ચૂંટણી / સૌરાષ્ટ્રની 7 બેઠકના તમામ 14 ઉમેદવાર કરોડપતિ, જાણો સૌથી વધારે કોની?

કોમનમેનની વાતો કરનારા ભાજપ અને કોંગ્રેસ બંને પક્ષોએ સૌરાષ્ટ્રમાં કરોડપતિ ઉમેદવારોને ટિકિટ આપી છે. સૌરાષ્ટ્રની 7 બેઠકના તમામ 14 ઉમેદવાર કરોડપતિ છે. જેમાં સૌથી વધુ સંપત્તિ ભાજપમાંથી પ્રથમ વખત લડી રહેલા રમેશ ધડુકની છે. રમેશ ધડુક પાસે 35 કરોડ 73 લાખ રૂપિયાની સંપત્તિ છે. જ્યારે રાજકોટથી ભાજપના ઉમેદવાર મોહન કુંડારિયા પાસે 6 કરોડ 87 લાખ રૂપિયાની સંપત્તિ છે. છેલ્લા પાંચ વર્ષમાં મોહન કુંડારિયાની સંપત્તમાં 3 કરોડ રૂપિયાનો વધારો થયો છે. 
 
આ તરફ કોંગ્રેસના ઉમેદવાર લલિત કગથરા પાસે પણ 9 કરોડ 75 લાખ રૂપિયાની સંપત્તિ છે. જ્યારે જામનગરના કોંગ્રેસના ઉમેદવાર મુળુ કંડોરીયા પણ 10 કરોડના આસામી છે. તો જામનગરથી જ ભાજપના ઉમેદવાર પૂનમ માડમે પોતાની સંપત્તિ 26 કરોડ 99 લાખ રૂપિયા દર્શાવી છે. એટલે કે, છેલ્લા પાંચ વર્ષમાં પૂનમ માડમની સંપત્તિમાં 11 કરોડ રૂપિયા જેટલો વધારો થયો છે. આમ, સૌરાષ્ટ્રમાં ભાજપ કોંગ્રેસના કરોડપતિ વર્સિસ કરોડપતિ ઉમેદવારો વચ્ચે જંગ છે.
 
અત્રે ઉલ્લેખનીય છે કે ચૂંટણીના ઉમેદવારી ફોર્મમાં દરેક ઉમેદવારે પોતાની સંપત્તિ જાહેર કરવાની હોય છે. જેમાં ગુજરાતના તમામ ઉમેદાવારોએ પોતાની સંપત્તિની જાહેરાત કરી હતી. પરંતુ 26 બેઠકોમાંથી સૌરાષ્ટ્રની 7 બેઠકો પરના તમામ ભાજપ અને કોંગ્રેસના 14 ઉમેદવાર કરોડપતિ છે. જોકે સૌરાષ્ટ્ર સિવાય અન્ય બેઠકો પર પણ અમિર ઉમેદવારો છે.