કોરોના વાયરસના કારણે હડકંપ મચી ગયો છે. વિશ્વમાં કોરોના વાયરસનાં કારણે હજારો લોકોએ પોતાના જીવ ગુમાવ્યા છે અને લાખો હજુ પણ જીવન-મરણ વચ્ચે લડાઈ લડી રહ્યા છે. દુનિયાના ઘણા દેશ કોરોના સામે લડી રહ્યા છે ત્યારે એવા દેશો પણ છે જ્યાં આજ સુધી કોરોનાનો એક પણ કેસ સામે આવ્યો નથી.
અમેરિકાની યુનિવર્સિટીએ તૈયાર કર્યો ડેટાબેઝ
નોર્થ કોરિયા સહીતના ઘણા દેશો કોરોનાથી બાકાત
આફ્રિકાના ઘણા દેશોમાં કોરોનાનો એક પણ કેસ નહીં
અમેરિકાની જોન હોપકિન્સ યુનીવર્સીટી દ્વારા કોરોના વાયરસને લઇ એક ડેટાબેસ તૈયાર કરવામાં આવ્યો છે જેમાં દુનિયાની ઘણી બધી મીડિયાના અહેવાલોને લઈને આંકડાઓ તૈયાર કરવામાં આવ્યા છે. આ આંકડાંઓ બહાર આવ્યું છે કે દુનિયામાં હજુ એવા કેટલાક દેશોમાં કોરોના વાયરસ પહોંચ્યો નથી.
અત્યારે આશરે 180 દેશો સુધી કોરોના વાયરસ પહોંચી ગયો છે. પરંતુ એવા દેશો પણ છે જે કોરોનાની ઝપેટમાં આવ્યા નથી. આ દેશોમાં નોર્થ કોરિયાનું નામ પણ સામેલ છે. જોકે નોર્થ કોરિયાની સીમા તો ચીન અને સાઉથ કોરિયા સાથે જોડાયેલી છે. આ બંને દેશોમાં કોરોનાએ ભારે નુકસાન કર્યું છે.
આ અહેવાલ અનુસાર દુનિયાના ઘણા દેશ એવા છે જ્યાં આજ સુધી કોરોના વાયરસ પહોંચ્યો નથી. બોત્સવાના, તુર્કમેનિસ્તાન, તજાકિસ્તાન, યમન, કોમોરોસ, મલાવી, સાઓ તોમે એન્ડ પ્રિન્સીપી અને દક્ષિણ સુદાન એવા દેશ છે જ્યાં આજ સુધી કોરોના વાયરસ આવી શક્યો નથી. આ સિવાય સોલોમન આઈસલેન્ડ, વાનુઆતુ જેવા આઈસલેન્ડમાં પણ કોરોના વાયરસથી બચેલા છે.
જોકે દુનિયાના ઘણા નિષ્ણાતો નોર્થ કોરિયાનાં આંકડાઓને માનવા તૈયાર નથી. તો કેટલાક એવા પણ છે જે માને છે કે ત્યાં એક પણ કેસ આવ્યો નહી હોય. નોંધનીય છે કે નોર્થ કોરિયા વિશ્વમાં સંપર્ક વિહોણો દેશ છે તેથી હોઇ શકે કે ત્યાં આ વાયરસ પહોંચ્યો ના હોય. એક તરફ દુનિયા કોરોના વાયરસથી લડી રહી છે ત્યાં બીજી તરફ નોર્થ કોરિયા મિસાઈલ પરીક્ષણમાં લાગેલું છે.
વિશ્વમાં કોરોના વાયરસનાં કારણે હજારો લોકોએ પોતાના જીવ ગુમાવ્યા છે અને લાખો હજુ પણ જીવન-મરણ વચ્ચે લડાઈ લડી રહ્યા છે. હાલમાં અમેરિકામાં કોરોના વાયરસથી હાહાકાર મચી ગયો છે, ત્યારે ઈટાલી અને સ્પેનમાં પરિસ્થિતિ દયનીય છે.