનાર અને પીનારા સામે કડક કાર્યવાહી કરતા પોલીસના હાથ કેમ ધ્રુજે છે?
ગુજરાતમાં દારૂબંધી માત્ર કાગળ પર કેમ?
દારૂબંધીની કડક અમલવારી કરતાં પોલીસને કોણ રોકે છે?