કચ્છ: ભુજ આરઆર સેલ દ્વારા હાઈપ્રોફાઈલ જુગારધામ ઝડપી પાડવામાં આવ્યું હતું. પોલીસ દ્વારા રૂપિયા 1.5 લાખની રોકડ સાથે રૂપિયા 21 લાખનો મુદ્દામાલ કબ્જે કરવામાં આવ્યો.પોલીસની આ રેડમાં જાણીતા ઉદ્યોગપતિઓ સહિત કુલ 15 જેટલા જુગારીઓ ઝડપાયા.
જેમાં સ્ટર્લીંગ હોસ્પિટલના ટ્રસ્ટી પ્રમોદ બંસલ પણ જુગાર રમતા ઝડપાયા હતા. પરંતુ હદ તો ત્યારે થઈ જ્યારે પોલીસે આરોપીઓમાં પણ ભેદભાવની નીતિ અપનાવી પોલીસે 15માંથી 14 આરોપીઓને તો લોકઅપમાં પુર્યા.
પરંતુ જાણે પ્રમોદ બંસલને વીવીઆઈપી ટ્રિટમેન્ટ આપતા હોય તેમ સોફા ઉપર બેસાડ્યા. જેને લઈને અનેક સવાલો ઉભા થઈ રહ્યા છે કે શું પોલીસ પ્રમોદ બંસલ પર કાર્યવાહી કરતા ગભરાય છે કે પછી ઉપરથી કોઈ દબાણ છે.
ઉલ્લેખનીય છે કે શ્રાવણીયા જુગાર અન્વયે કાયદાના રક્ષકો દ્વારા અવિરત રહેલા દરોડાનો દોર ચાલુ છે ત્યારે ગતરોજ ભૂજના RR સેલ દ્વારા એક હાઇપ્રોફાઇલ જુગારધામ પર દરોડા પાડવાની કામગીરી હાથ ધરવામાં આવતા. 15 મોટા માથાઓને જુગાર રમતા ઝડપી લીધા હતા.
આપને જણાવી દઇએ કે બાતમીના આધારે આર.આર. સેલના સ્ટાફે સિંધુભુવનમાં આવેલી નેક્સેસ ક્લબમાં ચાલતા જુગાર ક્લબ પર દરોડા પાડયા હતા. પોલીસે દરોડા પાડીને 50 હજાર રૂપિયા રોકડ અને 88 હજારની કિંમતના 18 મોબાઈલ ફોન જપ્ત કર્યા છે અને 20 લાખની કિંમતના વાહનો મળીને કુલ 22 લાખનો મુદ્દામાલ જપ્ત કર્યો છે.