સોમવાર ગોઝારો સાબિત થયો છે. દિવસેને દિવસે અકસ્માતની ઘટનાઓ અને અકસ્માતમાં થતા મોતની સંખ્યામાં સતત વધારો થઇ રહ્યો છે. ત્યારે સોમવારે કચ્છ અને નવસારીના બે અલગ અલગ અકસ્માતમાં કુલ 15 લોકોના મોત થયા છે. જ્યારે અનેક લોકો ઇજાગ્રસ્ત થયા છે.
રાજ્યમાં આજે અકસ્માતની બે મોટી ઘટના બની હતી. જેમાં એક દુર્ઘટના બાઇક ઝાડ સાથે અથડાતા સર્જાઇ હતી. જ્યારે બીજી ઘટના પુરપાટ આવતી ટ્રકના કારણે બની હતી.
જેમાં નવસારીના બીલીમોરા-પોંસરી માર્ગ પર અકસ્માત થયો છે. બાઇક સવાર ઝાડ સાથે અથડાતા અકસ્માત થયો છે. આ અકસ્માતમાં 3 યુવકોના ઘટના સ્થળે મોત થયા છે.
જ્યારે કચ્છ નજીક ત્રિપલ અકસ્માત થયો હતો. જેમાં અત્યાર સુધીમાં કુલ 12 લોકોના મોત થયા છે. ટ્રક, બાઈક અને છકડા વચ્ચે આ અકસ્માત થયો હતો. ભૂજના માનકુવા-સામત્રા રોડ પર આ ઘટના બની હતી.
આ અકસ્માતમાં અન્ય ઈજાગ્રસ્તોને હોસ્પિટલ ખસેડવામાં આવ્યા હતા. ધસમસતા વેગે આવતી ટ્રકે છકડાને અડફેટમાં લીધો હતો તો બાઇકની પણ ટક્કર થઈ હતી. છકડા રિક્ષામાં પરપ્રાંતીય મજૂરો સવાર હતા. બનાવ સર્જ્યા બાદ ટ્રક ચાલક ફરાર થઈ ગયો હતો. જોકે હાલ ટ્રક ડ્રાઇવરની ધરપકડ થઇ છે. આરોપીને રાપરથી પોલીસે ઝડપી પાડ્યો છે.